Jeremia 40:1-16

40  Lefoko le le neng la tla mo go Jeremia le tswa kwa go Jehofa morago ga Nebusaradane+ molaodi wa bafemedi a sena go mo roma go tswa kwa Rama,+ fa a ne a mo tsaya a bofilwe ka dihaka mo gare ga batshwarwa botlhe ba Jerusalema le ba Juda, ba ba neng ba isiwa botshwarwa kwa Babelona.+  Go tswa foo molaodi wa bafemedi a tsaya Jeremia a mo raya a re: “Jehofa Modimo wa gago ka boene o buile masetlapelo ano kgatlhanong le lefelo leno,+  gore Jehofa a tle a a diragatse le go dira fela jaaka a buile, ka gonne lo leofetse Jehofa e bile ga lo a utlwa lentswe la gagwe. Mme selo seno se lo diragaletse.+  Jaanong, bona! Gompieno ke go golotse mo dihakeng tse di neng di le mo diatleng tsa gago. Fa go le molemo mo matlhong a gago go tla le nna kwa Babelona, tlaya, mme ke tla go tlhoma leitlho.+ Mme fa go le bosula mo matlhong a gago go tla le nna kwa Babelona, tlogela. Bona! Lefatshe lotlhe le fa pele ga gago. Ya gongwe le gongwe kwa o bonang go le molemo e bile go siame mo matlhong a gago go ya gone.”+  Mme o ne a ise a nne yo o tla boang, fa Nebusaradane a ne a re: “A ko o boele kwa go Gedalia+ morwa Ahikame+ morwa Shafane,+ yo kgosi ya Babelona e mo tlhomileng go okamela metse ya Juda, mme o nne le ene mo gare ga batho; kgotsa o ye gongwe le gongwe kwa o bonang go siame mo matlhong a gago go ya gone.”+ Go tswa foo molaodi wa bafemedi a mo naya kabelo ya dijo le neo mme a mo lesa a tsamaya.+  Ka jalo Jeremia a tla kwa go Gedalia+ morwa Ahikame kwa Misepa+ mme a nna le ene mo gare ga batho ba ba neng ba setse mo lefatsheng leo.  Fa nako e ntse e tsamaya balaodi botlhe ba mephato ya sesole ba ba neng ba le mo nageng,+ bone le banna ba bone, ba utlwa gore kgosi ya Babelona e ne e tlhomile Gedalia morwa Ahikame go okamela lefatshe leo le gore o ne a mo tlhomile go okamela banna le basadi le bana ba bannye le bangwe ba batho ba maemo a a kwa tlase ba lefatshe, ba ba neng ba sa isiwa botshwarwa kwa Babelona.+  Ka jalo ba tla kwa go Gedalia kwa Misepa, le Ishemaele+ morwa Nethania le Johanane+ le Jonathane, bomorwa Karea, le Seraia morwa Tanehumethe le bomorwa Efai wa Monetofa+ le Jesania+ morwa Momaakathe,+ bone le banna ba bone.+  Mme Gedalia+ morwa Ahikame+ morwa Shafane+ a ba ikanela+ le banna ba bone, a re: “Se boifeng go direla Bakaladia. Tswelelang lo nna mo lefatsheng leno mme lo direle kgosi ya Babelona, mme dilo di tla lo tsamaela sentle.+ 10  Fa e le nna, ke nna mo Misepa,+ gore ke tle ke eme fa pele ga Bakaladia ba ba tla tlang kwa go rona. Mme fa e le lona, phuthang beine+ le maungo a letlhabula le leokwane mme lo di tsenye mo dijaneng tsa lona mme lo nne mo metseng ya lona e lo e itseetseng.” 11  Mme Bajuda botlhe ba ba neng ba le mo Moabe le mo gare ga bomorwa Amona le kwa Edoma le ba ba neng ba le mo mafatsheng a mangwe otlhe,+ le bone ba ne ba utlwa gore kgosi ya Babelona e ne e neile Juda masalela le gore e ne e tlhomile Gedalia+ morwa Ahikame morwa Shafane mo go bone gore a ba okamele. 12  Mme Bajuda botlhe ba simolola go boa kwa mafelong otlhe a ba neng ba phatlalaleditswe kwa go one, mme ba nna ba tsena mo lefatsheng la Juda kwa go Gedalia kwa Misepa.+ Mme ba phutha beine le maungo a letlhabula a le mantsi thata. 13  Fa e le Johanane+ morwa Karea+ le balaodi botlhe ba mephato ya sesole ba ba neng ba le mo tshimong,+ ba tla kwa go Gedalia kwa Misepa. 14  Mme ba mo raya ba re: “A gotlhelele ga o itse gore Baalise, kgosi ya bomorwa Amona+ ka boene o romile Ishemaele+ morwa Nethania+ gore a kgemethe moya wa gago?” Mme Gedalia morwa Ahikame a se ka a ba dumela.+ 15  Mme Johanane+ morwa Karea a raya Gedalia, kwa lefelong la go iphitlha kwa Misepa a re: “Ke batla go tsamaya, jaanong, ke ye go bolaya Ishemaele morwa Nethania, ka gore ga go na ope gotlhelele yo o tla itseng.+ Ke ka ntlha yang fa a tshwanetse go kgemetha moya wa gago le gone ke ka ntlha yang fa botlhe ba Juda ba ba phuthelwang mmogo mo go wena ba gasamisiwa le masalela a Juda a nyelela?”+ 16  Mme Gedalia+ morwa Ahikame+ a raya Johanane morwa Karea a re: “O se ka wa dira selo seno, ka gonne o bua maaka ka ga Ishemaele.”+

Dintlha Tse di Kwa Tlase