Iceland

Mexico

Guinea-Bissau

Philippines

A o etse tlhoko mo ditshwantshong tse di mo boroutšhareng jono kafa Basupi ba ga Jehofa ba aparang sentle ka gone fa ba ya kwa dipokanong tsa bone tsa phuthego? Ke ka ntlha yang fa re le kelotlhoko gore re apara le go ipaakanya jang?

Go bontsha gore re tlotla Modimo wa rona. Ke boammaaruri gore Modimo ga a tlhome mogopolo mo tseleng e re lebegang ka yone ka fa ntle. (1 Samuele 16:7) Le fa go ntse jalo, fa re kopana go tla go mo obamela, keletso ya rona e kgolo ke go bontsha gore re tlotla Jehofa le baobamedi mmogo le rona. Fa re ne re ka lalediwa go ya go ema fa pele ga moatlhodi kwa kgotlatshekelo, re ne re tla nna kelotlhoko gore re lebega jang gonne re batla go mmontsha tlotlo. Ka tsela e e tshwanang, tsela e re lebegang ka yone fa re le kwa dipokanong tsa rona, e bontsha gore re tseela “Moatlhodi wa lefatshe lotlhe,” e bong Jehofa Modimo kwa godimo e bile re tseela lefelo le re obamelang mo go lone kwa godimo.—Genesise 18:25.

Go bontsha gore re tshela ka melao e e ntseng jang. Baebele e kgothaletsa Bakeresete go apara “ka boingotlo le go itekanela sentle ga mogopolo” go bontsha gore ba “tlotla Modimo.” (1 Timotheo 2:9, 10) Go apara “ka boingotlo” go kaya go tila go apara diaparo tse di lebisang tlhokomelo thata mo go rona, tse di kgopisang ba bangwe kgotsa tse di bonaletsang. Gape go “itekanela sentle ga mogopolo” go re thusa go tlhopha diaparo tse di siameng, tse di seng botlhaswa kgotsa tse di re lekanang sentle. Le fa gone re na le melaometheo eno, re sa ntse re ka kgona go itlhophela diaparo tse re di ratang. Tsela e ntle le e e kgatlhang e re lebegang ka yone e ka ‘kgabisa thuto ya Mmoloki wa rona’ ya bo ya ‘galaletsa Modimo.’ (Tito 2:10; 1 Petere 2:12) Go apara sentle fa re ya dipokanong, go tla tlhotlheletsa tsela e ba bangwe ba lebang kobamelo ya ga Jehofa ka yone.

O se ka wa tshaba go tla kwa Holong ya Bogosi gonne o akanya gore ga o na diaparo tse di tshwanetseng. Ga o tlhoke diaparo tse di turang kgotsa tsa maemo a a kwa godimo gore o tshwanelege, o nne phepa o bo o lebege sentle.

  • Tsela e re aparang ka yone fa re obamela Modimo e botlhokwa go le kana kang?

  • Ke melaometheo efe e e re kaelang fa re tlhopha tsela e re aparang le e re ipaakanyang ka yone?