Fetela kwa tshedimosetsong

Fetela go diteng

 DINTLHAKGOLO TSA NGWAGA O O FETILENG

Pokano e Ntšha ya Botshelo le Bodiredi Jwa Rona

Pokano e Ntšha ya Botshelo le Bodiredi Jwa Rona

KWA pokanong ya ngwaga le ngwaga ya Watch Tower Bible and Tract Society of Pennsylvania e e neng e tshwerwe ka October 3, 2015, Mokaulengwe Anthony Morris wa Setlhopha se se Laolang o ne a itsise gore Sekolo sa Bodiredi sa Puso ya Modimo, Pokano ya Tirelo le Thuto ya Baebele ya Phuthego di tla emisediwa ke pokano e ntšha ya Botshelo le Bodiredi Jwa Rona. Gape Mokaulengwe Morris o ne a tlhalosa gore Tirelo ya Rona ya Bogosi e tla emisediwa ke kgatiso e ntšha ya mmala e e nang le ditsebe di le robedi e e bidiwang Bukana ya Pokano ya Botshelo le Bodiredi Jwa Rona. Bukana eno e na le thulaganyo ya dipokano tsa beke le beke e bile e na le ditshwantsho tse di dirang gore mmalo wa rona wa Baebele o nne le bokao.

 Pokano eno e ntšha e arogantswe ka dikarolo di le tharo:

  1. Matlotlo A a Mo Lefokong la Modimo. Mo karolong eno, go na le puo ya metsotso e le lesome e e theilweng mo mmalong wa Baebele wa beke le beke le mo ditshwantshong tsa mmalo wa beke eo. Puo ya bobedi e e bidiwang “Go Ribolola Matlotlo mo Dikwalong,” ke ya metsotso e le robedi. Ke motlotlo wa dipotso le dikarabo o o theilweng mo mmalong wa Baebele wa beke le beke mme morago ga yone go latela mmalo wa Baebele wa metsotso e le nnê.

  2. Tlhagafalela Bodiredi. Mo karolong eno, baithuti ba bararo ba re bontsha kafa re ka rutang ka teng fa re kopana le motho lekgetlo la ntlha, fa re dira loeto lwa go boela le fa re tshwere thuto ya Baebele.

  3. Botshelo Jwa Bokeresete. Karolo eno e bontsha kafa re ka dirisang ka gone melaometheo ya Baebele mo matshelong a rona. Sengwe sa botlhokwa mo karolong eno ke motlotlo wa dipotso le dikarabo mo Thutong ya Baebele ya Phuthego.

Baboledi mo lefatsheng lotlhe ba anaanela thapiso e ba e newang kwa pokanong eno e ntšha. Mokaulengwe mongwe kwa Australia o ne a kwala jaana: “Pokano ya Botshelo le Bodiredi e monate tota! Se re se ithutang kwa pokanong eno se mo nakong e bile dikakantsho tsa gore re ka ruta jang di motlhofo. Pokano eno e fela ka bonako tota ka gonne e na le dikarolo tse dikhutshwane, ga di potologe e bile di kgatlha tota segolobogolo fa go na le dibidio le fa bana ba nna le seabe.”

Setlhopha sengwe sa bagolwane kwa Italy se ne sa kwala jaana: “Re lemogile gore pokano eno e ntšha e re tlhotlheletsa gore re baakanyetse ka kelotlhoko mme seo se dira gore re tokafatse tsela e re rutang ka yone. Pokano eno e ntšha ya mo gare ga beke ke bosupi jo bo molemo jwa tsela e e tokafaditsweng e Jehofa a rutang batho ba gagwe ka yone. Mmoledi mongwe wa dingwaga di le 15 o ne a re:  ‘Pele go ne go le thata go tlhoma mogopolo mo dipokanong tsotlhe. Mme pokano eno e ntšha e nthusitse go tlhoma mogopolo le go baakanyetsa sentle kwa gae.’”

Lelapa lengwe la kwa Austria le ne la kwala jaana: “Go ne go le thata go dira mmalo wa Baebele wa beke le beke le morwadiarona wa dingwaga tse di lesome. Mme karolo e e bidiwang ‘Matlotlo A a Mo Lefokong la Modimo,’ e re thusitse gore re kgone go akgela re gololesegile. Jaanong rotlhe re itumelela go baakanyetsa mmalo wa Baebele wa beke le beke. Se se itumedisang le go feta ke go re re kgona go bona gore morwadiarona o gatela pele mo phuthegong.”

Ines wa kwa Jeremane a re: “Pokano eno e dirile gore ke rate go baakanyetsa le go tlhatlhanya ka se ke se balang. Ke la ntlha ke dira dipatlisiso thata jaana. Gone jaanong ke atamalane le Jehofa fela thata. Lefatshe leno la ga Satane le dira gore ke ikutlwe ke lapile. Le fa go ntse jalo, dipokano di dira gore ke nne matlhagatlhaga le gore ke se ka ineela.”

Diphuthego tsa kwa Solomon Islands di itumelela pokano ya mo gare ga beke fela thata e bile bakaulengwe ba koo ba leka ka natla gore e ba solegele molemo ka botlalo. Diphuthego di le dintsi tsa koo di mo mafelong a a kwa thoko a a se nang motlakase le Internet e bile bakaulengwe ba koo ba itshedisa ka tiro ya go lema e e ba tsenyetsang lotseno lo lonnye fela. Ba kgonne jang go reka motšhine o o tshamekang dibidio, le go nna le dibidio tsa pokano tse di gololwang kgwedi le kgwedi? Baboledi ba phuthego nngwe kwa setlhakatlhakeng sa Malaita ba ne ba kopanela kgwebo ya go rekisa khokonate e e omisitsweng. Ba ne ba isa madi a ba a dirileng kwa phuthegong gore phuthego e tle e kgone go reka motšhine o monnye o o tshamekang dibidio, mme motšhine oo o dirisa motlakase o o tswang mo maatleng a letsatsi. Bakaulengwe ba ya kwa lefelong le le gaufi le le nang le Internet gore ba kgone go itseela dibidio tse di  dirisiwang mo pokanong mme ba bo ba di naya le bakaulengwe ba bangwe mo phuthegong.

Mokaulengwe mongwe wa kwa United States o ne a kwala jaana: “Go motlhofo gore ke ithute sengwe fa se na le ditshwantsho tse dintsi. Pele pokano eno e ntšha e simolola, go ne go se motlhofo gore ke ithute. Ke tshwanetse go bala sengwe makgetlo a le mantsi pele nka kgona go se tlhalosetsa motho yo mongwe. Ka jalo, ke leboga Setlhopha se se Laolang fela thata ka thulaganyo e ba e dirileng ya go bontsha ditshwantsho le dibidio. Dibidio tse di buang ka dibuka tsa Baebele di molemo tota e bile ke rata ditshwantsho tse di mo bukaneng ya pokano! Go bonala sentle gore Jehofa o segofaditse matsapa a lo a tsayang go thusa batho ba gagwe. Ke lo leboga go menagane.”

Malawi