Fetela kwa tshedimosetsong

Fetela go diteng

 THUTO 3

Boammaaruri Jwa Baebele bo ne Jwa Senolwa Jang Gape?

Boammaaruri Jwa Baebele bo ne Jwa Senolwa Jang Gape?

Baithuti ba Baebele, ka bo1870

Kgatiso ya ntlha ya The Watchtower, ka 1879

Tora ya Tebelo gompieno

Baebele e ne ya bolelela pele gore morago ga loso lwa ga Keresete, go ne go tla nna le barutisi ba maaka mo Bakereseteng ba ntlhantlha mme ba sokamise boammaaruri jwa Baebele. (Ditiro 20:29, 30) Fa nako e ntse e ya, go ne ga direga sone seo. Ba ne ba kopanya dithuto tsa ga Jesu le dikgopolo tsa ditumelo tsa boheitane, mme go ne ga nna le Bokeresete jo e seng jwa boammaaruri. (2 Timotheo 4:3, 4) Gompieno re ka tlhomamisega jang gore re tlhaloganya sentle se tota Baebele e se rutang?

Go ne ga tla nako ya gore Jehofa a senole boammaaruri. O ne a bolelela pele gore mo ‘motlheng wa bokhutlo, kitso ya boammaaruri e tla nna ntsi.’ (Daniele 12:4) Ka 1870, setlhopha se sennye sa batho ba ba neng ba batla boammaaruri se ne sa lemoga gore bontsi jwa dithuto tsa kereke di ne di sa tswe mo Dikwalong. Ka jalo, ba ne ba simolola go batla tsela e e tla ba thusang go tlhaloganya dithuto tsa ntlhantlha tsa Baebele, mme Jehofa o ne a ba thusa go tlhaloganya Dikwalo.

Banna ba ba peloephepa ba ne ba ithuta Baebele ka kelotlhoko. Baithuti bao ba ba tlhoafetseng ba Baebele, ba ba nnileng gone pele ga rona, ba ne ba latela mokgwa wa go ithuta Baebele o re sa ntseng re o dirisa le gompieno. Ba ne ba ithuta dikgang tse di farologaneng tse di tswang mo Baebeleng. Fa ba sa tlhaloganye kgang nngwe mo Baebeleng, ba ne ba batla ditemana tse dingwe tse di tlhalosang kgang eo. Fa ba ne ba dira tshwetso ya gore kgang eo e dumalana le Dikwalo tse dingwe tsotlhe, ba ne ba e kwala. Ka go dira gore Baebele e itlhalose, ba ne ba senola gape boammaaruri ka leina la Modimo le Bogosi jwa gagwe, boikaelelo jwa gagwe ka batho le lefatshe, boemo jwa baswi le tsholofelo ya tsogo ya baswi. Dipatlisiso tse ba neng ba di dira di ne tsa ba golola mo ditumelong le mo ditlwaelong di le dintsi tsa maaka.—Johane 8:31, 32.

Ka 1879 Baithuti ba Baebele ba ne ba lemoga gore nako e gorogile ya gore boammaaruri bo itsisiwe batho botlhe. Ka jalo mo go one ngwaga oo, ba ne ba simolola go gatisa makasine o re sa ntseng re o gatisa le gompieno, Tora ya Tebelo e Itsise Bogosi Jwa ga Jehofa. Gone jaanong re ithuta boammaaruri jwa Baebele le batho mo dinageng di le 240 ka dipuo tse di fetang 750. Ga go ise go ke go direge gore kitso ya boammaaruri e aname thata jaana!

  • Morago ga loso lwa ga Keresete, go ne ga direga eng ka boammaaruri jwa Baebele?

  • Ke eng se se re thusitseng go senola gape boammaaruri jo bo mo Lefokong la Modimo?