Fetela kwa tshedimosetsong

Fetela go diteng

Lefatshe Le le Se Nang Dibomo Tse di Epelwang

Lefatshe Le le Se Nang Dibomo Tse di Epelwang

 Lefatshe Le le Se Nang Dibomo Tse di Epelwang

KE MANG yo o ka rarabololang bothata jwa dibomo tse di epelwang? Jaaka re bone, maiteko a batho ga a ka ke a kgona go khumola letlhoo, manganga le bopelotshetlha jwa batho. Le fa go ntse jalo, batho ba ba ithutang Baebele ba a itse gore Mmopi a ka kgona go tlisa tharabololo ya go ya go ile. Mme o tla dira seno jang?

Go Bopa Setšhaba se se Kagiso

Dintwa di lowa ke batho, ga di lowe ke dibetsa. Ka gone, fa e le gore re batla kagiso, re tshwanetse go fedisa letlhoo le le kgaoganyang batho go ya ka ditso, merafe le ditšhaba. Modimo o solofetsa go dira seno a dirisa Bogosi jwa gagwe, jo dimilione tsa batho mo lefatsheng lotlhe di rutilweng go bo rapelela.—Mathaio 6:9-10.

Baebele e bua ka Jehofa e le “Modimo o o nayang kagiso.” (Baroma 15:33) Kagiso e e tswang mo Modimong ga ya ikaega ka dithibelo le ditumalano, e bile ga ya ikaega ka go boifa gore naga e nngwe ya mmaba e e nang le dibetsa tse dintsi e tla ipusolosetsa. Go na le moo, kagiso e e tswang mo Modimong e akaretsa go fetola tsela e batho ba akanyang ka yone le boikutlo jo ba nang najo ka batho ba bangwe.

Jehofa Modimo o tla ruta batho ba ba pelonolo ditsela tsa gagwe tsa kagiso. (Pesalema 25:9) Lefoko la gagwe, Baebele, le solofetsa nako e mo go yone batho botlhe ba ba tshelang “ba tlaa [rutwang] ke Jehofa; kagiso ya bana ba gago e tlaa nna kgolo.” (Isaia 54:13) Seno se setse se direga go ya bokgakaleng jo bo rileng. Basupi ba ga Jehofa mo lefatsheng lotlhe, ba itsege ka go rotloetsa kagiso tota le mo bathong ba ba godisitsweng ka ditsela tse di farologaneng thata. Batho ba ba rutiwang melaometheo ya maemo a a kwa godimo ya Baebele ba lwela go tshela ka kutlwano le fa go ka tswa go na le mathata mangwe a ka tsela nngwe a ka dirang gore ba se utlwane. Thuto ya Baebele e fetola tsela yotlhe e ba lebang dilo ka yone gore e se tlhole e nna ya letlhoo mme e nne ya lorato.—Johane 13:34, 35; 1 Bakorintha 13:4-8.

 Mo godimo ga thuto, kgang ya gore lefatshe lotlhe le tlhoka go dirisana mmogo ga e bolo go tsewa e le selo se se botlhokwa mo go fediseng dibetsa. Ka sekai, Komiti ya Ditšhabatšhaba ya Sefapaano se Sehibidu e akantsha gore batho ba ditšhaba tsotlhe ba rotloetse mekgwa ya go thibela le go rarabolola dilo ka kutlwano, mo maitekong a go lwantsha bothata jono jwa dibomo tse di epelwang.

Jehofa o solofetsa go dira se se fetang seno. Moporofeti Daniele o ne a bolelela pele jaana: “Modimo wa legodimo o tlaa tlhoma bogosi jo bo se ketlang bo senngwa gope. . . . Bo tlaa thubaganya bo nyeletsa magosi ao otlhe [a a leng teng jaanong], mme bo tlaa ema ka bosakhutleng.”—Daniele 2:44.

Bogosi jwa Modimo bo tla kgona go dira dilo tse motho a sa kgoneng go di dira. Ka sekai, Pesalema 46:9 e bolela jaana ka tsela ya seporofeti: “[Jehofa] o khutlisa ditlhabano le kwa bokhutlong jwa lefatshe; o roba bora, o putlaganya lerumo ka bogare; o fisa dikara tsa tlhabano mo molelong.” Bogosi jwa Modimo bo tla lere tikologo e ruri motho a ka kgonang go ipelela kagiso le Mmopi wa gagwe le mothokaene mo go yone.—Isaia 2:4; Sefania 3:9; Tshenolo 21:3, 4; 22:2.

Augusto, yo o umakilweng mo tshimologong ya setlhogo se se fetileng, o gomodiwa ke molaetsa ono wa Baebele. Batsadi ba gagwe ba Basupi ba ga Jehofa, ba mo thusa gore a nne le tumelo mo ditsholofetsong tseno tse di molemolemo tsa Baebele. (Mareko 3:1-5) Gone ke boammaaruri gore gone jaanong o tshwanetse go itshokela ditlamorago tse di utlwisang botlhoko tsa go thuntshiwa ke bomo e e neng e epetswe e e mo golafaditseng. Le fa go ntse jalo, Augusto o tlhoafaletse letsatsi le tsholofetso ya Modimo ya go dira lefatshe paradaise e tla diragadiwang ka lone. Moporofeti Isaia o ne a bolelela pele jaana: “Ka nako eo, matlho a difofu a tla bulwa, le . . . setlhotsa se tla palamelela fela jaaka kgama e tonanyana.” (Isaia 35:5, 6NW)

Mo Paradaiseng eo e e tlang, dibomo tse di epelwang ga di kitla di tlhola di bolaya batho le go ba golafatsa. Go na le moo, batho ba ba nnang kwa dikhutlong tsotlhe tsa lefatshe ba tla nna ka pabalesego. Moporofeti Mika o ne a tlhalosa seno jaana: “Mongwe le mongwe wa bone o tlaa dula fa tlase ga mofine wa gagwe, le fa tlase ga mofeige wa gagwe; ope ga a ketla a ba boifisa; gonne molomo wa ga Jehofa wa masomosomo o se buile.”—Mika 4:4.

A o ne o ka rata go ithuta go ya pele ka ditsholofetso tsa Modimo tse di kwadilweng mo lefokong la gagwe, Baebele? Ikgolaganye le Basupi ba ga Jehofa ba lefelo la gaeno, kana o kwalele kwa atereseng e e tshwanetseng mo go tse di kwadilweng mo tsebeng ya 5 ya makasine ono.

[Setshwantsho mo go tsebe 8, 9]

Mo Bogosing jwa Modimo, dibomo tse di epelwang ga di kitla di tlhola di boifisa batho