Fetela kwa tshedimosetsong

Fetela go diteng

Phuthego ya Surabaya, 1954

 INDONESIA

Barongwa ba a Goroga

Barongwa ba a Goroga

Ka July 1951, phuthego e nnye ya Jakarta e ne ya amogela Peter Vanderhaegen, morongwa wa ntlha go goroga kwa Indonesia. Kwa bowelong jwa ngwaga, go ne ga tla barongwa ba bangwe ba le 13 go tswa Australia, Germany le Netherlands, mme palo ya baboledi e ne ya menagana gabedi.

Fredrika Renskers, morongwa wa Mo-Dutch, o ne a re: “Ke ne ke ithaya ke re ke tla bo ke tsamaya ka ntlo le ntlo ke rerela batho ka go nna ke supasupa ka matsogo. Mme e re ka batho ba le bantsi ba ne ba bua Se-Dutch, ke ne ka simolola go rera ka puo eo.” Ronald Jacka go tswa kwa Australia o ne a re: “Bangwe ba rona ba ne ba dirisa karata ya go neela bosupi e kwadilwe thero e khutshwane ka Se-Indonesia. Ke ne ke nna ke bala karata eno pele ke kokota mo matlong gore ke kgone go tshwara mafoko ao ka tlhogo.”

E re ka barongwa ba ne ba di goga kwa pele, palo ya baboledi e ne ya gola go tswa go 34 go ya go 91 mo ngwageng o le mongwe fela. Ka September 1, 1951, go ne ga tlhomiwa ofisi ya lekala ya Watch Tower Society kwa legaeng la ga André Elias kwa Jakarta. Ronald Jacka o ne a newa kabelo ya go nna motlhanka wa lekala.

Molaetsa o Fitlhelela Dikarolo Tse Dingwe

Ka November 1951, Peter Vanderhaegen o ne a romelwa kwa Manado, Sulawesi Bokone, kwa Theo Ratu le mosadi wa gagwe ba neng ba simolotse setlhotswana teng. Bontsi jwa baagi ba koo ba ne ba ipitsa Bakeresete e bile ba tlotla Lefoko la Modimo fela thata. Batho ba le bantsi ba ne ba amogela Basupi mo magaeng a bone e bile ba ba kopa gore ba ba tlhalosetse dithuto dingwe tsa Baebele. Gantsi ba ne ba simolola ba rerela setlhopha sa batho ba le lesome. Mme morago ga metsotso e le 15, ba ne ba bona fela ba setse ba rerela batho ba le 50. Kwa  bofelong, motlotlo wa bone o ne o tshwarelwa fa pele ga ntlo go na le batho ba le 200.

Mo masimologong a 1952, Albert le Jean Maltby ba ne ba tlhoma legae la barongwa kwa Surabaya, Java Botlhaba, e leng nngwe ya ditoropo tse dikgolo kwa Indonesia. Fa ba le koo, go ne ga tla bokgaitsadi ba barongwa ba le barataro, e bong Gertrud Ott, Fredrika Renskers, Susie le Marian Stoove, Eveline Platte le Mimi Harp. Fredrika Renskers o ne a re: “Bontsi jwa batho ba lefelo leo e ne e le Bamoseleme ba ba neng ba sa nwelelela thata mo ditumelong tsa bone e bile ba le botsalano. Go ne go lebega batho ba le bantsi ba nyoretswe boammaaruri, ka jalo go ne go le motlhofo go simolola dithuto  tsa Baebele. Morago ga dingwaga di le tharo, Phuthego ya Surabaya e ne e na le baboledi ba le 75.”

