Fetela kwa tshedimosetsong

Fetela go diteng

 THUTO 1

Modimo o go Laletsa Gore o Nne Tsala ya Gagwe

Modimo o go Laletsa Gore o Nne Tsala ya Gagwe

Modimo o batla gore o nne tsala ya gagwe. A o kile wa akanya gore o ka kgona go nna tsala ya Motho yo mogolo go ba feta botlhe mo lobopong? Aborahame, yo o tshedileng bogologolo tala, o ne a bidiwa tsala ya Modimo. (Jakobe 2:23) Ba bangwe ba go buiwang ka bone mo Baebeleng le bone ba ne ba itumelela go nna ditsala tsa Modimo mme ba ne ba segofadiwa thata. Gompieno, batho ba ba tswang mo dikarolong tsotlhe tsa lefatshe ba fetogile ditsala tsa Modimo. Le wena o ka kgona go nna tsala ya Modimo.

Go nna tsala ya Modimo go botoka go feta go nna tsala ya motho ope. Modimo ga a ke a swabisa ditsala tsa gagwe tse di ikanyegang. (Pesalema 18:25) Go nna tsala ya Modimo go botoka go feta go nna le dikhumo. Fa mohumi a swa, madi a gagwe a tsewa ke batho ba bangwe. Le fa go ntse jalo, ba e leng ditsala tsa Modimo ba na le letlotlo le go se nang motho ope yo o ka le ba tseelang.—Mathaio 6:19.

Batho bangwe ba ka nna ba leka go go thibela gore o se ka wa ithuta ka Modimo. Le e leng dingwe tsa ditsala tsa gago le ba lelapa la gago ba ka nna ba go thibela. (Mathaio 10:36, 37) Fa ba bangwe ba go tshega kgotsa ba go tshosetsa, o ipotse jaana, ‘Ke batla go itumedisa mang—batho kgotsa Modimo?’ Akanya ka seno: Fa motho mongwe a ne a ka go raya a re o emise go ja, a o ne o tla mo reetsa? Le e seng! O tlhoka dijo gore o tshele. Mme Modimo o ka dira gore o tshelele ruri! Ka jalo le ka motlha o se ka wa letla ope gore a go thibele go ithuta gore o ka nna tsala ya Modimo jang.—Johane 17:3.