Fetela kwa tshedimosetsong

Fetela go diteng

 INDONESIA

Mokgatlho wa Bibelkring

Mokgatlho wa Bibelkring

KWA bowelong jwa dingwaga tsa bo1930, go ne ga simologa mokgatlho wa bodumedi o o bidiwang Bibelkring (leina la Se-Dutch le le kayang “setlhopha sa baithuti ba Baebele”) gaufi le Lake Toba kwa Sumatra Bokone. Mokgatlho ono o simologile morago ga gore barutabana ba sekolo sengwe ba amogele dikgatiso tse go belaelwang ba di tsere mo go Eric Ewins, mmulatsela yo o neng a tlile go rera mo kgaolong ya Lake Toba ka 1936. Se barutabana ba se ithutileng se ne sa ba tlhotlheletsa gore ba tlogele Kereke ya Porotesetanta ya Batak mme ba simolole ditlhopha tse di ithutelang Baebele mo malapeng. Ditlhopha tseno di ne tsa gola go fitlha di nna le maloko a le makgolokgolo. *

Dame Simbolon e ne e le leloko la Bibelkring, jaanong ke kgaitsadi wa rona

Go bala dikgatiso tseo go ne ga dira gore maloko a Bibelkring a lemoge dithuto dingwe tsa boammaaruri. Dame Simbolon yo e neng e le leloko la Bibelkring mme a amogela boammaaruri ka 1972, o ne a re: “Ba ne ba gana go dumedisa folaga, ba sa keteke Keresemose le malatsi a botsalo. Ba bangwe ba ne ba rera ka ntlo le ntlo.” Le fa go ntse jalo, e re ka ba ne ba sa kaelwe ke phuthego ya Modimo, ba ne ba simolola go feteletsa dilo. Kgaitsadi Limeria Nadapdap yo o kileng a nna leloko la mokgatlho oo mme jaanong e le Mosupi wa ga Jehofa, o ne a re: “Basadi ba ne ba sa letlelelwa go itshasa ditlolo tse di ntlafatsang, go tsenya dibenyane, go apara mesese ya sesheng kgotsa go rwala ditlhako. Gape maloko a ne a thibelwa go nna le makwaloitshupo mme seno se ne sa galefisa puso.”

Bibelkring e ne ya nna le makoko a kwa bofelong a ileng a thubega ka iketlo. Moragonyana fa babulatsela ba boela kwa kgaolong ya Lake Toba, ba le bantsi ba e neng e le maloko a Bibelkring ba ne ba amogela boammaaruri.

^ ser. 1 Bangwe ba re mokgatlho wa Bibelkring o kile wa nna le maloko a le diketekete.