Fetela kwa tshedimosetsong

Fetela go diteng

 INDONESIA

Kgabagare re Kopane!

Pego ka Linda le Sally Ong

Kgabagare re Kopane!

Linda: Fa ke na le dingwaga di le 12, mmè o ne a mpolelela gore ke na le nnake yo o ileng a newa batsadi ba bangwe gore ba mo godise. Ke ne ke ipotsa gore a le ene o tshotswe a sa utlwe mo ditsebeng. Le fa go ntse jalo, ke godile ke sa mo itse.

Sally: Ke ne ke sa itse gore batsadi ba ba nkgodisitseng ga se batsadi ba me ba nama le madi. Mmè yo o nkgodisitseng o ne a mpetsa setlhogo e bile a ntirile lekgoba, ka jalo ke godile ke hutsafetse, ke jewa ke bodutu—sengwe se se utlwisang botlhoko mo godimo ga go tsholwa o sa utlwe mo ditsebeng. Ke ne ka kopana le Basupi ba ga Jehofa ke bo ke simolola go ithuta Baebele. E rile mmè a lemoga seo, o ne a mpetsa ka lebante a bo a tsenya dilloko tse disha gore a ntotlelele mo ntlung. Fa ke na le dingwaga di le 20, ke ne ka ngwega kwa gae ke bo ke ya go nna le Basupi. Fa 2012 e roga, ke ne ka kolobediwa.

 Linda: Fa ke na le dingwaga tse 20, ke ne ka simolola go ithuta le Basupi ba ga Jehofa. Moragonyana ke ne ka simolola go ya dikopanong tsa kgaolo kwa Jakarta. Dipuo di ne di tolokiwa ka puo ya diatla. Fa ke le koo, ke ne ka kopana le batho ba bangwe ba ba sa utlweng mo ditsebeng, go akaretsa le Sally, mosetsana wa Mosupi yo o neng a nna kwa Sumatra Bokone. Ke ne ke ikutlwa ke atamalane thata le ene mme ke sa itse gore go bakiwa ke eng.

Sally: Nna le Linda re ne ra nna ditsala tota. Ke ne ke bona e kete re a tshwana mme ga ke a ka ka isa kgang eo tlhogong.

Linda: Ka August 2012, letsatsi pele ke kolobediwa, ke ne ke na le keletso ya go batla nnake. Ke ne ka kopa Jehofa jaana ka thapelo: “Ke kopa o nthuse tlhe gore ke kopane le nnake, ke batla go mmolelela ka wena.” Moragonyana, mmè o ne a amogela molaetsa a sa solofela go tswa kwa mongweng yo o itseng sengwe ka nnake. Tsela ya go kopana le Sally e ne ya simologa gone foo.

Sally: Fa Linda a sena go ntlhalosetsa gore nna le ene re bana ba motho, ke ne ka itlhaganelela kwa Jakarta go ya go kopana le ene. E rile ke tswa mo boemafofaneng, ke ne ka bona Linda, rre le mmè ga mmogo le nkgonne yo mongwe—botlhe ba emetse go ntumedisa. Ke ne ke roroma. Re ne ra tlamparelana, ra atlana, mmè ke ene a ileng a ntlamparela ka lobaka lo loleele. Rotlhe re ne re tsholola dikeledi. Re ledile thata ra bo ra tlamparelana gape fa batsadi ba me ba nkopa maitshwarelo ka go bo ba ile ba nneela batsadi ba bangwe gore ba nkgodise.

Linda: E re ka re godisitswe ka ditsela tse di sa tshwaneng, re ne ra tshwanelwa ke go tlwaela botho jwa yo mongwe le tsela e yo mongwe a dirang dilo ka yone. Mme gone re ratana fela thata.

Sally: Gone jaanong, nna le Linda re nna mmogo e bile re kopanela mo phuthegong ya puo ya diatla mo Jakarta.

Linda: Nna le Sally re na le dingwaga di feta 20 re kgaogane. Re leboga Jehofa ka go bo kgabagare re kopane!