Fetela kwa tshedimosetsong

Fetela go diteng

 THUTO 10

Kafa o ka Bonang Bodumedi Jwa Boammaaruri ka Teng

Kafa o ka Bonang Bodumedi Jwa Boammaaruri ka Teng

Fa o batla go nna tsala ya Modimo, o tshwanetse go nna mo bodumeding jo Modimo a bo amogelang. Jesu o ne a re “baobamedi ba boammaaruri” ba ne ba tla obamela Modimo tumalanong le “boammaaruri.” (Johane 4:23, 24) Go na le tsela e le nngwe fela e e siameng ya go obamela Modimo. (Baefeso 4:4-6) Bodumedi jwa boammaaruri bo isa botshelong jo bo sa khutleng, mme bodumedi jwa maaka bo isa tshenyegong.—Mathaio 7:13, 14.

O ka kgona go lemoga bodumedi jwa boammaaruri ka go leba batho ba ba mo go jone. Ka gonne Jehofa o molemo, batho ba e leng baobamedi ba gagwe ba boammaaruri ba tshwanetse go nna batho ba ba molemo. Fela jaaka setlhare se se siameng sa dinamune se ntsha dinamune tse di siameng, bodumedi jwa boammaaruri bo ntsha batho ba ba siameng.—Mathaio 7:15-20.

Ditsala tsa ga Jehofa di tlotla Baebele thata. Ba itse gore Baebele e tswa kwa Modimong. Ba letla se e se buang gore se kaele matshelo a bone, se rarabolole mathata a bone, le gore se ba thuse gore ba ithute ka Modimo. (2 Timotheo 3:16) Ba leka go tshela tumalanong le se ba se rerang.

 Ditsala tsa ga Jehofa di bontshana lorato. Jesu o ne a bontsha batho lorato ka go ba ruta ka Modimo, ka go fodisa ba ba neng ba lwala. Batho ba ba mo bodumeding jwa boammaaruri le bone ba bontsha ba bangwe lorato. Jaaka Jesu, ga ba lebele ba ba humanegileng kgotsa ba ditso di sele kwa tlase. Jesu o ne a re batho ba ne ba tla itse barutwa ba gagwe ka lorato lo ba lo bontshanang.—Johane 13:35.

Ditsala tsa Modimo di tlotla leina la Modimo, Jehofa. Fa motho mongwe a gana go dirisa leina la gago, a motho yoo e ka nna tsala ya gago e kgolo? Nnyaa! Fa re na le tsala, re dirisa leina la yone e bile re bua dilo tse di molemo ka tsala eo mo bathong ba bangwe. Ka jalo batho ba ba ratang go nna ditsala tsa Modimo ba tshwanetse go dirisa leina la gagwe ba bo ba bue ka ene mo go ba bangwe. Jehofa o batla gore re dire fela jalo.—Mathaio 6:9; Baroma 10:13, 14.

Jaaka Jesu, ditsala tsa Modimo di ruta batho ka Bogosi jwa Modimo. Bogosi jwa Modimo ke puso ya selegodimo e e tla dirang lefatshe paradaise. Ditsala tsa Modimo di bolelela ba bangwe dikgang tse di molemo ka Bogosi jwa Modimo.—Mathaio 24:14.

Basupi ba ga Jehofa ba leka go nna ditsala tsa Modimo. Ba tlotla Baebele e bile ba a ratana. Ba dirisa leina la Modimo gape ba a le tlotla e bile ba ruta ba bangwe ka Bogosi jwa Modimo. Basupi ba ga Jehofa ba mo bodumeding jwa boammaaruri mo lefatsheng gompieno.