Fetela kwa tshedimosetsong

Fetela go diteng

 THUTO 56

Josia O ne A Rata Molao wa Modimo

Josia O ne A Rata Molao wa Modimo

Josia o ne a nna kgosi ya Juda fa a na le dingwaga di le robedi. Ka nako eo, batho ba ne ba dira boselamose e bile ba obamela medimo ya ditshwantsho. Fa Josia a na le dingwaga di le 16, o ne a leka go obamela Jehofa ka tsela e e siameng. Fa a na le dingwaga di le 20, o ne a simolola go fedisa medimo ya ditshwantsho le dibeso tsa yone mo nageng yotlhe. Mme e rile a na le dingwaga di le 26, o ne a rulaganya gore tempele ya ga Jehofa e baakanngwe.

Moperesiti yo mogolo e bong Hilekia o ne a bona lokwalo lwa Molao wa ga Jehofa mo tempeleng. Lokwalo loo lo ka tswa lo ne lo kwadilwe ke Moshe. Mokwaledi wa kgosi e bong Shafane o ne a tlisa lokwalo loo kwa go Josia a bo a lo balela kwa godimo. Fa Josia a ntse a reeditse, o ne lemoga gore batho ba feditse dingwaga di le dintsi ba sa reetse Jehofa. Kgosi Josia o ne a raya Hilekia a re: ‘Jehofa o re galefetse. Tsamaya o ye go bua le ene. Jehofa o tla re bolelela se re tshwanetseng go se dira.’ Jehofa o ne araba a dirisa moporofeti wa mosadi e bong Huleda a re: ‘Batho ba Juda ba ntlogetse. Ke tlile go ba otlhaya mme eseng fa Josia e sa ntse e le kgosi ka gonne ga a mabela.’

Fa Kgosi Josia a utlwa molaetsa ono, o ne a ya kwa tempeleng a bo a phutha batho ba Juda. Go tswa foo o ne a balela Molao wa ga Jehofa kwa godimo. Batho ba ne ba solofetsa gore ba tla reetsa Jehofa ka botlalo.

 Go ne go fetile dingwaga di le dintsi Bajuda ba sa keteke moletlo wa Tlolaganyo. Mme fa Josia a utlwa Molao o re ba tshwanetse go keteka moletlo wa Tlolaganyo ngwaga le ngwaga, o ne a raya setšhaba seo a re: ‘Re tla keteka moletlo wa ga Jehofa wa Tlolaganyo.’ Go tswa foo Josia o ne a baakanya ditlhabelo tse dintsi a bo a dira gore go nne le baopedi kwa tempeleng. Setšhaba se ne sa keteka moletlo wa Tlolaganyo, go tswa foo ba bo ba keteka Moletlo wa Senkgwe Se se Sa Bedisiwang o o tshotseng malatsi a le supa. Tlolaganyo eno e ne e le kgolo go di gaisa tsotlhe tse di nnileng gone fa Samuele a sena go swa. Josia o ne a rata Molao wa Modimo thata. A o itumelela go ithuta ka Jehofa?

“Lefoko la gago ke lobone lwa lonao lwa me, le lesedi la tselana ya me.”—Pesalema 119:105