Lefitiko 10:1-20

10  Moragonyana bomorwa Arone e leng Nadabe le Abihu,+ mongwe le mongwe wa bone a tsaya setsholamolelo+ sa gagwe a tla le sone mme ba tsenya molelo mo go tsone ba bo ba tsenya maswalo+ mo go tsone, ba simolola go isa molelo o o seng kafa molaong+ fa pele ga ga Jehofa, o a neng a sa o ba laolela.  Foo molelo wa tswa fa pele ga ga Jehofa wa ba laila,+ mo ba neng ba swela fa pele ga ga Jehofa.+  Foo Moshe a raya Arone a re: “Jehofa o buile jaana, a re, ‘Mma ke itshepisiwe+ mo go ba ba leng gaufi le nna,+ mme ke galalediwe+ fa pele ga sefatlhego sa batho botlhe.’” Mme Arone a didimala fela.  Ka jalo Moshe a bitsa Mishaele le Elisafane,+ bomorwa Usiele, morwarraagwe rraagwe Arone, a ba raya a re: “Atamelang, tlosang bomorwarraalona fa pele ga lefelo le le boitshepo lo ba ise kwa ntle ga bothibelelo.”+  Ka jalo ba atamela ba ba tsaya ba le mo diaparong tsa bone tse di telele ba ba isa kwa ntle ga bothibelelo, fela jaaka Moshe a ne a buile.  Morago ga moo Moshe a raya Arone le Eliasare le Ithamare bomorwawe ba bangwe a re: “Lo se ka lwa letla ditlhogo tsa lona go nna di sa baakanngwa,+ le gone lo se ka lwa gagola diaparo tsa lona, gore lo se ka lwa swa le gore a se ka a galefela phuthego+ yotlhe; mme bomorwarraalona ba ntlo yotlhe ya Iseraele ba tla lela ka ntlha ya go tuka, mo Jehofa a dirileng gore go tuke.  Gape lo se ka lwa tswa mo kgorong ya mogope wa bokopanelo e se re kgotsa lwa swa,+ ka gonne leokwane le le tlotsang la ga Jehofa le mo go lona.”+ Ka jalo ba dira go ya ka lefoko la ga Moshe.  Mme Jehofa a bua le Arone, a re:  “O se ka wa nwa beine kgotsa bojalwa jo bo tagang,+ wena mmogo le bomorwao, fa lo tla mo mogopeng wa bokopanelo, gore lo se ka lwa swa. Ke molao mo dikokomaneng tsa lona ka bosakhutleng, 10  gore lo tle lo dire pharologanyo fa gare ga selo se se boitshepo le se se seng boitshepo le fa gare ga selo se se sa itshekang le se se itshekileng,+ 11  le gore lo rute bomorwa Iseraele+ melao yotlhe e Jehofa a e buileng le bone ka Moshe.” 12  Foo Moshe a bua le Arone le Eliasare le Ithamare, bomorwawe ba ba neng ba setse a re: “Tsayang tshupelo ya dijo tsa ditlhaka+ e e neng e setse mo ditshupelong tsa ga Jehofa tse di dirwang ka molelo mme lo e je e sa bedisiwa gaufi le sebeso, ka gonne ke selo se se boitshepotshepo.+ 13  Mme lo e jele mo lefelong le le boitshepo,+ ka gonne ke kabelo ya lona le kabelo ya bomorwaalona e e tswang mo ditshupelong tsa ga Jehofa tse di dirwang ka molelo; gonne ke laetswe jalo. 14  Mme lo tla ja sehuba sa tshupelo e e fokwang+ le leoto la karolo e e boitshepo+ mo lefelong le le phepa, wena le bomorwao mmogo le bomorwadio,+ ka gonne di neetswe go nna kabelo ya gago le kabelo ya bomorwao go tswa mo ditlhabelong tsa kabalano tsa bomorwa Iseraele. 15  Ba tla tlisa leoto la karolo e e boitshepo le sehuba sa tshupelo e e fokwang+ mmogo le ditshupelo tse di dirwang ka molelo, tsa dikarolo tse di mafura, gore ba fokisetse kwa le kwa tshupelo e e fokwang fa pele ga ga Jehofa; mme e nne kabelo+ ka bosakhutleng ya gago mmogo le bomorwao, fela jaaka Jehofa a laetse.” 16  Mme Moshe a batla podi ya tshupelo ya boleo+ ka botlalo, mme bona! e ne e fisitswe. Ka jalo a galefela Eliasare le Ithamare, bomorwa Arone ba ba neng ba setse, a re: 17  “Ke ka ntlha yang fa lo ne lo sa jele tshupelo ya boleo mo lefelong le le boitshepo,+ e re ka e le selo se se boitshepotshepo e bile a e lo neile gore lo arabele tlolo ya phuthego gore lo e direle tetlanyo fa pele ga ga Jehofa?+ 18  Bonang! Madi a yone ga a tlisiwa mo teng ga lefelo le le boitshepo kafa teng.+ Ruri lo tshwanetse go ka bo lo e jetse mo lefelong le le boitshepo, fela jaaka ke ne ke laetswe.”+ 19  Foo Arone a bua le Moshe a re: “Bona! Gompieno ba isitse tshupelo ya bone ya boleo le tshupelo ya bone e e fisiwang fa pele ga ga Jehofa,+ fa dilo tse di ntseng jaana di ne di simolola go ntiragalela; mme fa ke ka bo ke jele tshupelo ya boleo gompieno, a go ne go tla kgatlha mo matlhong a ga Jehofa?”+ 20  E rile Moshe a utlwa moo, foo ga itshupa go kgatlha mo matlhong a gagwe.

Dintlha Tse di Kwa Tlase