Fetela kwa tshedimosetsong

Fetela go diteng

Go Atlega Le fa Re Lebane le Mathata

Go Atlega Le fa Re Lebane le Mathata

 Go Atlega Le fa Re Lebane le Mathata

Fela jaaka go boleletswe pele mo Baebeleng, re tshela mo ‘dinakong tsa mathata tse go leng boima go lebana le tsone.’ (2 Timotheo 3:1) Mathata mangwe a a ka go amang e ka nna a lelapa, a botsogo le a madi. Ka dinako tse dingwe, o ka nna wa ikutlwa e kete ga o kgone go a itshokela. Le fa go ntse jalo, o ka atlega le fa o lebane le mathata ano. Akanya ka setshwantsho se se latelang.

Sethunya sa Teide violet se golela kwa bogodimong jwa dimetara tse di ka nnang 3 700 kwa setlhaketlhakeng sa Tenerife se se kwa losing lwa Afrika Bokone. Pico de Teide, e leng setlhoa sa thaba ya lekgwamolelo le sethunya seno sa violet se reeletsweng ka lone, se tlhageletse kwa godimo mo setlhaketlhakeng seno sa boboatsatsi. Go bonala go se na dimela dipe gaufi le setlhoa sa lekgwamolelo leno. Mme ka dikgakologo, kapoko e e gakologang ya mariga e ntsha metsi a a lekaneng go dira gore dithunya tseno tsa violet tse di sa ineeleng di boe di thunye gape mme di kgabise karolo e e gaufi le setlhoa sa lekgwamolelo leno ka dithunya tse di phepole. Ee, sethunya seno se ka nna sa lebega se sa nonofa, mme se kgona go tshela le go gola sentle tota mo tikologong eno e e kgakgabetseng, e e sa siamang.

Fela jaaka sethunya sa Teide violet, le wena o ka kgona go itshoka le fa o le mo maemong a a boima. Baebele e thusitse Basupi ba ga Jehofa ba le bantsi gore ba itshoke le fa ba lebane le dinako tse di boima thata. Ka sekai, ba ba neng ba tshwerwe kwa dikampeng tsa pogisetso kwa Jeremane ya Bonasi ba ne ba kgona go atlega. Mokwadi wa dikgang wa kwa Sweden e bong Björn Hallström a re: “Ba ne ba tshwerwe makgwakgwa go gaisa ditlhopha tse dingwe, mme ba ne ba kgona go itshoka go gaisa ba bangwe ka ntlha ya tumelo ya bone mo Modimong.”

Le fa o ka iphitlhela o le mo maemong afe, Baebele e ka go thusa gore o atlege le fa o lebane le mathata. Ikgolaganye le Basupi ba ga Jehofa mo lefelong la gaeno kgotsa o kwalele mo atereseng e e mo tsebeng 5 ya makasine ono gore o tshwarelwe thuto ya mahala ya legae ya Baebele.