Fetela kwa tshedimosetsong

Fetela go diteng

 KAROLO 22

Baaposetoloi ba Rera ka Bopelokgale

Baaposetoloi ba Rera ka Bopelokgale

Phuthego ya Bokeresete e gola ka lobelo lo logolo le fa gone ba bogisiwa

MALATSI a le lesome Jesu a sena go tlhatlogela kwa legodimong, barutwa ba gagwe ba ka nna 120 ba ne ba kopana mo ntlong kwa Jerusalema ka nako ya Moletlo wa Bajuda wa Pentekosete, ka 33 C.E. Ka tshoganetso fela, ntlo e ba neng ba le mo go yone e nna le modumo o e keteng wa phefo e e fokang. Go direga sengwe se se gakgamatsang; barutwa ba simolola go bua ka dipuo tse ba sa di itseng. Ke eng se se bakileng ditiragalo tseno tse di gakgamatsang? Modimo o ne a neile barutwa moya wa gagwe o o boitshepo.

Kwa ntle ga ntlo eo, go ne go na le boidiidi jwa baeng ba ba tswang kwa dinageng di le dintsi ba ba tlileng moletlong. Batho bao ba ne ba gakgamala thata fa ba utlwa barutwa ba ga Jesu ba kgona go bua dipuo tsa bone sentle. Fa Petere a tlhalosa se se diragetseng, o ne a umaka boporofeti jwa ga Joele jo bo reng Modimo o tla ‘tsholola’ moya wa gagwe, mme ba moya oo o tsholotsweng mo go bone ba tla nna le dimpho tsa go dira dikgakgamatso. (Joele 2:28, 29) Bosupi jono jo bo maatla jwa moya o o boitshepo bo ne bo bontsha sentle gore go diregile phetogo nngwe e e botlhokwa: Modimo o ne a tlogela Iseraele mme a tlhoma mogopolo mo phuthegong ya Bokeresete e e sa tswang go tlhomiwa. Jaanong batho ba ba batlang go direla Modimo ka tsela e a e amogelang ba ne ba tshwanetse go nna balatedi ba ga Keresete.

Mo go yone nako eo, kganetso e ne ya gakala, mme baba ba latlhela barutwa mo kgolegelong. Mo gare ga bosigo, moengele wa ga Jehofa o ne a bula dikgoro tsa kgolegelo mme a laela barutwa gore ba tswelele ba rera. Fa letsatsi le tlhaba, ba ne ba dira fela jalo. Ba ne ba tsena mo tempeleng mme ba simolola go ruta batho ka dikgang tse di molemo ka Jesu. Batho ba bodumedi ba ba neng ba ba ganetsa, ba ne ba tuka bogale mme ba ba laela gore ba tlogele go rera. Baaposetoloi ba ne ba araba jaana ka bopelokgale: “Re tshwanetse go utlwa Modimo e le mmusi bogolo go batho.”—Ditiro 5:28, 29.

Pogiso e ne ya oketsega. Bajuda bangwe ba ne ba latofatsa morutwa mongwe yo o bidiwang Setefane ka gore o a tlhapatsa mme ba mo kgobotletsa ka maje go fitlha a swa. Lekawana lengwe—Saulo wa Tareso—le ne le ntse le lebile fela mme le kgothaletsa gore Setefane a bolawe. Go tswa foo le ne la ya kwa Damaseko gore le ye go golega ope fela yo e neng e le molatedi wa ga Keresete. Fa Saulo a ntse a le mo tseleng, lesedi le le tswang legodimong le ne la phatsima go mo dikologa mme lentswe la mo raya la re: “Saulo, Saulo, o mpogisetsang?” Saulo yo o neng a foufaditswe ke lesedi leo o ne a botsa a re: “O mang?” Lentswe le ne la araba la re: “Ke nna Jesu.”—Ditiro 9:3-5.

Malatsi a le mararo morago ga moo, Jesu o ne a romela morutwa mongwe yo o bidiwang Ananiase kwa go Saulo gore a mo foufolole. Saulo o ne a kolobediwa mme a simolola go rera ka bopelokgale ka Jesu. Saulo o ne a simolola go bidiwa moaposetoloi Paulo mme a nna leloko le le tlhagafetseng la phuthego ya Bokeresete.

Barutwa ba ga Jesu ba ne ba ntse ba rera dikgang tsa Bogosi jwa Modimo mo Bajudeng le mo Basamareeng fela. Jaanong moengele o ne a bonala mo monneng mongwe yo o bidiwang Korenelio, yo o neng a boifa Modimo e bile e le molaodi wa masole a Roma, mme a mmolelela gore a ye go bitsa moaposetoloi Petere. Petere yo o neng a na le batho ba bangwe o ne a rerela Korenelio le ba ntlo ya gagwe. Fa Petere a ntse a bua, moya o o boitshepo o ne wa tshololelwa badumedi bao ba Baditšhaba, mme moaposetoloi Petere o ne a laela gore ba kolobediwe mo leineng la ga Jesu. Jaanong batho ba ditšhaba tsotlhe ba ne ba ka bona botshelo jo bo sa khutleng. Phuthego e ne e ipaakanyeditse go rera dikgang tse di molemo le kwa mafelong a a kgakala.

—E tswa mo go Ditiro 1:1–11:21.