Jona 1:1-17

1  Mme lefoko la ga Jehofa la tla mo go Jona+ morwa Amitai, le re:  “Nanoga, ya kwa Ninife+ motse o mogolo, mme o bolele teng gore bosula jwa bone bo tlile fa pele ga me.”+  Jona a nanoga a tshabela kwa Tareshishe+ gore a tswe fa pele ga ga Jehofa;+ mme la bofelo a fitlha mo Jopa+ mme a fitlhela sekepe se ya Tareshishe. Jalo a duela madi a sone a loeto mme a tsena mo go sone, gore a ye le bone kwa Tareshishe a tswe fa pele ga ga Jehofa.  Mme Jehofa ka boene a romela phefo e kgolo kwa lewatleng,+ mme ga nna setsuatsue se segolo+ mo lewatleng; mme sekepe, se ne se tloga se thubega.  Batsamaisi ba sekepe ba simolola go boifa le go goa ba kopa thuso, mongwe le mongwe a goela kwa modimong wa gagwe.+ Ba ne ba nna ba latlhela dilwana tse di neng di le mo sekepeng mo lewatleng, gore ba se tlhofofatse.+ Mme Jona ene o ne a ile kwa tengteng ga sekepe se se diretsweng boalo, mme a robala a thulamela.+  Kgabagare molaodi wa sekepe a atamela fa go ene mme a mo raya a re: “Ke eng ka wena, morobadi? Tsoga, o tlhaeletse kwa modimong wa gago!+ Gongwe Modimo wa boammaaruri o tla itshupa a tshwenyega ka rona, mme ga re kitla re nyelela.”+  Ba simolola go raana ba re: “Tlang, a re latlheleng bola,+ gore re tle re itse gore re tletswe ke masetlapelo ano ka ntlha ya ga mang.”+ Mme ba nna ba latlhela bola, mme la bofelo bola jwa supa Jona.+  Jalo ba mo raya ba re: “A ko o re bolelele, tsweetswee, gore re na le masetlapelo ano ka ntlha ya ga mang?+ Tiro ya gago ke eng, mme o tswa kae? Naga ya gaeno ke efe, mme o tswa mo setšhabeng sefe?”  Fa a araba seo a ba raya a re: “Ke Mohebera,+ mme ke boifa Jehofa Modimo+ wa magodimo,+ Ene yo o dirileng lewatle le lefatshe le le omileng.”+ 10  Mme banna bano ba simolola go boifa thata, mme ba tswelela ba mo raya ba re: “Ke eng se o se dirileng+?” Gonne banna bano ba ne jaanong ba itse gore o ne a tshaba fa pele ga ga Jehofa, ka gonne o ne a ba boleletse. 11  La bofelo ba mo raya ba re: “Re go dire eng,+ gore lewatle le tle le re sisibalele?” Gonne lewatle le ne le ntse le fuduegela pele. 12  Jalo a ba raya a re: “Ntsholetseng mme lo ntatlhele mo lewatleng, mme lewatle le tla lo sisibalela; ka gonne ke a lemoga gore ke ka ntlha ya me go bo lo tletswe ke setsuatsue se segolo seno.”+ 13  Mme banna bano ba leka go kgabaganya, gore ba busetse sekepe fa lefatsheng le le omileng; le fa go ntse jalo ba ne ba sa kgone, ka gonne lewatle le ne le ntse le fuduegela pele kgatlhanong le bone.+ 14  Mme ba tlhaeletsa kwa go Jehofa ba re:+ “Ao tlhe Jehofa, tsweetswee, mma re se ka ra nyelela ka ntlha ya moya wa monna yo! Mme o se ka wa re pega madi a a se nang molato,+ ka gonne wena, Jehofa, o dirile ka fa o natefeletsweng ka gone!”+ 15  Go tswa foo ba tsholetsa Jona mme ba mo latlhela mo lewatleng; mme lewatle la emisa tšararego ya lone.+ 16  Fa ba bona seo banna bano ba simolola go boifa Jehofa thata,+ mme jalo ba isetsa Jehofa setlhabelo+ ba bo ba dira maikano.+ 17  Jaanong Jehofa a rulaganya gore go nne le tlhapi e kgolo gore e metse Jona,+ mo Jona a neng a nna mo tengteng ga tlhapi malatsi a le mararo le masigo a le mararo.+

Dintlha Tse di Kwa Tlase