Fetela kwa tshedimosetsong

Fetela go diteng

 KGAOLO 13

Tlotla Mpho ya Botshelo

Tlotla Mpho ya Botshelo

1. Ke mang yo o re neileng botshelo?

JEHOFA “ke Modimo yo o tshelang.” (Jeremia 10:10) Ke ene a re bopileng e bile o re neile botshelo. Baebele ya re: “O bopile dilo tsotlhe, mme ka ntlha ya thato ya gago di ne tsa nna gone e bile di ne tsa bopiwa.” (Tshenolo 4:11) Jehofa ke ene a re neileng mpho ya botshelo.—Bala Pesalema 36:9.

2. Re tshwanetse go dira eng fa re batla go atlega mo botshelong?

2 Jehofa o dirile gore go nne le dijo le metsi gore re kgone go tswelela re tshela. (Ditiro 17:28) Mme sa botlhokwa, o batla gore re itumelele botshelo. (Ditiro 14:15-17) Re tshwanetse go ikobela melao ya Modimo fa re batla go atlega mo botshelong.—Isaia 48:17, 18.

MODIMO O IKUTLWA JANG KA BOTSHELO?

3. Jehofa o ne a dira eng fa Kaine a ne a bolaya Abele?

3 Baebele e re ruta gore Jehofa o tsaya botshelo jwa mongwe le mongwe wa rona bo le botlhokwa thata. Ka sekai, fa morwa Adame le Efa e bong Kaine, a ne a galefetse monnawe e bong Abele, Jehofa o ne a mo tlhagisa gore a ele tlhoko tsela e a galefang ka yone. Mme Kaine ga a ka a reetsa go na le moo o ne a galefa thata jaana mo a neng a ‘tlhasela Abele monnawe mme a mmolaya.’ (Genesise 4:3-8) Jehofa o ne a otlhaela Kaine se a se dirileng. (Genesise 4:9-11) Ka jalo, bogale le letlhoo di kotsi ka gonne di ka dira gore re nne batho ba ba ratang ntwa kgotsa ba ba setlhogo. Batho ba ba ntseng jalo ba ka se tshelele ruri. (Bala 1 Johane 3:15.) Re tshwanetse go rata batho botlhe gore re kgone go itumedisa Jehofa.—1 Johane 3:11, 12.

4. Molao mongwe o Modimo a neng a o naya Baiseraele o re ruta eng malebana le mpho ya botshelo?

 4 Dingwaga di le diketekete morago ga moo, Jehofa o ne a bontsha gore o tsaya botshelo bo le botlhokwa thata fa a ne a naya Moshe Melao e e Lesome. Molao mongwe o ne o re: “O se ka wa bolaya motho.” (Duteronome 5:17) Fa motho a bolaya yo mongwe ka boomo, le ene o ne a bolawa.

5. Modimo o ikutlwa jang ka go senya mpa?

5 Modimo o ikutlwa jang ka kgang ya go senya mpa? Jehofa o tsaya botshelo jwa ngwana yo o iseng a tsholwe bo le botlhokwa fela thata. Molao wa ga Jehofa o ne o laela Baiseraele gore fa mongwe a ka gobatsa mosadi yo o moimana mme ngwana wa gagwe a bo a tlhokafala, motho yoo le ene o ne a tshwanetse go bolawa. (Bala Ekesodo 21:22, 23; Pesalema 127:3) Seno se re bontsha gore go senya mpa go phoso.—Bona Ntlha e e Kwa Bofelong ya 28.

6, 7. Re bontsha Jehofa jang gore re tsaya botshelo bo le botlhokwa thata?

6 Re ka bontsha Jehofa jang gore re tlotla botshelo jwa rona mmogo le jwa batho ba bangwe? Ka go tila go dira sepe fela se se ka tsenyang botshelo jwa rona kgotsa jwa batho ba bangwe mo kotsing. Ka jalo, ga re kitla re dirisa motsoko kgotsa diokobatsi ka gonne re a itse gore di ka re gobatsa le e leng go re bolaya.

7 E re ka Modimo e le ene a re neileng botshelo, re tshwanetse go tshela ka tsela e a e batlang. Ke ka moo re tshwanetseng go tlhokomela mebele ya rona. Fa re sa dire jalo, re tla nna leswe mo matlhong a Modimo. (Baroma 6:19; 12:1; 2 Bakorintha 7:1) Re ka se ka ra re re baobamedi ba ga Jehofa mme gone re sa batle go leba botshelo ka tsela e a bo lebang ka yone. Le fa go ka nna thata go tlogela mekgwa mengwe e e sa siamang, Jehofa o tla re thusa fa re tsaya matsapa ka gonne a bona gore re tsaya botshelo bo le botlhokwa thata.

8. Ke eng se re tshwanetseng go se dira go tlhomamisa gore ga re tsenye botshelo jwa rona kgotsa jwa batho ba bangwe mo kotsing?

