Fetela kwa tshedimosetsong

Fetela go diteng

Kafa Soviet e Tlhasetseng Bodumedi ka Gone

Kafa Soviet e Tlhasetseng Bodumedi ka Gone

 Kafa Soviet e Tlhasetseng Bodumedi ka Gone

UNION OF SOVIET SOCIALIST REPUBLICS e ne ya tlhongwa ka 1922, mme Russia e ne e le yone repaboliki e kgolo go gaisa direpaboliki tsa ntlhantlha di le nnè tsa puso eno. Kgabagare e ne ya gola go akaretsa direpaboliki di le 15 mme ya batla e dira nngwethatarong ya boalo jwa lefatshe. Le fa go ntse jalo, Soviet Union e ne ya phutlhama ka tshoganyetso fela ka 1991. * Selo se se tlhomologileng ka yone ke gore ke yone Puso ya ntlha e e neng ya leka go dira gore batho ba yone ba se ka ba tlhola ba dumela mo Modimong.

Vladimir Lenin, yo e neng e le tonakgolo ya ntlha ya Soviet Union, e ne e le morutwa wa ga Karl Marx, yo a neng a bolela gore Bokeresete ke selo se se dirisediwang go gatelela batho ba bangwe. Marx o ne a bitsa bodumedi a re ke “matekwane a batho,” mme Lenin o ne a bolela jaana moragonyana: “Kgopolo epe fela ya bodumedi, kgopolo epe fela e e ka ga modimo ope fela, . . . ke dilo tse di maswe thata.”

Fa Moeteledipele wa Orthodox ya Russia e bong Tikhon a swa ka 1925, kereke e ne ya se ka ya letlelelwa go tlhopha moeteledipele yo mongwe. Tsela e bodumedi bo neng jwa tlhaselwa ka yone morago ga moo e ne ya felela ka gore dikereke di le dintsi di senngwe kana di dirisediwe ditiro dingwe tse e seng tsa bodumedi. Baruti ba ne ba isiwa kwa dikampeng tsa makgoba, koo bontsi jwa bone bo neng jwa swela gone. Encyclopædia Britannica e tlhalosa jaana: “Mo pusong ya ga Joseph Stalin kwa bofelong jwa dingwaga tsa bo1920 le bo1930, kereke e ne ya bogisiwa mo go botlhoko mo go neng ga swa batho ba le diketekete. Ka 1939, go ne go na le bobishopo ba le bararo kana ba le banè fela ba Othordox le dikereke di le 100 fela tse di neng di letleletswe semolao.”

Le fa go ntse jalo, go ne ga direga phetogo nngwe e e gakgamatsang ka tshoganyetso fela.

Ntwa ya Lefatshe II le Bodumedi

Ka 1939, Jeremane ya Bonasi, e ka nako eo e neng e le seoposengwe le Soviet Union, e ne ya tlhasela Poland, ka jalo, ya simolola Ntwa ya Lefatshe II. Mo lobakeng lwa ngwaga fela, Soviet Union e ne e setse e gapile direpaboliki di le 4 tse di neng di setse mo go tse 15 tsa yone—Latvia, Lithuania, Estonia le Moldavia. Le fa go ntse jalo, ka June 1941, Jeremane e ne ya tlhasela Soviet Union setlhogo thata, mo Stalin a neng a sala a gakgametse tota. Kwa bokhutlong jwa ngwaga oo, masole a Jeremane a ne a setse a fitlhile kwa dikarolong tse di kwa thoko tsa Moscow, mme go ne go bonala Soviet Union e le gaufi le go phutlhama.

 E re ka Stalin a ne a tsenwe ke tsebetsebe, o ne a ya go rulaganyetsa naga ya gagwe ntwa e Ba-Russia ba neng ba e bitsa Ntwa e Kgolo ya Boratanaga. Stalin o ne a lemoga gore o tshwanetse go naya kereke ditshwanelo dingwe gore batho ba eme ntwa eno nokeng, e re ka dimilione tsa bone ba ne ba sa ntse ba rata bodumedi. Tsela e e gakgamatsang e Stalin a neng a fetola molao o o malebana le bodumedi ka yone e ne ya felela ka eng?

Kereke e ne ya nna le tirisanommogo mo go direng gore batho ba Russia ba rulaganngwe gore ba nne le seabe mo ntweng, mme ka 1945, Soviet e ne ya fenya Jeremane ka tsela e e gakgamatsang. E ne ya re fa Soviet e sena go kgaotsa go tlhola e tlhasela bodumedi, palo ya dikereke tsa Orthodox e ne ya tlhatlogela go 25 000, mme ga nna le baruti ba ka nna 33 000.

Go Tlhaselwa Bosha Gape

Le fa go ntse jalo, tota mokgele wa baeteledipele ba Soviet wa go dira gore batho ba se ke ba akanya sepe ka Modimo o ne o ise o fetoge. The Encyclopædia Britannica e tlhalosa jaana: “Mokgatlho o mosha o e seng wa bodumedi o ne wa simololwa ke Tonakgolo Nikita Khrushchev ka 1959-64, a fokotsa palo ya dikereke tse di neng di butswe gore di nne kwa tlase ga 10 000. Moeteledipele Pimen o ne a tlhophiwa ka 1971 morago ga loso lwa ga Alexis, mme le mororo kereke e ne e sa ntse e batla gore batho ba le dimilione ba ikanyege mo go yone, isagwe ya yone e ne e sa tlhomama. *

Moragonyana re tla tlotla ka tsela e Kereke ya Orthodox ya Russia e neng ya atlega ka yone go falola tlhaselo e ntšha ya Soviet. Le fa go ntse jalo, go ne ga direga eng ka ditumelo tse dingwe kwa Soviet Union? Mo go tsone, ke bodumedi bofe jo bo neng jwa tlhaselwa thata, le gone ka ntlha yang? Go tla tlotliwa ka kgang eno mo setlhogong se se latelang.

[Dintlha tse di kwa tlase]

^ ser. 2 Dinaga tse di latelang tse 15 ke tse di ikemetseng tse pele e neng e le direpaboliki tsa Soviet: Armenia, Azerbaijan, Belarus, Estonia, Georgia, Kazakhstan, Kyrgyzstan, Latvia, Lithuania, Moldova, Russia, Tajikistan, Turkmenistan, Ukraine le Uzbekistan.

^ ser. 11 Maina ano Alexis I, yo e neng ya nna moeteledipele wa Orthodox ya Russia go tloga ka 1945 go ya go 1970, le Alexis II, yo e neng ya nna moeteledipele go tloga ka 1990 go tla go fitlha jaanong, ka dinako tse dingwe a kwalwa e le Alexy, Aleksi, Aleksei le Alexei.

[Setshwantsho mo go tsebe 11]

Lenin o ne a bitsa ‘kgopolo epe fela e e ka ga Modimo a re ke selo se se maswe thata’

[Motswedi wa Setshwantsho]

Musée d’Histoire Contemporaine—BDIC