Jeremia 27:1-22

27  Kwa tshimologong ya bogosi jwa ga Jehoiakime morwa Josia,+ kgosi ya Juda, lefoko leno le ne la tla kwa go Jeremia le tswa kwa go Jehofa, le re:  “Jehofa o ntheile a re, ‘Itirele dibofo le mepako ya jokwe,+ mme o di beye mo molaleng wa gago.+  O di romele kwa kgosing ya Edoma+ le kwa kgosing ya Moabe+ le kwa kgosing ya bomorwa Amone+ le kwa kgosing ya Ture+ le kwa kgosing ya Sidona+ ka seatla sa barongwa ba ba tlang mo Jerusalema kwa go Sedekia kgosi ya Juda.  Mme o ba neye taelo e e yang kwa go beng ba bone, o re: “‘“Jehofa wa masomosomo, Modimo wa Iseraele,+ o buile jaana; lo reye beng ba lona lo re,  ‘Nna ka bonna ke dirile lefatshe,+ batho+ le diphologolo+ tse di mo godimo ga lefatshe ka maatla a me a magolo+ le ka lebogo la me le le otlolotsweng;+ mme ke le neile ba go bonalang go siame mo matlhong a me go le ba naya.+  Mme jaanong ke neile Nebukadenesare, kgosi ya Babelona+ motlhanka wa me mafatshe ano otlhe;+ le dibatana tsa naga ke di mo neile gore di mo direle.+  Mme ditšhaba tsotlhe di tshwanetse go direla ene+ le morwawe le morwa ngwana wa gagwe go fitlha nako ya lefatshe la gagwe e goroga,+ mme ditšhaba di le dintsi le dikgosi tse dikgolo di tla mo dirisa ka bopelotshetlha jaaka motlhanka.’+  “‘“‘Mme go tla diragala gore setšhaba le bogosi jo bo se kitlang bo mo direla, e leng ene Nebukadenesare kgosi ya Babelona; le jo bo se kitlang bo tsenya molala wa jone ka fa tlase ga jokwe ya kgosi ya Babelona, ke tla lebisa tlhokomelo ya me mo setšhabeng’ seo ka tšhaka+ le ka leuba+ le ka bolwetse jwa leroborobo,+ go bua Jehofa, ‘go fitlha ke ba fedisitse ka seatla sa gagwe.’+  “‘“‘Mme fa e le lona, lo se ka lwa reetsa baporofeti ba lona+ le baitseanape ba lona le balori+ ba lona le batho ba lona ba maselamose le baloi ba lona,+ ba ba lo rayang ba re: “Ga lo na go direla kgosi ya Babelona.”+ 10  Gonne ba lo porofetela maaka, ka boikaelelo jwa gore lo tsewe lo isiwe kgakala le lefatshe la lona; mme ke tla tshwanelwa ke go lo phatlalatsa, mme lo tla nyelela.+ 11  “‘“‘Mme fa e le setšhaba se se tla tsenyang molala wa sone ka fa tlase ga jokwe ya kgosi ya Babelona le go e direla, ke tla se lesa gore se ikhutse mo lefatsheng la sone,’ go bua Jehofa, ‘mme ruri se tla le lema le go nna mo go lone.’”’”+ 12  Le kwa go Sedekia+ kgosi ya Juda ke buile go ya ka mafoko ano otlhe,+ ke re: “Tsenyang melala ya lona ka fa tlase ga jokwe ya kgosi ya Babelona mme lo e direle le batho ba yone mme lo tswelele lo tshela.+ 13  Ke ka ntlha yang fa wena le batho ba gago lo tshwanetse go swa ka tšhaka,+ ka leuba+ le ka bolwetse jwa leroborobo+ go ya ka se Jehofa a se buileng le setšhaba se se sa direleng kgosi ya Babelona? 14  Mme lo se ka lwa reetsa mafoko a baporofeti ba ba lo rayang ba re, ‘Ga lo na go direla kgosi ya Babelona,’+ ka gonne ba lo porofetela maaka.+ 15  “‘Gonne ga ke a ba roma,’ go bua Jehofa, ‘mme ba porofeta mo leineng la me ka maaka, gore ke tle ke lo phatlalatse,+ mme lo nyelele,+ lona le baporofeti ba ba lo porofetelang.’”+ 16  Gape ke ne ka bua le baporofeti le batho bano botlhe, ka re: “Jehofa o buile jaana, ‘Lo se ka lwa reetsa mafoko a baporofeti ba lona ba ba lo porofetelang, ba re: “Bonang! Dilwana tsa ntlo ya ga Jehofa di busiwa go tswa kwa Babelona ka bonako jaanong!”+ Gonne ba lo porofetela maaka.+ 17  Lo se ka lwa ba reetsa. Direlang kgosi ya Babelona mme lo tswelele lo tshela.+ Ke ka ntlha yang fa motse ono o tshwanetse go nna lefelo le le swafetseng?+ 18  Mme fa e le gore ke baporofeti le lefoko la ga Jehofa le le gone mo go bone, tsweetswee, mma ba rapele Jehofa wa masomosomo,+ gore dilwana tse di setseng mo ntlong ya ga Jehofa le mo ntlong ya kgosi ya Juda le mo Jerusalema di se ka tsa tla mo Babelona.’ 19  “Gonne Jehofa wa masomosomo o buile jaana ka ga dipilara+ le lewatle+ le dikolotsana+ le dilwana tse di setseng mo motseng ono,+ 20  tse Nebukadenesare kgosi ya Babelona a neng a sa di tsaya fa a ne a isa Jekonia+ morwa Jehoiakime, kgosi ya Juda botshwarwa go tswa kwa Jerusalema go ya Babelona, mmogo le batlotlegi botlhe ba Juda le Jerusalema;+ 21  gonne Jehofa wa masomosomo, Modimo wa Iseraele, o buile jaana ka ga dilwana tse di setseng mo ntlong ya ga Jehofa le mo ntlong ya kgosi ya Juda le Jerusalema,+ 22  ‘“Di tla tlisiwa+ mo Babelona mme di tla tswelela di le koo go fitlha ka letsatsi le ke lebisang tlhokomelo ya me mo go tsone ka lone,”+ go bua Jehofa. “Mme ke tla di tlhatlosa ke di busetsa mo lefelong leno.”’”+

Dintlha Tse di Kwa Tlase