Fetela kwa tshedimosetsong

Fetela go diteng

Tanzania: Bafetikatsela ba kgatlhegela se se mo dikolotsaneng tsa dikgatiso kwa Dar es Salaam

 DINTLHAKGOLO TSA NGWAGA O O FETILENG

Go Rerela Batho ba go Seng Motlhofo go ba Fitlhelela

Go Rerela Batho ba go Seng Motlhofo go ba Fitlhelela

LE FA gone go rera ka ntlo le ntlo e le yone tsela ya konokono e Basupi ba ga Jehofa ba anamisang boammaaruri jwa Baebele ka yone, go dirisa ditafole le dikolotsana tsa dikgatiso tse di ngokang ke tsela e nngwe e e molemo ya go rera dikgang tse di molemo tsa Bogosi Jwa Modimo. (Math. 24:14) Baboledi ba Bogosi ba dirisitse ditlhomo, ditafole le dikhaontara tsa dikgatiso go rerela batho mo mafelong a batho botlhe. Mo godimo ga moo, diphuthego di le dintsi di abetswe dikolotsana tsa dikgatiso di ka nna 250 000. Go nnile le diphelelo dife?

Kwa Dar es Salaam kwa Tanzania, batho ba ka nna 700 ba ne ba kopa go ithuta Baebele go tloga ka 2014 fa go ne go simololwa go dirisiwa thulaganyo e e kgethegileng ya go rera  phatlalatsa mo ditoropong tse dikgolo. Batho ba le bantsi ba ba kgatlhegang ba ntse ba tla dipokanong e bile ba atamalana le Modimo. Mo ngwageng o le mongwe fela, batho ba ba tswang kwa dinageng tsa Afrika le kwa moseja ba ne ba itseela dikgatiso di feta 250 000 mo dikolotsaneng tsa dikgatiso.

Kwa Solomon Islands, kwa go nang le baboledi ba ba ka fa tlase ga 2 000 ba ba rerang mo tshimong e kgolo e e nang le ditlhaketlhake di feta 300, thulaganyo e e kgethegileng ya go rera phatlalatsa mo ditoropong tse dikgolo e fetogile mofuta o o botlhokwa wa go anamisa dipeo tsa boammaaruri. Kwa Honiara, e leng toropokgolo ya koo, bakaulengwe ba ne ba tsamaisa dimakasine di feta 104 000 le diboroutšhara di feta 23 600, ba di tsamaisetsa batho ba le bantsi ba ba nnang kwa ditlhaketlhakeng le kwa metseng e go se nang Basupi kwa go yone. Mo tshokologong nngwe, ba ne ba tsamaisa dibuka tsa Totatota Baebele e Ruta Eng? di le 400 e bile batho ba le 60 ba ne ba kopa go tshwarelwa dithuto tsa magae tsa Baebele.

Mo mosong mongwe, babulatsela ba babedi ba ka metlha e bong Michael le Linda ba ne ba baya tafole ya dikgatiso gaufi le letsha la setlhaketlhake sa Margarita kwa Venezuela. Monna mongwe yo o bidiwang Aníbal o ne a atamela tafole eo mme a amogela buka ya Baebele e Ruta Eng. O ne a ba bolelela gore rraagwe o ne a tlhokafalela fa losing loo lwa lewatle dingwaga di le supa tse di fetileng, le gore fa e sa le ka nako eo, mmaagwe o nna fela a tshwenyegile mo maikutlong. Mo bekeng e e latelang, Aníbal o ne a boela koo mme a bolelela Michael le Linda gore letsatsi leo ke le rraagwe a tlhokafetseng ka lone. O ne a ntsha founo ya gagwe, a leletsa mmaagwe a bo a kopa Michael gore a gomotse mmaagwe, mme Michael o ne a dira jalo. Fa e sa le ka nako eo, o leletsa Michael le Linda ka makgetlo e bile ba mmalela ditemana tse  di kgothatsang. Mmaagwe Aníbal o ne a kwala jaana mo molaetseng mongwe o a neng a o rometse ka founo, “Gompieno ke ikutlwa ke le botoka thata ka gonne lo nkgomoditse lwa bo lwa nthusa go nna le tumelo e e oketsegileng.”

