Jeremia 33:1-26

33  Mme lefoko la ga Jehofa la tla mo go Jeremia lekgetlo la bobedi, fa a ne a sa ntse a tswaletswe mo Lolwapeng lwa Badisa,+ le re:  “Jehofa Modiri+ wa lefatshe, Jehofa Mmopi+ wa lone gore a le tlhomamise thata,+ yo leina la gagwe e leng Jehofa o buile jaana,+  ‘Mpitse, mme ke tla go araba+ ke bo ke go bolelela dilo tse dikgolo le tse di sa tlhaloganyegeng tse o sa di itseng ke sa okaoke.’”+  “Gonne Jehofa Modimo wa Iseraele o buile jaana ka ga matlo a motse ono le matlo a dikgosi tsa Juda a a rutlilweng ka ntlha ya dithako tsa phemelo le ka ntlha ya tšhaka;+  ka ga ba ba tlang go lwa le Bakaladia le go tlatsa mafelo ka ditopo tsa batho ba ke ba kgemethileng mo bogaleng jwa me le mo tšararegong ya me,+ le ka ntlha ya botlhe ba ke subileng sefatllhego sa me mo motseng ono ka ntlha ya bosula jwa bone,+  ‘Bonang, ke mo tlisetsa botsogo le boitekanelo;+ mme ke tla ba fodisa le go ba senolela letlotlo la kagiso le boammaaruri.+  Mme ke tla busa batshwarwa ba Juda le batshwarwa ba Iseraele,+ ke tla ba aga fela jaaka kwa tshimologong.+  Mme ke tla ba itshekisa mo tlolong yotlhe ya bone e ba nteofetseng ka yone,+ e bile ke tla ba itshwarela ditlolo tsotlhe tsa bone tse ba nteofetseng ka tsone le tse ba ntiretseng tlolo ka tsone.+  Mme mo go nna o tla nna leina la boitumelo,+ pako le bontle mo ditšhabeng tsotlhe tsa lefatshe tse di tla utlwang ka molemo otlhe o ke o ba direlang.+ Mme eleruri ba tla boifa+ le go fuduega+ ka ntlha ya molemo otlhe le ka ntlha ya kagiso yotlhe e ke e mo direlang.’”+ 10  “Jehofa o buile jaana, ‘Mo lefelong leno le lo tla bong lo re ke kgakgabalo e e se nang motho le e e se nang seruiwa, mo metseng ya Juda le mo mebileng ya Jerusalema e e kgakgabetseng+ e e se nang motho le e e se nang monni le e e se nang seruiwa, go sa ntse go tla utlwiwa+ 11  modumo wa boitumelo le modumo wa boipelo,+ lentswe la monyadi le lentswe la monyadiwa, lentswe la ba ba reng: “Bakang Jehofa wa masomosomo, gonne Jehofa o molemo;+ gonne bopelonomi jwa gagwe jwa lorato ke jwa bosakhutleng!”’+ “‘Ba tla bo ba tlisa tshupelo ya go ntshiwa ga ditebogo mo ntlong ya ga Jehofa,+ gonne ke tla busa batshwarwa ba lefatshe fela jaaka kwa tshimologong,’+ go buile Jehofa.” 12  “Jehofa wa masomosomo o buile jaana, ‘Mo lefelong leno le le kgakgabetseng le go se nang motho le e leng seruiwa+ le mo metseng yotlhe ya lone go sa ntse go tla nna le mafulo a badisa ba ba bothisang letsomane.’+ 13  “‘Mo metseng ya kgaolo e e dithaba, mo metseng ya nagatlase+ le mo metseng ya borwa+ le mo lefatsheng la ga Benjamine+ le mo tikologong ya Jerusalema+ le mo metseng ya Juda+ go sa ntse go tla feta matsomane kafa tlase ga diatla tsa yo o tsayang palo,’+ go buile Jehofa.” 14  “‘Bonang! Metlha e etla,’+ go bua Jehofa, ‘mme eleruri ke tla diragatsa lefoko le le molemo le ke le buileng,+ ka ga ntlo ya Iseraele+ le ka ga ntlo ya Juda. 15  Mo metlheng eo le ka nako eo ke tla tlhogisetsa Dafide letlhogela la tshiamo,+ mme eleruri o tla diragatsa tshiamiso le tshiamo mo lefatsheng.+ 16  Mo metlheng eo Juda o tla bolokwa+ le Jerusalema o tla aga ka polokesego.+ Mme o tla bidiwa go twe, Jehofa Ke Tshiamo Ya Rona.’”+ 17  “Gonne Jehofa o buile jaana, ‘Mo go Dafide ga go kitla go tlosiwa motho gore a se ka a nna mo setulong sa bogosi sa ntlo ya Iseraele.+ 18  Mme mo baperesiting, Balefi, ga go na go ntshiwa monna fa pele ga me gore a ise tshupelo e e fisiwang e feletse le go kuisa mosi ka tshupelo ya bupi le go ntsha setlhabelo ka metlha.’”+ 19  Mme lefoko la ga Jehofa la tla gape mo go Jeremia, le re: 20  “Jehofa o buile jaana, ‘Fa lo ka senya kgolagano ya me ya motshegare le kgolagano ya me ya bosigo, gore motshegare le bosigo di se ka tsa tla mo nakong ya tsone,+ 21  ka tsela e e tshwanang kgolagano ya me le Dafide motlhanka wa me+ e ka tlolwa gore a se ka a nna le morwa yo o busang e le kgosi mo setulong sa gagwe sa bogosi;+ le ka Balefi, baperesiti, badiredi ba me.+ 22  Fela jaaka masomosomo a magodimo a ka se ka a balwa, le motlhaba wa lewatle o ka se ka wa lekanngwa,+ ke tla ntsifatsa losika lwa ga Dafide motlhanka wa me jalo le Balefi ba ba ntirelang.’”+ 23  Mme lefoko la ga Jehofa la tswelela go tla mo go Jeremia, le re: 24  “A ga o ise o bone se batho bano ba se buileng, ba re, ‘Malapa a mabedi a Jehofa a a tlhophileng,+ gape o tla a gana’? Mme ba nnetse go tshwara batho ba me ka go tlhoka tlotlo,+ gore e se ka ya tlhola e nna setšhaba fa pele ga bone. 25  “Jehofa o buile jaana, ‘Fa e ka bo e se boammaaruri gore ke tlhomile kgolagano ya me ya motshegare le bosigo,+ melao ya legodimo le lefatshe,+ 26  ka tsela e e ntseng jalo gape ke ne ke tla gana le losika lwa ga Jakobe le lwa ga Dafide motlhanka wa me,+ gore ke se ka ka tsaya mo losikeng lwa gagwe babusi ba losika lwa ga Aborahame, Isake le Jakobe. Gonne ke tla phutha batshwarwa ba bone+ mme ke tla ba tlhomogela pelo.’”+

Dintlha Tse di Kwa Tlase