Fetela kwa tshedimosetsong

Fetela go diteng

 POLELO 15

Mosadi wa ga Lote O ne A Gadima Kwa Morago

Mosadi wa ga Lote O ne A Gadima Kwa Morago

LOTE le ba lelapa la gagwe ba ne ba nna mmogo le Aborahame mo lefatsheng la Kanana. Letsatsi lengwe Aborahame o ne a raya Lote a re: ‘Ga go na lefatshe le le lekaneng diphologolo tsa rona tsotlhe. Tsweetswee, a re kgaogane. Fa o ya ntlheng e nngwe, ke tla ya kwa go e nngwe.’

Lote o ne a tlhatlhoba lefatshe. O ne a bona karolo e ntle ya naga e e nang le metsi le bojang jo bontsi go ka tlhokomela diphologolo tsa gagwe. Eno e ne e le Kgaolo ya Joredane. Ka jalo, Lote o ne a fudusetsa lelapa la gagwe le diphologolo tsa gagwe teng. Kgabagare ba ne ba aga mo motseng wa Sodoma.

Batho ba Sodoma ba ne ba le bosula tota. Seno se ne sa hutsafatsa Lote ka gonne e ne e le monna yo o siameng. Modimo le ene o ne a hutsafala. La bofelo Modimo o ne a romela baengele ba babedi go itsise Lote gore o tlile go senya Sodoma le motse o o bapileng le one wa Gomora ka ntlha ya bosula jwa bone.

Baengele ba ne ba raya Lote ba re: ‘Itlhaganele! Tsaya mosadi wa gago le bomorwadio ba babedi mme lo tswe fano!’ Lote le ba lelapa la gagwe ba ne ba nnela go diega, mme baengele ba ba tshwara ka diatla ba ba ntshetsa kwa ntle ga motse. Go tswa foo, mongwe wa baengele o ne a re: ‘Tshabang, bolokang matshelo a lona! Lo se ka lwa gadima kwa morago. Tshabelang kwa dithabeng, gore lo se ka lwa bolawa.’

Lote le bomorwadie ba ne ba nna kutlo mme ba tshaba mo Sodoma. Ga ba a ka ba ema le fa e le ka nakwana, e bile ga ba a ka ba gadima kwa morago. Mme mosadi wa ga Lote ene ga a ka a nna kutlo. Fa ba sena go tsamaya sekgalanyana go tswa mo Sodoma, o ne a ema mme a gadima kwa morago. Mosadi wa ga Lote o ne a fetoga pilara ya letswai. A o a mmona mo setshwantshong?

Re ka ithuta thuto ya botlhokwa mo pegong eno. E re bontsha gore Modimo o boloka ba ba mo ikobelang mme ba ba sa mo ikobeleng ba tla latlhegelwa ke matshelo a bone.