Fetela kwa tshedimosetsong

Fetela go diteng

 DOMINICAN REPUBLIC

Ba Kwa Kgolegelong Mme Ga ba A Letlelelwa go Rera

Ba Kwa Kgolegelong Mme Ga ba A Letlelelwa go Rera

Ba Tshwaretswe go se Tseye Letlhakore

Enrique Glass le kgolegelo e a neng a tswaletswe mo go yone dibeke tse pedi

Ka June 19, 1949, Ba-Dominican ba ba neng ba tshabetse kwa dinageng tse dingwe ba ne ba boela Dominican Republic ka maikalelo a go tlosa Rafael Trujillo mo setulong.  Le fa maiteko a bone a ile a itaya se fololetse, puso ya ga Trujillo e ne ya tshwara ba ba neng ba gana go tsenela bosole le ba puso e neng e tsaya gore ke baba. León, Enrique le Rafael Glass e ne e le bangwe ba Basupi ba ntlha go ya kgolegelong ka ntlha ya go gana go tsenela bosole. Ba bangwe ke ba León a neng a bereka le bone, ba le bone e neng e le Basupi.

León a re: “[Nna le badiri ka nna] re ne ra tshwarwa ra bo ra botsolotswa ke masole a a direlang mo sephiring. Morago ga go tshosediwa, re ne ra gololwa mme morago ga malatsinyana re ne ra bilediwa tirelo ya sesole gape.  Re ne ra gana, ka jalo ba re isa kgolegelong. Re ne ra fitlhela Basupi ba bangwe ba banè mme ba le babedi mo go bone e ne e le bomorwarre. Fa re sena go gololwa, re ne ra tshwarwa gape. Seno se diragetse makgetlo a le mararo, go ne go feta letsatsi kgotsa malatsi fela re bo re tshwarwa gape. Re ntse dingwaga di ka nna supa mo kgolegelong mme katlholo ya bofelo e ne e le ya dingwaga di le tlhano.”

‘Le fa re ne re itewa ka dithupa, seme le ditlhobolo, re ne re kgona go itshoka ka gonne Jehofa o ne a re naya maatla’

Botshelo jwa mo kgolegelong bo ne bo sa jese diwelang. Magolegwa le batlhokomedi ba ne ba kgoba bakaulengwe bosigo le motshegare. Molaodi wa kwa Fort Ozama, kgolegelo e ba neng ba tshwaretswe kwa go yone la ntlha, o ne a re: “Basupi ba ga Jehofa, lo mpoleleleng fa lo nna basupi ba ga Diabolo gore ke tle ke lo golole.” Le fa go ntse jalo, baganetsi ba ne ba sa kgone go dira gore bakaulengwe bao ba ba ikanyegang ba tlogele go direla Jehofa. León o ne a tlhalosa jaana: ‘Ka metlha Jehofa o ne a re naya maatla gore re itshoke mme re ne re kgona go bona letsogo la gagwe le mo dilong tse dinnye. Le fa re ne re itewa ka dithupa, seme le ditlhobolo, re ne re kgona go itshoka ka gonne Jehofa o ne a re naya maatla.’

Basupi ba ga Jehofa ba a Thibelwa

Mo dikarolong tse dingwe tsa naga, batho ba ba kgatlhanong le kobamelo ya boammaaruri ba ne ba simolola go bogisa Basupi le go feta. Le fa go le jalo, ka May 1950, go ne go na le baboledi ba le 238 mo Dominican Republic go sa balelwe barongwa. Baboledi ba le masome a mabedi le bongwe ba Ba-Dominican e ne e le babulatsela ba nako e e tletseng.

Lokwalodikgang lo lo neng lwa itsise ka bakaulengwe ba ba atlholetsweng go se tseye letlhakore

 Mo e ka nnang ka yone nako eo, moemedi wa tirelo ya sephiri o ne a kwalela Mokwaledi wa Puso lekwalo, a mo raya a re: “Maloko a lekoko la Basupi ba ga Jehofa a tsweletse ka tlhagafalo ka ditiro tsa bone mo toropong yotlhe [Ciudad Trujillo].” O ne a tswelela ka go re: “Ga se la ntlha ke lo raya ke re, re ele tlhoko se Basupi ba ga Jehofa ba se dirang ka gonne go rera ga bone le ditiro tsa bone di tlhakanya batho tlhogo.”

Mokwaledi wa Selegae le Mapodisi, e bong J. Antonio Hungría o ne a kopa Mokaulengwe Brandt gore a kwale lekwalo le le tlhalosang seemo sa Basupi mo tirelong ya sesole, go dumedisa folaga le go duela lekgetho. O ne a kwala lekwalo a dirisa tshedimosetso e e mo bukeng ya “Let God Be True.” Le fa go ntse jalo, ka June 21, 1950, Hungría o ne a ntsha taelo ya go thibela tiro ya Basupi ba ga Jehofa mo Dominican Republic. Mokaulengwe Brandt o ne a bilediwa kwa ofising ya ga Hungría go tla go ikutlwela taelo eno ka tsoopedi. Mokaulengwe Brandt o ne a botsa gore  a barongwa ba tla tshwanelwa ke go tswa mo Dominican Republic. Hungría o ne a mo tlhomamisetsa gore ba ka nna ba nna fa fela ba ikobela molao e bile ba sa bue le batho ka bodumedi jwa bone. *

^ ser. 1 Dibeke pele go ntshiwa taelo eno, baruti ba Kereke ya Katoliki ba ne ba kwala ka Basupi ba ga Jehofa mo lokwalodikgannyeng ba ba kgala e bile ba ba amanya le bokomonise.