Fetela kwa tshedimosetsong

Fetela go diteng

 DOMINICAN REPUBLIC

Ba Tlhaselwa Setlhogo

Ba Tlhaselwa Setlhogo

“Ba Tlile go Nyelediwa”

Borbonio Aybar o kolobeditswe ka January 19, 1955, ka nako ya fa tiro e ne e thibetswe. Morago ga go kolobediwa o ne a tshwara dithuto tse dintsi tsa Baebele kwa Monte Adentro le kwa Santiago. Ka 1956 fa thibelo e sena go tlosiwa, bangwe ba batho ba a neng a ithuta le bone ba ne ba kolobediwa, go akaretsa le mosadi wa gagwe.

Mo magareng a July 1957, badiredi ba puso ba ne ba kopana kwa Salcedo go tla go logela Basupi segwenegwene. Mokaulengwe Aybar a re: “Francisco Prats-Ramírez o ne a di goga kwa pele. Prats-Ramírez o ne a re, ‘Mo malatsing a le mmalwa fela, ba tlile go nyelediwa.’” Morago ga malatsinyana ka July 19, 1957, mapodise a ne a phutha Basupi ba ga Jehofa botlhe mo Blanco Arriba, El Jobo, Los Cacaos le kwa Monte Adentro.

Mokaulengwe Aybar a re: “Ke ne ke le mongwe wa ba ba neng ba tshwerwe. Re ne ra isiwa kwa ntlokgolong ya sesole kwa Salcedo. Fela fa re goroga, mokolonele Saladín o ne a ntitaya. O ne a tuka bogale tota fa a ntse a re tshosetsa. Go tswa foo, re ne ra laelwa gore re dire mela e mebedi, ya banna le ya basadi. Batlhokomedi ba ne ba simolola go betsa le go raga banna mme ba betsa basadi ka dithupa ba ntse ba re, ‘nna ke Mokatoliki e bile ke a bolaya.’”

“Ke badile Baebele e bile ke a itse gore Jehofa ke Modimo”

Mokaulengwe Aybar o ne a duedisiwa madi a kotlhao mme a tswalelwa dikgwedi tse tharo mo kgolegelong. O ne a tswelela ka go re: “Ka nako ya fa re le mo kgolegelong, re ne ra etelwa ke molaodi wa masole e bong Santos Mélido Marte. O ne a re raya a re: ‘Ke badile Baebele e bile ke a itse gore Jehofa ke Modimo. Ga lo na molato mme ga go na sepe se nka se dirang ka gonne lo tshwarisitswe ke  bobishopo ba Katoliki. Batho ba ba ka lo gololang ke bone bobishopo bano kgotsa jefe (“mookamedi,” Trujillo).’”

“A ke Wena Mookamedi?”

Bangwe ba batho ba ba neng ba tshwerwe e ne e le morwadie Fidelia Jiménez le ditlogolo tse pedi tsa ga Fidelia mme botlhe ba ne ba ithutile Baebele le Fidelia. Le fa Fidelia a ne a sa tshwarwa, o ne a ya go itshwarisa kwa balaoding gore a tle a kgone go kgothatsa ba ba mo kgolegelong. Ka yone nako eo, Ludovino Fernández, molaodi wa sesole wa maemo a a kwa godimo yo o neng a itsege thata ka boikgogomoso le bosetlhogo, o ne a etela kwa kgolegelong. O ne a laela gore Fidelia a tlisiwe kwa go ene mme a mmotsa jaana: “A ke wena mookamedi?”

Fidelia o ne a fetola jaana: “Nnyaa, ke lona baokamedi.”

Fernández o ne a re: “Mme gone o moruti.”

Fidelia a fetola ka go re: “Nnyaa, Jesu ke ene moruti.”

Fernández a botsa jaana: “A ga se wena o dirileng gore batho bano botlhe ba tshwarwe? Akere ke wena o ba rutileng?”

Fidelia o ne a re: “Nnyaa, Baebele ke yone e dirileng gore batho bano ba tshwarwe. Ba dira se ba se ithutileng mo Baebeleng.”

Fa ba ntse ba bua, bakaulengwe ba babedi ba ba neng ba tshwerwe e bong Pedro Germán le Negro Jiménez yo e leng ntsalaa Fidelia, ba ne fa feta mo phashiting. Ba ne ba ntshiwa mo seleng ya motho a le esi ba isiwa kwa seleng ya batho ba bantsi. Hempe ya ga Negro e ne e kgamathetse madi mme leitlho la ga Pedro le ne le rurugile thata. E rile a bona gore ba ne ba iteilwe setlhogo, Fidelia o ne a botsa molaodi jaana: “Batho bano ba molemo, ba a ikanyega e bile ba boifa Modimo. A ke yone tsela e lo ba tshwarang ka yone?” Fernández o ne a lemoga gore ga a ka  ke a tshosetsa Fidelia mme a laela gore a busediwe kwa seleng.

Batlhanka ba ga Jehofa ba ba ikanyegang ba ne ba lebana le dipogiso tseo tse di setlhogo ka bopelokgale. Tota le badiredi ba puso ba ne ba lemoga seo. Ka sekai, ka July 31, 1957, Luis Arzeno Colón, motlhokomedi wa poresidente, o ne a kwalela mokwaledi wa puso a ikuela jaana: “Le fa bosheng jaana National Congress e boletse phatlalatsa gore ditiro tsa lekoko la Basupi ba ga Jehofa ke tlolomolao, bontsi jwa maloko a lone a tswelela a nitame mo tirong ya one.”