Sekarea 1:1-21

1  Mo kgweding ya borobedi mo ngwageng wa bobedi wa ga Dario+ lefoko la ga Jehofa la tla kwa go Sekarea+ morwa Berekia morwa Ido+ moporofeti, le re:  “Jehofa o ne a galefela borraalona—fela thata.+  “Mme o ba reye o re, ‘Jehofa wa masomosomo o buile jaana: “‘Boelang mo go nna,’+ go bua Jehofa wa masomosomo, ‘mme ke tla boela mo go lona,’+ go buile Jehofa wa masomosomo.”’  “‘Lo se ka lwa nna jaaka borraalona,+ ba baporofeti ba pele ba neng ba ba tlhaeletsa,+ ba re: “Jehofa wa masomosomo o buile jaana, ‘Boang tsweetswee, mo ditseleng tsa lona tse di bosula le mo ditirong tsa lona tse di bosula.’”’+ “‘Mme ba ne ba se ka ba reetsa, e bile ga ba a ka ba ntlhwaela tsebe,’+ go bua Jehofa.  “‘Fa e le borraalona bone, ba kae?+ Mme fa e le baporofeti bone,+ a ba ne ba tswelela go tshela ka bosakhutleng?  Le fa go ntse jalo, fa e le mafoko a me le melao ya me e ke neng ka e laolela batlhanka ba me, baporofeti,+ a e ne ya se ka ya tshwara borraalona?’+ Ka jalo ba ne ba boa mme ba re: ‘Go ya ka se Jehofa wa masomosomo a neng a gopotse go se re dira,+ go ya ka ditsela tsa rona le go ya ka ditiro tsa rona, ke kafa a re diretseng ka gone.’”+  Mo letsatsing la bomasome a mabedi le bonè la kgwedi ya bolesome le bongwe, ke gore, ka kgwedi ya Shebate, mo ngwageng wa bobedi wa ga Dario,+ lefoko la ga Jehofa le ne la tla kwa go Sekarea+ morwa Berekia morwa Ido+ moporofeti, le re:  “Ke ne ka leba go le bosigo, mme bona! monna+ a palame pitse e khunou,+ mme o ne a eme fela a sa tshikinyege mo gare ga ditlhare tsa moretela+ tse di neng di le mo lefelong le le boteng; mme kafa morago ga gagwe go ne go na le dipitse tse dikhunou, tse di bohunou jo bo galotseng, le tse ditshweu.”+  Ka jalo ka re: “Ke bomang bano, morena wa me?”+ Fa a araba seo moengele yo o neng a bua le nna a nthaya a re:+ “Nna ka bonna ke tla go bontsha gore bano tota ke bomang.” 10  Foo monna yo o neng a eme fela a sa tshikinyege mo gare ga ditlhare tsa moretela a araba a re: “Bano ke ba Jehofa a ba rometseng go tla go tsamayatsamaya mo lefatsheng.”+ 11  Mme ba araba moengele wa ga Jehofa yo o neng a eme mo gare ga ditlhare tsa moretela ba re: “Re tsamatsamaile mo lefatsheng,+ mme bona! lefatshe lotlhe le ntse fela le sa tshikinyege e bile le se na matshwenyego.”+ 12  Ka jalo moengele wa ga Jehofa a araba a re: “Ao tlhe Jehofa wa masomosomo, e tla nna lobaka lo lo kae o sa bontshe Jerusalema kutlwelobotlhoko le metse ya Juda,+ e o e atlhotseng dingwaga tseno tse di masome a supa?”+ 13  Mme Jehofa a araba moengele yo o neng a bua le nna, ka mafoko a a molemo, mafoko a a gomotsang;+ 14  mme moengele yo o neng a bua le nna a tswelela a nthaya a re: “Tlhaeletsa, o re, ‘Jehofa wa masomosomo o buile jaana: “Ke ntse ke fufegela Jerusalema le Siona ka lefufa le legolo.+ 15  Ke ikutlwa ke galefetse ditšhaba tse di iketlileng+ ka kgalefo e kgolo; ka gonne fa e le nna, ke ne ka ikutlwa ke galefile go le gonnye fela,+ mme tsone, di ne tsa thusa go ya masetlapelong.”’+ 16  “Ka jalo Jehofa o buile jaana, ‘“Ruri ke tla boela Jerusalema ka mautlwelobotlhoko.+ Ntlo ya me e tla agiwa mo go ene,”+ go bua Jehofa wa masomosomo, “e bile thapo e e lekanyang e tla namaladiwa mo godimo ga Jerusalema.”’+ 17  “Tlhaeletsa gape, o re, ‘Jehofa wa masomosomo o buile jaana: “Metse ya me e sa ntse e tla penologa ka molemo;+ mme ruri Jehofa o sa ntse tla ikwatlhaya kaga Siona+ mme o sa ntse a tla tlhopa Jerusalema.”’”+ 18  Mme ka tsholetsa matlho a me ka leba; mme bona! ga bo go le dinaka di le nnè.+ 19  Ka jalo ka raya moengele yo o neng a bua le nna ka re: “Ke eng tseno?” Mme ene a nthaya a re: “Tseno ke dinaka tse di neng tsa phatlalatsa Juda,+ Iseraele+ le Jerusalema.”+ 20  Go feta moo, Jehofa o ne a mpontsha badiri ba ba ditswerere ba le banè. 21  Foo ka re: “Bano ba tlile go dira eng?” Mme a tswelela a re: “Tseno ke dinaka+ tse di neng tsa phatlalatsa Juda mo e leng gore ga go na ope gotlhelele yo o neng a tsholetsa tlhogo ya gagwe; mme ba bangwe bano ba tla tla go di roromisa, go latlhela dinaka fa fatshe tsa ditšhaba tse di tsholetsang lonaka kgatlhanong le lefatshe la Juda, gore ba mo phatlalatse.”+

Dintlha Tse di Kwa Tlase