Fetela kwa tshedimosetsong

Fetela go diteng

 KGAOLO 11

Ke Eng fa Batho ba Boga Thata Jaana?

Ke Eng fa Batho ba Boga Thata Jaana?

1, 2. Ke dipotso dife tse batho ba le bantsi ba ipotsang tsone?

TSUNAMI e senya motse. Monna o ganyaola batho ka tlhobolo mo kerekeng mme o gobatsa ba le mmalwa. Mmê o bolawa ke kankere mme bana ba gagwe ba batlhano ba sala e le masiela.

2 Fa dilo tse di ntseng jaana tse di utlwisang botlhoko di direga, batho ba le bantsi ba ipotsa gore ke eng di direga. Ba le bantsi ba ipotsa gore ke eng fa lefatshe le tletse letlhoo le pogo e e kana kana. A le wena o kile wa ipotsa dipotso tseo?

3, 4. (a) Habakuke o ne a botsa Modimo dipotso dife? (b) Jehofa o ne a mo araba a reng?

3 Baebele e na le dikai tsa batho ba ba ileng ba botsa Modimo dipotso tse di tshwanang le tseo. Ka sekai, moporofeti Habakuke o ne a botsa Jehofa a re: “Ke ka ntlha yang fa o dira gore ke bone se se utlwisang botlhoko, mme o nnela go leba a e leng matshwenyego fela? Le gone ke ka ntlha yang fa thopo le thubakanyo di le fa pele ga me, mme ke ka ntlha yang fa go nna le komano, e bile ke ka ntlha yang fa go tsoga kgogakgogano?”—Habakuke 1:3.

4 Mo go Habakuke 2:2, 3 re bala ka karabo ya dipotso tse Habakuke a neng a di botsa Modimo le tsholofetso ya gore Modimo o tla tsaya kgato. Jehofa o rata batho fela thata. Baebele ya re: “O a lo kgathalela.” (1 Petere 5:7) Tota e bile, Modimo ga a rate go bona batho ba boga.  (Isaia 55:8, 9) A re tlotleng ka potso eno: Ke eng fa batho ba boga thata jaana?

KE ENG FA BATHO BA BOGA THATA JAANA?

5. Baruti ba bantsi ba reng fa batho ba boga? Baebele yone ya reng?

5 Gantsi fa batho ba boga, baruti le baeteledipele ba dikereke ba re ke thato ya Modimo. Fa motho a diragaletswe ke dilo tse di utlwisang botlhoko, bangwe ba re Modimo o sa le a rulagantse go sa le gale gore selo seo se direge le gore ga re kitla re tsamaya re tlhaloganya lebaka la go bo a dirile jalo. Bangwe ba dumela gore fa batho ba swa ba ya legodimong. Mme seo ga se boammaaruri. Jehofa ga se ene a bakang dilo tse di bosula. Baebele ya re: “A go nne kgakala le Modimo wa boammaaruri go dira ka boikepo, le Mothatayotlhe go dira ka tshiamololo!”—Jobe 34:10.

6. Ke eng fa batho ba le bantsi ba pega Modimo molato ka ntlha ya dilo tse di bosula tse di diregang mo lefatsheng?

6 Batho ba le bantsi ba pega Modimo molato ka ntlha ya dilo tse di diregang mo lefatsheng ka gonne ba akanya gore ke ene a laolang lefatshe. Mme Kgaolo 3 e re rutile gore Satane Diabolo ke ene a laolang lefatshe.

7, 8. Ke eng fa batho ba boga thata jaana?

7 Baebele ya re “lefatshe lotlhe le namaletse mo maatleng a yo o boikepo.” (1 Johane 5:19) Satane o setlhogo e bile o bogale. O ‘tsietsa lefatshe lotlhe le le nang le banni.’ (Tshenolo 12:9) Batho ba le bantsi ba tshwana le ene. Mme seo ke sone se dirang gore lefatshe le bo le tletse ka batho ba ba ratang maaka, ba ba letlhoo le ba ba setlhogo.

8 Go na le mabaka a mangwe a a dirang gore batho ba boge. Fa Adame le Efa ba sena go leofa, ba ne ba fetisetsa boleo mo baneng ba bone. Mme ka ntlha ya boleo, batho  ba bogisa batho ba bangwe. Gantsi ba batla go nna botoka mo go ba bangwe. Ba lwantsha ba bangwe ka maikaelelo a go ba kgerisa. (Moreri 4:1; 8:9) Ka dinako tse dingwe, batho ba welwa ke masetlapelo ka gonne “ba diragalelwa ke motlha le tiragalo e e sa bonelwang pele.” (Moreri 9:11) Ba tlhagelwa ke dikotsi ka gonne ba le mo lefelong le le sa siamang ka nako e e sa siamang.

