Fetela kwa tshedimosetsong

Fetela go diteng

 GO RERA LE GO RUTA MO LEFATSHENG LOTLHE

Dinaga Tsa Amerika

Dinaga Tsa Amerika
  • DINAGA 57

  • PALO YA BAAGI 980 780 095

  • BABOLEDI 4 034 693

  • DITHUTO TSA BAEBELE 4 339 285

Dikhutsana di ya Dipokanong

Angela yo o nnang kwa Suriname, o ne a etela legae la dikhutsana le le gaufi le ntlo ya gagwe. Mookamedi wa legae leno e ne e le kgaitsadi yo o tsidifetseng, ka jalo o ne a se na bothata le gore Angela a rute bana Baebele. Angela o ne a rerela bana ba le 85 le go ba bontsha dibidio tse di mo jw.org. Ka ntlha ya seo, o ne a simolola go ithuta Baebele le bontsi  jwa bone. Babulatsela ba babedi ba ne ba tla mme mongwe le mongwe a nna le setlhopha sa gagwe. Kgaitsadi yo o tsidifetseng a re o ne a rutile bana dipina tsa Bogosi, gape a re o ne a tle a ba balele dipolelo tsa Baebele bosigo. O ne a eletsa go ya dipokanong mme o ne a sa kgone go tlogela bana ba le bosi. Kgabagare go ne ga dirwa thulaganyo ya gore botlhe ba ye dipokanong. E re ka legae leno le Holo ya Bogosi e le nko le molomo, bakaulengwe ba ne ba ya go ba tsaya. Re bua jaana, kgaitsadi yono le bana botlhe ba le 85 ba ya dipokanong ka metlha.

Gabriel o Thusitse Rremogoloagwe

Paraguay: Gabriel a bua le rremogoloagwe

Morago ga kopano nngwe kwa Paraguay, Gabriel yo o nang le dingwaga di le thataro o ne a boela gae a akantse ka botlhokwa jwa go rera molaetsa wa Bogosi. O ne a akanya ka mongwe yo a mo ratang thata e bile a batla go mmona kwa Paradaiseng. Motho yono e ne e le rremogoloagwe. Bothata ke gore rremogoloagwe o ne a sa kgatlhegele boammaaruri e bile a le kgatlhanong le mosadi le bana ka go bo e le Basupi.

Ka lone letsatsi leo, Gabriel o ne a kopa batsadi ba gagwe gore ba founele rremogolo le mmèmogolo ba ba nnang kwa Argentina ba dirisa mokgwa wa go buisana ba bonana ka bidio. Gabriel o ne a tlhalosetsa rremogoloagwe ka botlhokwa jwa go ithuta Baebele mme a mo raya a re: “Rremogolo, a o batla go ithuta Baebele le nna?” O ne a dumela. Gabriel o ne a ithuta le rremogoloagwe a dirisa boroutšhara jwa Reetsa Modimo Mme o Tshelele Ruri. E re ka boobabedi ba ne ba sa itse go bala  sentle, ba ne ba ikatisa go sa le gale. Nako nngwe le nngwe pele ga thuto ya bone, Gabriel o ne a baakanyetsa a bo a apara hempe le thae.

Moragonyana rremogolo le mmèmogolo ba ne ba etela kwa gaabo Gabriel. Fa ba ntse ba etile, rremogoloagwe o ne a ya dipokanong le bone. E rile rremogolo a boela Argentina, o ne a fitlha a tsweletsa thuto le mokaulengwe mongwe. Gone jaanong o gatetse pele go ya bokgakaleng jwa go nna mmoledi yo o sa kolobediwang e bile ene le mosadi wa gagwe ba rapela mmogo letsatsi le letsatsi. Tota le Gabriel o gatetse pele, le ene ke mmoledi yo o sa kolobediwang. Rremogoloagwe a re o batla go ineela mo go Jehofa ka kolobetso.

“Go Tla ga Gago Maloba Go ne Go sa Itiragalela Fela”

Fa go ntse go tsamaisiwa pampitshana ya A Tota Baswi ba ka Tshela Gape?, kgaitsadi mongwe kwa Brazil, e bong Jennifer o ne a kokota mo lebating la mosadi mongwe  yo o neng a itlhaganeletse go ya phitlhong ya tsala ya gagwe. Jennifer o ne a mo raya a re o batla go mo naya sengwe se se buang ka tsogo ya baswi. Mosadi yono o ne a gakgamadiwa ke setlhogo seno mme gone a amogela pampitshana. Jennifer o ne a mmotsa gore a a ka mo neela tse dingwe gore a di isetse ba ba tlhokafaletsweng. Mosadi yono o ne a dumela mme a kopa di le robonngwe.

Jennifer o ne a boela kwa go ene mme mosadi yono a mo raya a re: “Waitse ke lemogile moragonyana gore go tla ga gago maloba go ne go sa itiragalela fela. Modimo o ne a go romela ka nako e ke neng ke tlhoka go gomodiwa ka yone.” O ne a tsamaisa dipampitshana tsotlhe mme mongwe wa losika yo o neng a rera o ne a e bala yotlhe fa pele ga batlaphitlhong. Batho botlhe ba ne ba mo leboga ka gonne e ne e gomotsa tota. Mosadi yono o ne a simolola go ithuta Baebele.

Go Rera mo Thekising

Badiredi ba kwa Bethele ba bararo kwa Haiti ba ne ba tsamaya ka dithekisi tse di mebalabala tse di bidiwang di-tap-tap. Mo mosepeleng wa bone wa diura tse pedi le halofo ba ne ba rerela bapalami mme ba tsamaisa dimakasine di le 50 le dipampitshana di le 30. Mongwe wa bone e bong Gurvitch, o ne a balela mopalami sengwe go tswa mo makasineng wa Tsogang! Lekawana le le bidiwang Pépé le ne le reeditse mme la latlhela tlhware legonyana. Pépé o ne a ikopela thuto ya Baebele, kante e bile o nna mo tshimong ya phuthego e Gurvitch a leng mo go yone. Fa e sa le ba kopana ka January 2014, Pépé o ile a ya mo e ka nnang dipokano le dikopano tsotlhe. O bolelela batho ka bodumedi jwa gagwe jo bosha e bile o batla go nna mmoledi yo o sa kolobediwang mo bogautshwaneng.