Mo ditoropong di le 14 mo United States, go na le mafelo a le 127 a go rulagantsweng gore go rerwe phatlalatsa mo go one. Mo dikgweding tsa ntlha fela di le supa tsa ngwaga wa tirelo wa 2015, go ne ga simololwa dithuto tsa Baebele di le 8 445! Gape mofuta ono wa go rera o thusitse batho ba le bantsi ba ba kileng ba bo ba kopanela go boela mo kobamelong ya boammaaruri gape. Ka sekai, monna mongwe yo o bidiwang Terry o ne a lebile nngwe ya ditafole tsa rona tsa dikgatiso kwa Los Angeles, California, mme banyalani bangwe ba Basupi ba ba neng ba eme gaufi le yone ba ne ba mmotsa gore a o kile a bala dikgatiso tsa rona. O ne a tlhalosa gore ke Mosupi wa ga Jehofa mme o na le dingwaga di le nnè a tsidifetse. Banyalani bao ba ne ba bala le go tlotla le ene ka Esekiele 34:11 e mo go yone Jehofa a reng: “Nna ka bonna, ke tla batla dinku tsa me ke bo ke di tlhokomela.” Ba ne ba mmolelela ka website ya rona le ka JW Broadcasting. Mo mosong wa letsatsi le le latelang Terry o ne a romelela mokaulengwe yoo molaetsa ka e-mail, a mo tlhalosetsa gore nakwana pele a bona tafole ya dikgatiso o ne a kopile Modimo gore a mo itshwarele ka go bo a ne a sa tlhole a ya dipokanong tsa phuthego. Gape o ne a kopile Jehofa gore a mo thuse go atamalana le ene. Terry o ne a re: “Go tswa foo lo ne lwa ntumedisa ka lorato. Lo ne lwa mpalela temana ele e e kgothatsang lwa bo lwa nnaya tshedimosetso e ke neng ke e tlhoka go boela mo phuthegong ya ga Jehofa. E ne e le karabo ya thapelo ya me.”

Kwa Addis Ababa kwa Ethiopia, go na le ditoropo di le nnè tse go rulagantsweng go dira bodiredi jo bo kgethegileng jwa phatlalatsa mo go tsone. Mo dikgweding di le tharo, bakaulengwe ba ne ba tsamaisa dikgatiso di le 37 275 e bile batho ba le 629 ba ne ba kopa go etelwa ke Basupi. Mo bathong ba  le bantsi ba ba neng ba amogela buka ya Baebele e Ruta Eng, go ne go na le monnamogolo mongwe yo o neng a simolola go e bala ka yone nako eo. Mo nakong e e fetileng, o ne a kile a tsena sekolo sa boruti mme o ne a na le dipotso ka Jesu le Bogosi Jwa Modimo. Ka jalo, mo letsatsing le le latelang o ne a boela kwa tafoleng ya dikgatiso go ya go batla dikarabo tsa  dipotso tsa gagwe. Morago ga letsatsi leo, o ne a dumela go tshwarelwa thuto ya Baebele mme fa beke e fela, o ne a ya dipokanong lekgetlo la ntlha. Gone jaanong o ya dipokanong ka metlha e bile o gatela pele sentle.

Ethiopia: Kgatiso ya Se-Amharic mo kolotsaneng ya dikgatiso kwa Addis Ababa

Monna mongwe wa Mojuda kwa Mexico o ne a atamela tafole ya dikgatiso mme a botsa bakaulengwe ba babedi ba ba neng ba eme fa go yone gore a ba na le kgatiso e e buang ka loso. Ba ne ba mmolelela gore ba feletswe ke dimakasine tse di buang ka loso mme ba mo naya o o buang ka isagwe. Monna yoo o ne a tshwara letsogo la mokaulengwe a bo a mo raya a re: “Ga ke na sepe ka isagwe. Ke batla fela go ipolaya.” Ka jalo, o ne a simolola go lela. Bakaulengwe ba ne ba mmotsa gore goreng a ikutlwa jalo. O ne a bua jaana a sisa pelo: “Ke fetsa go tlhokafalelwa ke ngwana wa mosimane.” Ka jalo, ba ne ba mmontsha kgaolo 7 ya buka ya Baebele e Ruta Eng. Ba ne ba mmalela dirapa tsa ntlha tse pedi tsa setlhogwana se se reng, “Fa Motho Yo re Mo Ratang a Swa” le tse di konelang kgaolo eno tse di tlhalosang tsholofelo ka baswi ka tsela e e utlwalang. E re ka seo se ne se mo amile thata, o ne a tshwara letsogo la mokaulengwe gape mme a mmotsa jaana: “A seo se boammaaruri?” Bakaulengwe ba ne ba mo tlhomamisetsa gore ruri Jehofa o tlile go diragatsa tsholofetso eo. O ne a botsa jaana: “Ke tshwanetse go dira eng gore ke bone morwaake gape?” Ba ne ba dira dithulaganyo tsa go etela monna yoo kwa ga gagwe. Fa ba goroga koo, ba ne ba fitlhela a ipaakanyeditse go simolola go ithuta Baebele.

Molebedi mongwe wa potologo yo o neng a thusa go rulaganya bodiredi jo bo kgethegileng jwa go rera phatlalatsa mo ditoropong tse dikgolo kwa New York, o ne a re: “Ruri Jehofa o segofaditse thulaganyo eno! Ono o itshupile e le mofuta o o molemo wa go fitlhelela diketekete tsa batho, gape o dirile gore re kopane le batho ba le bantsi ba ba tsidifetseng kgotsa ba ba kgaotsweng—‘dinku tse di latlhegileng’—tse gone jaanong di thusiwang go boela mo lesakeng.”—Esekiele 34:15, 16.