Fetela kwa tshedimosetsong

Fetela go diteng

 INDONESIA

Morwadie Sara

Titi Koetin

Morwadie Sara
  • O TSHOTSWE KA 1928

  • O KOLOBEDITSWE KA 1957

  • DINTLHA KA GA GAGWE Kgaitsadi yo o neng a dirisa botlhale go thusa monna wa gagwe go amogela boammaaruri le fa a ne a mo ganetsa.—Pego ka morwawe, Mario Koetin.

MMÈ e ne e le motho yo o botsalano, yo o ratang batho e bile a rata Baebele. E rile a kopana le Gertrud Ott, morongwa kwa Manado, Sulawesi Bokone, ga a ka okaoka go ithuta Baebele mme a nna Mosupi wa ga Jehofa. Le fa go ntse jalo, rre e bong Erwin, yo o neng a itsege ka tiro ya gagwe ya kwa bankeng mme moragonyana a nna modulasetulo wa Jakarta Stock Exchange, o ne a mo ganetsa botlhoko.

Letsatsi lengwe, rre o ne a re Mmè a tlhophe fa gare ga dilo tse pedi.

O ne a bua jaana a tuka bogale: “Itlhophele gore a o batla bodumedi jwa gago kgotsa monna wa gago!”

Mmè o ne a e jela marapo a tlhogo. Go tswa foo, a bo a re: “Ke di batla tsoopedi—monna wa me le Jehofa.”

Karabo ya gagwe e ne ya tswala rre molomo a bo a busa pelo.

E re ka rre a ne a mo rata fela thata e bile a anaanela botlhale le temogo ya gagwe, fa nako e ntse e ya o ne a kgona go mo itshokela.

 Le fa go ntse jalo, mmè ene o ne a batla gore ba obamele Modimo wa boammaaruri mmogo. Morago ga go rapela ka kgang eno ka botswapelo, o ne a gakologelwa gore rre o rata go ithuta dipuo tse dingwe. Ka jalo, o ne a kwala ditemana tsa Seesemane a bo a di baya mo di bonalang teng mo ntlong. O ne a raya rre a re: “Ke batla go ithuta Seesemane.” Fa a lemoga gore rre o rata go reetsa batho ba bua phatlalatsa, o ne a mo kopa gore a mo thuse go baakanyetsa dipuo tsa Sekolo sa Bodiredi. Rre o ne a dumela. E re ka rre a ne a na le moya wa go tshola baeng, mmè o ne a mo kopa gore ba amogele molebedi wa potologo. Ga a ka a gana. Gape mmè o ne a itse gore rre o rata lelapa la gagwe, ka jalo o ne a mmotsa gore go ka nna jang fa a ka ya kopanong le rona gore re kgone go nna mmogo. Rre o ne a dira jalo.

Fa nako e ntse e tsamaya, bopelotelele le botlhale jwa ga mmè di ne tsa nolofatsa pelo ya ga rre. Moragonyana fa re sena go fudugela kwa England, rre o ne a simolola go ya dipokanong a bo a tsalana le John Barr, yo o neng a nna leloko la Setlhopha se se Laolang sa Basupi ba ga Jehofa. Mo go one ngwaga oo, rre o ne a kolobediwa mme seno se ne sa tlisetsa mmè boitumelo jo bo seng kana ka sepe. Mo dingwageng tse di neng tsa latela, lorato lo rre a neng a mo rata ka lone lo ne lwa gola.

Mmè e ne e le mosadi yo o boitsheko, yo o nang le tlotlo e bile a rata Jehofa ka pelo yotlhe mme sekao sa gagwe se ne sa kgothatsa botlhe ba ba neng ba mo itse

Ditsala dingwe tsa rona di tshwantsha mmè le Lidia, mosadi wa Mokeresete wa lekgolo la ntlha la dingwaga yo o neng a na le moya wa go tshola baeng. (Dit. 16:14, 15) Mme nna gantsi ke mo tshwantsha le Sara, yo o neng a se na bothata le go ikobela monna wa gagwe e bong Aborahame. (1 Pet. 3:4-6) Mmè e ne e le mosadi yo o boitsheko, yo o nang le tlotlo e bile a rata Jehofa ka pelo yotlhe mme sekao sa gagwe se ne sa kgothatsa botlhe ba ba neng ba mo itse. Mme gape se ne sa thusa rre go amogela boammaaruri. Tota go ya ka nna, mmè e ne e le morwadie Sara.