Joshua 14:1-15

14  Jaanong seno ke se bomorwa Iseraele ba neng ba se tsaya go nna thuo e ba e ruileng boswa mo lefatsheng la Kanana,+ se moperesiti Eliasare le Joshua morwa Nune le ditlhogo tsa borre ba ditso tsa bomorwa Iseraele ba neng ba dira gore ba se rue.+  Boswa jwa bone bo ne jwa abiwa ka bola,+ fela jaaka Jehofa a ne a bo laolela ditso di le robongwe, le sephatlo sa lotso+ ka Moshe.  Gonne Moshe o ne a neile boswa jwa ditso tse dingwe tse pedi le sephatlo se sengwe sa lotso ka kwa ntlheng e nngwe ya Joredane;+ mme a se ka a naya Balefi boswa mo gare ga bone.+  Gonne bomorwa Josefa ba ne ba fetogile ditso tse pedi,+ Manase+ le Eferaime;+ mme ba ne ba sa naya Balefi kabelo mo lefatsheng, fa e se metse+ gore ba nne mo go yone le mafulo a yone a diruiwa tsa bone le thoto ya bone.+  Bomorwa Iseraele ba ne ba dira fela jaaka Jehofa a ne a laetse Moshe; mme ba kgaoganya lefatshe.  Foo bomorwa Juda ba atamela Joshua kwa Gilegala,+ mme Kalebe+ morwa Jefune wa Mokenise+ a mo raya a re: “Wena ka bowena o itse sentle lefoko le Jehofa a neng a le bua+ le Moshe monna wa Modimo wa boammaaruri+ ka ga me le ka ga gago kwa Kadeshe-barenea.+  Ke ne ke na le dingwaga di le masome a manè fa Moshe motlhanka wa ga Jehofa a ne a nthoma go tswa kwa Kadeshe-barenea go ya go tlhola lefatshe,+ mme ke ne ka mmusetsa lefoko fela kafa le neng le ntse ka gone mo pelong ya me.+  Mme bomorwarre ba ba neng ba tlhatloga le nna ba ne ba dira gore pelo ya batho e nyere;+ mme nna, ke ne ka sala Jehofa Modimo wa me morago ka botlalo.+  Ka gone Moshe a ikana mo letsatsing leo, a re, ‘Lefatshe le lonao lwa gago lo gatileng mo go lone+ e tla nna la gago le la bomorwao go nna boswa ka bosakhutleng, ka gonne o setse Jehofa Modimo wa me morago ka botlalo.’+ 10  Mme jaanong bona, fela jaaka a ne a solofetsa,+ Jehofa o mpolokile ke ntse ke tshela+ dingwaga tseno tse di masome a manè le botlhano fa e sale Jehofa a ne a dira tsholofetso eno mo go Moshe fa Iseraele e ne e tsamaya mo nageng,+ mme jaanong bona, gompieno ke na le dingwaga di le masome a le robedi le botlhano. 11  Mme gompieno ke sa ntse ke nonofile fela jaaka mo letsatsing le Moshe a neng a nthoma ka lone.+ Jaaka maatla a me a ne a ntse ka nako eo, maatla a me a ntse jalo gone jaanong gore nka ya ntweng, go tswa le go tsena.+ 12  Mme jaanong a ko o nneye kgaolo eno e e dithaba e Jehofa a neng a e solofetsa mo letsatsing leo,+ gonne wena ka bowena o ne wa utlwa mo letsatsing leo gore go ne go na le Baanake+ koo le metse+ e megolo e e sireletsegileng. Gongwe Jehofa o tla nna le nna,+ mme ruri ke tla ba gapela thuo, fela jaaka Jehofa a solofeditse.”+ 13  Foo Joshua a mo segofatsa mme a naya Kalebe morwa Jefune Heberone go nna boswa.+ 14  Ke gone ka moo Heberone e leng ya ga Kalebe morwa Jefune wa Mokenise jaaka boswa go fitlha mo letsatsing leno, ka lebaka la gore o ne a sala Jehofa Modimo wa Iseraele morago ka botlalo.+ 15  Leina la Heberone pele ga moo e ne e le Kiriathe-areba+ (Areba+ yo o bolelwang yono e ne e le monna yo mogolo mo gare ga Baanake). Mme lefatshe la se ka la nna le matshwenyego a ntwa.+

Dintlha Tse di Kwa Tlase