9. Ke eng fa re ka tlhomamisega gore Jehofa o na le lebaka le le utlwalang tota la go bo a letleletse gore batho ba boge thata jaana?

9 Jehofa ga se ene a dirang gore batho ba boge. Ga re a tshwanela go mo pega molato wa dintwa, bokebekwa le tshiamololo e re e bonang mo lefatsheng. Ga se ene a dirang gore go nne le dithoromo tsa lefatshe, dikgwanyape le merwalela. Mme gone o ka ipotsa go re: ‘Fa e le gore Modimo o na le maatla a a fetang a sebopiwa sepe fela, ke eng a sa emise dilo tse di bosula?’ Re a itse gore Modimo o re rata fela thata, ka jalo, o tshwanetse a bo a na le lebaka le le utlwalang tota la go bo a letleletse gore batho ba boge botlhoko jaana.—1 Johane 4:8.

KE ENG FA MODIMO A LETLELETSE POGO?

10. Satane o ne a reng ka Jehofa?

10 Diabolo o ne a tsietsa Adame le Efa. Satane o ne a latofatsa Modimo gore ga a buse batho sentle. O ne a raya Adame le Efa a re Modimo o ba tima sengwe se se molemo. Satane o ne a batla gore ba dumele gore ene a ka ba busa botoka go na le Jehofa le gore tota ba ne ba sa tlhoke Modimo.—Genesise 3:2-5; bona Ntlha e e Kwa Bofelong ya 27.

11. Ke potso efe e re tlhokang go itse karabo ya yone?

11 Adame le Efa ba ne ba dumela Satane mme ba tsuologela Jehofa. Ba ne ba akanya gore ba na le tshwanelo ya go baya molao wa se se siameng le se se sa siamang. Jehofa o ne a ka dira eng go bontsha gore batsuolodi bano ba  ne ba le phoso le gore Modimo ke ene a itseng se se ba siametseng?

12, 13. (a) Ke eng fa Jehofa a sa senya Adame le Efa ka yone nako eo? (b) Ke eng fa Jehofa a letlile Satane gore a laole lefatshe le gore batho ba ipuse?

12 Jehofa ga a ka a fedisa Adame le Efa ka yone nako eo. Go na le moo, o ne a ba letla gore ba nne le bana. Go tswa foo, bana bao ba ne ba tla nna le tshono ya go itlhophela gore ba batla go busiwa ke mang. Boikaelelo jwa ga Jehofa e ne e le gore lefatshe le tlale ka batho ba ba se nang boleo mme bo ne bo tla diragala go sa kgathalesege se Diabolo a neng a leka go se dira.—Genesise 1:28; Isaia 55:10, 11.

13 Baengele ba ne ba le teng fa Satane a latofatsa Modimo. (Jobe 38:7; Daniele 7:10) Ka jalo, Jehofa o ne a naya Satane tshono ya go supa gore a se a se buang se boammaaruri kana jang. Gape Jehofa o ne a naya batho tshono ya gore le bone ba busiwe ke Satane go bona gore a ba ne ba tla atlega kwa ntle ga gore Modimo e nne ene a ba thusang.

14. Ke eng se se bontshang gore batho ga ba kgone go ipusa?

14 Batho ba lekile go ipusa ka lobaka lo loleele mme ba paletswe. Jono ke bosupi jwa gore Satane o ne a bua maaka. Batho ba tlhoka go thusiwa ke Modimo. Moporofeti Jeremia o ne a bua boammaaruri fa a re: “Ke itse sentle, tlhe Jehofa, gore tsela ya motho wa mo lefatsheng ga se ya gagwe. Ga se ga motho yo o tsamayang ka dinao go kaela dikgato tsa gagwe.”—Jeremia 10:23.

KE ENG FA JEHOFA A LETILE LOBAKA LO LO KANA KANA?

15, 16. (a) Ke eng fa Jehofa a letlile gore pogo e tswelele ka lobaka lo lo kana kana? (b) Ke eng fa Jehofa a sa thuse Satane go baakanya mathata a a a bakileng?