 8 Re ithutile gore botshelo ke mpho e e botlhokwa thata. Jehofa o a itse gore re tla dira sotlhe se re ka se kgonang go tlhomamisa gore ga re tsenye botshelo jwa rona kgotsa jwa batho ba bangwe mo kotsing. Re dira seno ka go ela tlhoko tsela e re kgweetsang ka yone. Re tila metshameko e e kotsi kgotsa e e tletseng thubakanyo. (Pesalema 11:5) Gape re tlhomamisa gore matlo a rona a babalesegile. Jehofa o ne a laela Baiseraele a re: “Fa go direga gore o age ntlo e ntšha, o direle borulelo jwa gago lobotana lo lo thekeletsang, gore o se ka wa tlisetsa ntlo ya gago molato wa madi ka gonne mongwe yo o wang a ka nna a wa mo go yone.”—Duteronome 22:8.

9. Re tshwanetse go tshwara diphologolo jang?

9 Tota le tsela e re tshwarang diphologolo ka yone e bontsha gore re tlotla botshelo. Jehofa o re letleletse gore re bolaye diphologolo fa e le gore re tlile go ja nama kgotsa go dirisa letlalo la tsone e bile a re re di bolaye fa di batla go re gobatsa. (Genesise 3:21; 9:3; Ekesodo 21:28) Mme gone, ga re a tshwanela go sotla diphologolo kgotsa go di bolaela monate fela.—Diane 12:10.

TLOTLA MADI

10. Re itse jang gore madi ke botshelo?

10 Jehofa o tsaya madi a le boitshepo ka gonne madi ke botshelo. Fa Kaine a sena go bolaya Abele, Jehofa o ne a mo raya a re: “Madi a ga monnao a goela kwa go nna go tswa mo mmung.” (Genesise 4:10) Madi ke botshelo, ke ka moo Jehofa a neng a otlhaya Kaine ka go bo a bolaile Abele. Morago ga Morwalela wa motlha wa ga Noa, Jehofa o ne a bontsha gape gore madi ke botshelo. Jehofa o ne a letlelela Noa le ba lelapa la gagwe gore ba je nama ya diphologolo. O ne a re: “Phologolo nngwe le nngwe e e tsamayang  e e tshelang e ka nna ya nna dijo tsa lona. Jaaka go ntse ka dimela tse di tala, ke di lo naya tsotlhe.” Mme go na le selo se le sengwe se Jehofa a neng a ba laela gore ba se ka ba se ja, o ne a re: “Fela nama e e nang le moya wa yone—madi a yone—lo se ka lwa e ja.”—Genesise 1:29; 9:3, 4.

11. Ke taelo efe e Modimo a neng a e naya setšhaba sa Iseraele malebana le madi?

11 Dingwaga di ka nna 800 fa Jehofa a sena go laela Noa gore a se ka a ja madi, o ne a laela batho ba gagwe a re: “Fa e le motho ope wa bomorwa Iseraele kgotsa moagi mongwe wa moeng yo o agileng e le moeng mo gare ga lona yo e reng fa a tsoma a ba a tshwara phologolo ya naga kgotsa nonyane e e ka jewang, foo a a tsholole madi a yone a a bipe ka lorole.” Morago ga moo o ne a re: “Lo se ka lwa ja madi.” (Lefitiko 17:13, 14) Jehofa o ne a batla gore batho ba gagwe ba tlhaloganye gore madi a boitshepo. Ba ne ba ka nna ba ja nama e seng madi. Fa ba bolaya phologolo e ba tlileng go e ja, ba ne ba tshwanetse go tshololela madi a yone mo mmung.

12. Bakeresete ba leba madi jang?

12 Dingwaga di le mmalwa morago ga loso lwa ga Jesu, baaposetoloi mmogo le banna ba bagolwane ba ne ba kopana kwa Jerusalema go tla go dira tshwetso ya gore ke dikarolo dife tsa Molao wa ga Moshe tse Bakeresete ba neng ba sa ntse ba tlhoka go di latela. (Bala Ditiro 15:28, 29; 21:25.) Jehofa o ne a ba thusa gore ba tlhaloganye gore o sa ntse a tsaya madi a le botlhokwa le gore le bone ba ne ba tshwanetse go a tsaya a le boitshepo. Bakeresete ba bogologolo ba ne ba sa tshwanela go ja le go nwa madi kgotsa go ja nama ya phologolo e e sa tshololwang madi sentle. Fa ba ne ba ka tlola taelo eo, go ne go tshwana le fa ba obamela medingwana kgotsa ba akafala. Fa e sa le go tloga ka  nako eo, Bakeresete ba boammaaruri ba gana go ja kgotsa go nwa madi. A jaanong dilo di fetogile? Nnyaa, Jehofa o sa ntse a batla gore re tseye madi a le boitshepo.

13. Ke eng fa Bakeresete ba sa dumele go tshelwa madi?

13 A seno se raya gore Bakeresete ba tshwanetse go gana go tshelwa madi? Ee, go ntse jalo. Jehofa a re re se ka ra ja kgotsa ra nwa madi. Fa ngaka e ne e ka go laela gore o se ka nwa bojalwa, a o ne o tla bo tsenya mo mmeleng wa gago ka lemao? Nnyaa! Ka tsela e e tshwanang, taelo ya gore re se ka ra ja kgotsa ra nwa madi e kaya gore ga re a tshwanela go tshelwa madi.—Bona Ntlha e e Kwa Bofelong ya 29.