Legae la barongwa kwa Jakarta

Ka yone nako eo, monna mongwe wa Momoseleme e bong Azis, yo o tswang kwa Padang, Sumatra Bophirima, o ne a kwalela ofisi ya lekala a kopa thuso ya go ithuta Baebele. Azis o ne a kile a rutiwa ke babulatsela ba ba neng ba tswa Australia ka dingwaga tsa bo1930 mme ka ntlha ya puso ya Bajapane, a se ka a tlhola a ba bona gape. Nako nngwe o ne a bona bukana e e gatisitsweng ke Basupi ba ga Jehofa. O ne a kwala jaana: “E rile ke bona aterese ya kwa Jakarta mo bukaneng eno, ke ne ka utlwa ke kgothala!” Ofisi ya lekala ga e ya ka ya senya nako mme ya romela molebedi wa potologo e bong Frans van Vliet kwa Padang. O ne a fitlhela Azis a setse a reretse moagelani wa gagwe e bong Nazar Ris, modiredipuso mongwe yo o neng a nyoretswe boammaaruri. Banna bano le ba malapa a bone ba ne ba amogela boammaaruri. Mokaulengwe Azis e ne ya nna mogolwane yo o ikanyegang. Nazar Ris e ne ya nna mmulatsela yo o kgethegileng, mme gone jaanong bontsi jwa bana ba gagwe ke Basupi ba ba tlhagafetseng.

Frans van Vliet le monnawe e bong Nel

Go tswa foo, Frans van Vliet o ne a etela mokaulengwe mongwe yo o tsidifetseng wa Mo–Dutch kwa Balikpapan, Kalimantan Botlhaba. Mokaulengwe yono o ne a aga sesha lefelo la go tlhotlha oli le le neng le kgautlhantswe ke ntwa. Frans o ne a tsamaya le mokaulengwe yono mo bodireding a bo a mo kgothaletsa gore a ithute Baebele le batho ba ba kgatlhegang. Pele mokaulengwe yono a boela Netherlands, o ne a setse a tlhomile setlhotswana kwa Balikpapan.

Moragonyana kgaitsadi mongwe yo o neng a sa tswa go kolobediwa e bong Titi Koetin, o ne a fudugela Banjarmasin, Kalimantan Borwa. Titi o ne a rerela ba masika a gagwe ba ba nnang kwa lefelong le go buiwang Se-Dayak kwa go lone, mme bontsi bo ne jwa amogela boammaaruri. Bangwe ba bone ba ne ba boela kwa metseng ya bone kwa bogareng jwa Kalimantan mme ba tlhoma ditlhotswana tse moragonyana di neng tsa nna diphuthego tse di nonofileng.

 Dikgatiso Tsa Se-Indonesia

Fa tiro ya go rera e ntse e gola, dikgatiso tsa Se-Indonesia di ne tsa simolola go tlhaela. Ka 1951, buka ya “Let God Be True” e ne ya ranolelwa mo puong ya Se-Indonesia, mme fa balaodi ba Indonesia ba fetola tsela e mafoko a peletwang ka yone, lekala le ne la tshwanelwa ke go baakanya thanolo ya buka eo. * Fa kgabagare buka eno e gololwa, babadi ba Indonesia ba ne ba e kgatlhegela thata.

Ka 1953, ofisi ya lekala e ne ya gatisa dimakasine tsa Tora ya Tebelo di le 250 ka Se-Indonesia, tsa ntlha go gatisiwa mo Indonesia morago ga dingwaga di le 12. Kwa tshimologong makasine o o neng o dirilwe ka motšhine wa mimeograph, o o neng o na le ditsebe di le 12, o ne o na le ditlhogo tse di ithutiwang fela. Morago ga dingwaga tse tharo, makasine ono o ne wa nna le ditsebe tse 16 mme khampani nngwe ya go gatisa e ne e dira dikhopi di le 10 000 ka kgwedi.

Ka 1957, makasine wa Tsogang! o ne wa simolola go gatisiwa kgwedi le kgwedi ka Se-Indonesia. Ka bonako fela go ne go setse go gatisiwa dikhopi di le 10 000 ka kgwedi. E re ka pampiri e ne e tlhaela mo nageng, bakaulengwe ba ne ba tshwanelwa  ke go kopa laesense ya pampiri. Modiredipuso yo o neng a ba thusa ka kopo ya bone o ne a ba raya a re: “Makasine wa Menara Pengawal (Tora ya Tebelo) ke nngwe ya dimakasine tse ke di ratang thata mo Indonesia, ka jalo ke tlile go lo thusa gore lo nne le laesense ya pampiri gore lo kgone go gatisa makasine wa lona o mosha.”

^ ser. 1 Fa e sa le ka 1945, tsela e mafoko a Se-Indonesia a peletwang ka yone e ne ya fetolwa gabedi, segolobogolo ka boikaelelo jwa go fedisa tsela ya go peleta ya Se-Dutch.