Nehemia 1:1-11

1  Mafoko a ga Nehemia+ morwa Hakalia: Jaanong ga diragala mo kgweding ya Kiselefe,+ mo ngwageng wa bomasome a mabedi,+ gore ke bo ke le kwa Shushane+ kago ya phemelo.  Foo Hanani,+ mongwe wa bomorwarre, a tsena, ene le banna ba bangwe go tswa Juda, mme ka ba botsa+ ka Bajuda,+ ba ba neng ba falotse,+ ba ba neng ba setse ba botshwarwa,+ le ka Jerusalema.  Ka jalo ba nthaya ba re: “Ba ba setseng, ba ba setseng kwa botshwarwa, kwa kgaolong e e laolang,+ ba mo seemong se se maswe+ thata le mo kgobong;+ mme lobota+ lwa Jerusalema lo thubilwe, le dikgoro+ tsa yone di fisitswe ka molelo.”  Mme ga diragala gore, fela fa ke sena go utlwa mafoko ano, ka nna fa fatshe mme ka simolola go lela le go hutsafala malatsi a le mantsi, mme ke ne ke itima dijo+ ke sa kgaotse e bile ke rapela fa pele ga Modimo wa magodimo.+  Mme ka tswelela ka re: “Ao, Jehofa Modimo wa magodimo, Modimo yo mogolo le yo o boitshegang,+ yo o bolokang kgolagano+ le bopelonomi jwa lorato mo go ba ba mo ratang+ le ba ba bolokang ditaelo+ tsa gagwe,  tsweetswee, a tsebe ya gago e reetse+ le matlho a gago a bulege, gore o reetse thapelo ya motlhanka+ wa gago, e ke e rapelang fa pele ga gago gompieno, motshegare le bosigo,+ mabapi le bomorwa Iseraele batlhanka ba gago, ke ntse ke bolela+ maleo+ a bomorwa Iseraele a re go leofetseng ka one. Re leofile, ka bobedi nna le ba ntlo ya ga rre.+  Kwantle ga pelaelo re go diretse ka boikepo+ mme ga re a boloka ditaelo+ le melao+ le ditshwetso tsa boatlhodi+ tse o neng wa di laela Moshe motlhanka wa gago.+  “Tsweetswee, gakologelwa+ lefoko le o le laetseng Moshe motlhanka wa gago o re, ‘Wena fa o ka dira ka go sa ikanyege, nna ke tla go gasamisetsa mo gare ga ditšhaba.+  Fa o tla bo o boetse mo go nna+ mme o bolokile ditaelo+ tsa me le go di dira,+ le fa go ka direga gore batho ba gago ba ba phatlaladitsweng ba bo ba le kwa bofelelong jwa magodimo, ke tla ba phutha+ koo ke ba tlisa+ kwa lefelong le ke le tlhophetseng gore leina la me le nne kwa go lone.’+ 10  Mme ke batlhanka ba gago+ le batho ba gago,+ ba o ba golotseng ka maatla a gago a magolo+ le ka seatla sa gago se se nonofileng.+ 11  Ao, Jehofa, tsweetswee a tsebe ya gago e reetse thapelo ya motlhanka wa gago le thapelo+ ya batlhanka ba gago ba ba natefelelwang ke go boifa leina la gago;+ mme tsweetswee, a ko o neye motlhanka wa gago katlego gompieno+ mme o mo dire gore a nne yo o tlhomogelwang pelo fa pele ga monna yono.”+ Jaanong nna ke ne ke le motsholasenwelo+ wa kgosi.

Dintlha Tse di Kwa Tlase