14, 15. Go botlhokwa go le kana kang gore Mokeresete a tlotle botshelo le go ikobela Jehofa?

14 O ne o tla dira eng fa ngaka e ka go raya e re o tlile go swa fa o sa tshelwe madi? Mongwe le mongwe o tshwanetse go itirela tshwetso ya gore a o tla ikobela taelo ya Modimo kana jang. Bakeresete ba tlotla mpho ya botshelo e bile ba ka dira sengwe se le sengwe se se tlhokegang gore ba nne ba tshela mme gone ga ba kitla ba dumela go tshelwa madi.

15 Re leka ka thata gore re nne le botsogo jo bo siameng mme ga re dumele go tshelwa madi ka gonne re a itse gore botshelo bo botlhokwa thata mo Modimong. Go botlhokwa gore re ikobele melao ya ga Jehofa go na le go leka go lelefatsa botshelo jwa rona ka go tlola melao ya gagwe. Jesu o ne a re: ‘Le fa e le mang yo o batlang go boloka botshelo jwa gagwe bo tla mo latlhegela mme le fa e le mang yo o latlhegelwang ke botshelo jwa gagwe ka ntlha ya me o tla bo bona.’ (Mathaio 16:25) Re ikobela Jehofa ka gonne re mo rata. O itse se se re siametseng mme fela jaaka ene, le rona re tsaya botshelo bo le botlhokwa e bile bo le boitshepo.—Bahebera 11:6.

16. Ke eng fa batlhanka ba Modimo ba mo ikobela?

 16 Batlhanka ba ba ikanyegang ba Modimo ba ikemiseditse go ikobela molao wa Modimo o o malebana le madi. Ga ba kitla ba ja kgotsa go nwa madi e bile ga ba kitla ba dumela go tshelwa madi. * Mme ba amogela mekgwa e mengwe ya kalafi e e ka ba thusang gore ba nne ba tshela. Ba a itse gore Mmopi o itse se se re siametseng. A o dumela gore Modimo o itse se se go siametseng?

TSELA YA GO DIRISA MADI E JEHOFA A E AMOGELANG

17. Ke tsela efe ya go dirisa madi e Jehofa a neng a e letleletse kwa Iseraele?

17 Mo Molaong o Modimo a neng a o naya Moshe, go na le karolo e e reng: “Moya wa nama o mo mading, mme nna ka bonna ke a lo beetse mo sebesong gore lo direle meya ya lona tetlanyo, ka gonne madi ke one a dirang tetlanyo ka moya o o mo go one.” (Lefitiko 17:11) Fa Moiseraele a ne a leofile, o ne a ka kopa Jehofa gore a mo itshwarele ka go tlhaba phologolo le go kopa moperesiti gore a kgatshe madi a yone mo aletareng e e mo tempeleng. Eno e ne le yone fela tsela ya go dirisa madi e Jehofa a neng a e letleletse.

18. Setlhabelo sa ga Jesu se dirile gore re nne le tshono efe?

18 Fa Jesu a sena go swa, o ne a fedisa molao oo wa go ntsha ditlhabelo tsa diphologolo mme a ntsha botshelo jwa gagwe kana madi a gagwe gore batho ba kgone go itshwarelwa maleo. (Mathaio 20:28; Bahebera 10:1) Botshelo jwa ga Jesu bo ne bo le botlhokwa thata jaana mo batho ba ileng ba nna le tshono ya go tshelela ruri fa Jehofa a sena go mo tsosetsa kwa legodimong.—Johane 3:16; Bahebera 9:11, 12; 1 Petere 1:18, 19.

O ka bontsha jang gore o tlotla botshelo le madi?

19. Re dira eng gore re nne “phepa mo mading a batho botlhe”?

 19 Ruri re leboga Jehofa go bo a re neile mpho eno ya botshelo! Mme re batla go bolelela batho gore fa ba dumela mo go Jesu, ba tla bona botshelo jo bo sa khutleng. Re rata batho e bile re tla dira sotlhe se re ka se kgonang go ba ruta kafa ba ka bonang botshelo ka gone. (Esekiele 3:17-21) Mme fela jaaka Paulo, le rona re tla kgona go bua re re: ‘Ke phepa mo mading a batho botlhe, gonne ga ke a ithiba go ba bolelela boikaelelo jotlhe jwa Modimo.’ (Ditiro 20:26, 27) Re bontsha gore re tlotla botshelo le madi ka go bolelela batho ka Jehofa le kafa a tsayang botshelo bo le botlhokwa ka gone.

^ ser. 16 Go bona tshedimosetso e e oketsegileng malebana le go tshelwa madi, bona tsebe 77-79 ya buka ya “Ipolokeng mo Loratong Lwa Modimo” e e gatisitsweng ke Basupi ba ga Jehofa.