Fetela kwa tshedimosetsong

Fetela go diteng

 DINTLHAKGOLO TSA NGWAGA O O FETILENG

“Re Rata JW Broadcasting Fela Thata!”

“Re Rata JW Broadcasting Fela Thata!”

KA October 6, 2014, go ne ga lekelediwa thulaganyo ya thelebishene ya Internet e e bidiwang JW Broadcasting ka Seesemane. * Fa e sa le go tloga ka August 2015, dithulaganyo tseo di ranoletswe mo dipuong di feta 70 gore bakaulengwe le bokgaitsadi ba le bantsi ba itumelele thulaganyo eno ya semoya e e agang. Babogedi ba le bantsi mo dinageng di le dintsi ba tlhalositse kafa ba anaanelang thulaganyo eno e ntšha ka gone. Mme gone, JW Broadcasting e rulagantswe jang?

Go ne go tlhokega lefelo le le siameng. Kwa ntlokgolo ya Basupi ba ga Jehofa kwa Brooklyn, New York, go ne ga tlhophiwa  lefelo le le siametseng thulaganyo eno mo kagong ya 30 Columbia Heights. Lefelo leo le ne la phepafadiwa mo bekeng e le nngwe fela mme Lefapha la go Tlhokomela Dilwana le ne la simolola go baakanya lefelo la go baya thelebishene, fa setlhopha sa batlhami se ntse se dira setudio se se bori e bile e le sa bosheng. Bakaulengwe le bokgaitsadi ba le bantsi mo United States ba ne ba fetsa nako e ntsi ba tlhama setudio e bile ba rulaganya gore ba tla se aga jang ka bonako. Dithulaganyo tse gantsi di tsayang dikgwedi di ne tsa dirwa mo malatsing a le mmalwa fela, mme ka bonako fela Lefapha la go Reka le ne la simolola go otara dilo di le dintsi tse di tlhokegang.

Go ne ga tsenngwa megala e mentsi ya motlakase e bile setlhopha seo se ne sa tlhomamisa gore didirisiwa tsotlhe di dira sentle fa di kopantswe. Ka nako eo, setlhopha sa rona sa mmino se ne se rekota mmino o o tshamekiwang fa thulaganyo e simolola le fa e fela mo ditudiong tsa audio/video kwa Patterson. Se ne se thusiwa ke bakaulengwe le bokgaitsadi ba ba tswang kwa dinageng tse dingwe ba ba neng ba tletse go rekota mmino. Go ne ga dirwa di-script, ga rulaganngwa go dira dipontsho e bile ditlhopha tsa audio/video kwa Brooklyn, Patterson, Wallkill le kwa dinageng tse dingwe di ne di dira ka natla go rulaganya dibidio. Fela fa go sena go agiwa setudio go bo go tsenngwa didirisiwa, go ne ga rulaganngwa broadcasting ya dikgwedi tse di neng di latela.

Setudio sa go rekota sa JW Broadcasting mo Brooklyn, New York

Fa re ne re botsa mankge wa tiro eno gore go tsaya lobaka lo lo kae go aga setudio sa bogolo jo bo kalo, o ne a re gantsi go tsaya ngwaga le halofo. Bakaulengwe le bokgaitsadi ba rona ba ne ba dira tiro eo ka dikgwedi di le pedi fela!

Go nnile le diphelelo tse di molemo tota! Thulaganyo ya kgwedi nngwe le nngwe e gantsi e gololwang ka Mantaga wa ntlha wa kgwedi, e lebiwa makgetlo a feta dimilione di  le pedi ka yone kgwedi eo. Dibidio tsa broadcasting le tse dingwe di lebiwa ka makgetlo a feta dimilione di le lesome kgwedi le kgwedi.

“Thulaganyo eno e dirile gore ke atamalane thata le phuthego ya ga Jehofa le Setlhopha se se Laolang. Jaanong ke a itse gore ke leloko la lelapa le go renang lorato mo go lone.”—Kenya

Batho ba ga Jehofa ba ikutlwa jang ka thulaganyo eno e ntšha ya semoya? Seno ke lemme fela la melaetsa e mentsintsi ya ditebogo e re e amogetseng:

  • “Ano ke mangwe a maitseboa a a itumedisang thata mo botshelong jwa me! Mo maitseboeng ano nna le mosadi wa me re ne ra leba thulaganyo ya May 2015 mo JW Broadcasting mme ga ke kgone go tlhalosa kafa ke itumetseng ka gone. Eno ke nngwe ya dimpho tse di molemolemo tse ke di neilweng ke Jehofa. Re leboga Setlhopha se se Laolang le bakaulengwe le bokgaitsadi botlhe ba ba dirileng ka natla gore go nne le thulaganyo eno e e molemo ya semoya.”—Indonesia.

  • “Ke bosheng fela jaana bakaulengwe ba le bantsi ba neng ba simolola go utlwa leloko la Setlhopha se se Laolang le ruta. Mme jaanong ga re ba reetse fela; gape re a ba bona. Gone jaanong re ikutlwa re le bangwe le Setlhopha se se Laolang le bakaulengwe ba rona ba lefatshe lotlhe go feta le fa e le leng pele.”—Kenya.

  • “E re ka monna wa me a se mo boammaaruring, go thata gore ke tshware kobamelo ya lelapa le banake ba basha ba babedi. Ka jalo, ke tsaya dithulaganyo tseno di le botlhokwa thata. Di dira gore ke ikutlwe ke le karolo ya phuthego e bile di kgothatsa nna le banake fela thata. Ruri seno ke masego a a tswang kwa go Jehofa.”—Boritane.

  • “Re rata JW Broadcasting fela thata! E bile dithapelo tsa rona di ne tsa arabiwa fa thulaganyo eno e dirwa le ka dipuo tse dingwe. Ruri re kgothadiwa ke  lona bakaulengwe fa re bona lo obamela Jehofa ka bopelonomi e bile lo itumetse. Fa e sa le re nna le thulaganyo eno ya thelebishene, re ikutlwa re le maloko a phuthego e e molemo le e e gakgamatsang ya ga Jehofa go feta le fa e le leng pele.”—Czech Republic.

  • “Go reetsa maloko a Setlhopha se se Laolang a beile dipuo ka puo ya me go dirile gore ke atamele Jehofa thata.”—Brazil.

  • “Ke na le dingwaga di le 16 ke direla Jehofa mme tsela e ke ikutlwang ka yone le kafa ke itumetseng ka teng gone jaanong go tshwana le fa ke ne ke kolobediwa. Ke lo leboga thata ka JW Broadcasting bakaulengwe ba ba rategang.”—Brazil.

Re tlhomamisegile gore ka thuso ya ga Jehofa, JW Broadcasting e tla tswelela e le tshegofatso e e molemo mo bakaulengweng ka rona mo lefatsheng lotlhe e bile e tla dira gore Jehofa a bakwe le go galalediwa thata.

^ ser. 1 JW Broadcasting e ka bonwa mo website ya tv.jw.org.