15 Ke eng fa Jehofa a letlile gore pogo e tswelele ka  lobaka lo lo kana kana? Ke eng a sa fedise bosula? Go re tshotse nako e ntsi gore re kgone go lemoga gore Satane o ne a bua maaka. Batho le bone ba lekile mefuta e e farologaneng ya dipuso mme ba paletswe. Le fa ba gatetse pele mo dilong tsa thekenoloji, go sa ntse go na le tshiamololo, lehuma, bokebekwa le dintwa go feta le fa e le leng pele. Ga re kgone go ipusa ntle le go kaelwa ke Modimo.

16 Le fa go ntse jalo, Jehofa a ka se thuse Satane go baakanya mathata a a a bakileng. Fa a ne a ka dira jalo, seo se tla bo se bontsha gore o mo ema nokeng, mme re a itse gore Modimo a ka se tsamaye a dira jalo. Fa a ka mo thusa, batho le bone ba ka nna ba akanya gore ba kgona go ipusa. Mme re a itse gore ba ka se kgone e bile Jehofa ga a kitla a ba ema nokeng. Modimo ga a bue maaka.—Bahebera 6:18.

17, 18. Jehofa o tla dira eng ka tshenyo yotlhe e e bakilweng ke Satane?

17 A Jehofa o kgona go baakanya tshenyo yotlhe e e bakilweng ke botsuolodi jwa ga Satane le batho? Ee. Modimo ga a palelwe ke sepe. Jehofa o itse nako e a tla arabang ditatofatso tsotlhe tsa ga Satane ka yone. Go tswa foo, o tla dira gore lefatshe e nne paradaise fela jaaka a ne a ikaeletse kwa tshimologong. Batho ba ba mo “mabitleng a kgakologelo” ba tla tsosiwa. (Johane 5:28, 29) Batho ga ba kitla ba tsamaya ba lwala kgotsa ba swa. Jesu o tla baakanya tshenyo yotlhe e e bakilweng ke Satane. Jehofa o tla dirisa Jesu go “senya ditiro tsa ga Diabolo.” (1 Johane 3:8) Re leboga tota go bo gone jaanong Jehofa a le pelotelele le rona e re ka re kgona go mo itse le go dira tshwetso ya gore re batla e nne ene a re busang. (Bala 2 Petere 3:9, 10.) Tota le fa re boga, o re thusa  gore re kgone go itshoka.—Johane 4:23; bala 1 Bakorintha 10:13.

18 Jehofa ga a re pateletse gore re mo obamele. O re bopile re na le bokgoni jwa go itlhophela. A re bone gore bokgoni jono re ka bo dirisa jang.

O TLA DIRISA JANG BOKGONI JWA GO ITLHOPHELA?

19. Ke mpho efe e ntle e Jehofa a re neileng yone? Ke eng fa re tshwanetse go e lebogela?

19 Bokgoni jwa go itlhophela jo Jehofa a re bopileng re na le jone, bo dira gore re farologane le diphologolo. Tsone di dira dilo go ya go ka tlholego mme rona re kgona go itlhophela gore re batla go tshela jang le gore a re batla go itumedisa Jehofa kana jang. (Diane 30:24) Gape ga re tshwane le metšhine e e bolelelwang gore e dire eng. Re na le kgololesego ya go itlhophela gore re batla go tshela jang, re batla go tsalana le bomang le gore re batla go dira eng mo botshelong. Jehofa o batla gore re itumelele botshelo.

20, 21. Ke tshwetso efe ya botlhokwa e o ka e dirang gone jaanong?

20 Jehofa o batla gore re mo rate. (Mathaio 22:37, 38) O tshwana le rre yo o itumelang thata fa a utlwa ngwana wa gagwe a mmolelela gore o a mo rata mme a bua jalo go tswa pelong e seng a patelediwa. Jehofa o re neile kgololesego ya go itlhophela gore a re batla go mo direla kana jang. Satane, Adame le Efa ba ile ba tlhopha go latlha Jehofa. Wena o tla tlhopha go dira eng?

21 Tlhopha go direla Jehofa. Go na le batho ba le dimilione ba ba ileng ba tlhopha go itumedisa Modimo e seng Satane. (Diane 27:11) Ke eng se o tshwanetseng go se dira gone jaanong gore o nne teng fa Modimo a fedisa pogo yotlhe? Kgaolo e e latelang e tla araba potso eno.