Jeremia 16:1-21

16  Mme lefoko la ga Jehofa le ne la tswelela la tla kwa go nna, le re:  “O se ka wa itseela mosadi, mme o se ka wa nna le bana ba basimane le bana ba basetsana mo lefelong leno.+  Gonne Jehofa o buile jaana ka ga bana ba basimane le ka ga bana ba basetsana ba ba tsholelwang mo lefelong leno, le ka ga bommaabone bao ba ba belegang le ka ga borraabone ba ba dirang gore ba belegwe mo lefatsheng leno,+  ‘Ba tla swa dintsho tse di bakwang ke malwetse.+ Ga ba na go hutsafalelwa+ le fa e le go fitlhwa.+ Ba tla nna jaaka motshotelo mo godimo ga mmu;+ mme ba tla khutla ka tšhaka le ka leuba,+ ditopo tsa bone di tla nna dijo tsa dibopiwa tse di fofang tsa magodimo le dibatana tsa lefatshe.’+  “Gonne Jehofa o buile jaana, ‘O se ka wa tsena mo ntlong ya mokete wa bahutsafadi,’ mme o se ka wa ya go hutsafala gape o se ka wa ba utlwela botlhoko.’+ “‘Gonne ke tlositse kagiso ya me mo bathong ba,’ go bua Jehofa, ‘le bopelonomi jwa lorato le mautlwelobotlhoko.+  Eleruri ba tla swa, ba bagolo le ba babotlana, mo lefatsheng leno. Ga ba na go fitlhwa,+ le batho ga ba na go ititaya ka ntlha ya bone, le gone ga go na ope yo o tla itshegang ka ntlha ya bone+ kgotsa go itira lefatla ka ntlha ya bone.+  Mme ga ba na go ba abela senkgwe sepe ka ntlha ya khutsafalo go gomotsa mongwe ka ntlha ya baswi;+ le gone ga ba na go ba naya senwelo sa kgomotso gore ba se nwe ka ntlha ya rra motho le ka ntlha ya mma motho.+  Mme o se ka wa tsena mo ntlong epe ya mokete gotlhelele gore o nne fa fatshe le bone gore o je o bo o nwe.’+  “Gonne Jehofa wa masomosomo, Modimo wa Iseraele, o buile jaana, ‘Bonang, ke khutlisa lentswe la boitumelo le lentswe la boipelo, lentswe la monyadi le lentswe la monyadiwa mo lefelong leno fa pele ga matlho a lona le mo metlheng ya lona.’+ 10  “Mme go tla diragala gore fa o bolelela setšhaba seno mafoko ano otlhe se tla go raya se re, ‘Ke ka ntlha yang fa Jehofa a buile masetlapelo ano a magolo jaana kgatlhanong le rona, mme tlolo ya rona ke eng le boleo jwa rona ke bofe jo re leofetseng Jehofa Modimo wa rona ka jone?’+ 11  mme o se reye o re, ‘“Ka ntlha ya gore borraalona ba ntlogetse,”+ go bua Jehofa, “ba ne ba nna ba sala medimo e mengwe morago ba e direla le go e ikobela.+ Mme nna ba ntlogetse, le molao wa me ga ba a ka ba o boloka.+ 12  Mme lona lo dirile bosula go feta borraalona,+ mongwe le mongwe wa lona o setse bologwadi+ jwa pelo ya gagwe e e bosula morago ka go sa nkutlwe.+ 13  Ke tla lo latlhela kwa ntle ga lefatshe leno+ ke lo latlhela mo lefatsheng le lona lo iseng lo le itse,+ le fa e le borraalona, mme lo tla tshwanelwa ke go direla medimo e mengwe koo+ motshegare le bosigo, ka gonne ga ke na go lo amogela ka gope.”’ 14  ‘“Ka jalo, bonang! metlha e etla,’+ go bua Jehofa, ‘fa go tla bo go sa tlhole go twe: “Jaaka Jehofa a tshedile yo o ntshitseng bomorwa Iseraele kwa lefatsheng la Egepeto!”+ 15  mme go twe: “Jaaka Jehofa a tshedile yo o ntshitseng bomorwa Iseraele kwa lefatsheng la bokone le kwa mafatsheng otlhe a a neng a ba phatlalaleditse kwa go one!” mme eleruri ke tla ba busetsa mo lefatsheng la bone, le ke neng ka le naya borraabonemogologolwane.’+ 16  “‘Bonang, ke roma gore go tle batshwara ditlhapi ba bantsi,’ go bua Jehofa, ‘mme ruri ba tla ba tshwara jaaka fa ba tshwara ditlhapi; morago ga moo ke tla roma gore go tle batsomi ba bantsi,+ ruri ba tla ba tsoma mo thabeng nngwe le nngwe le mo thoteng nngwe le nngwe le mo mapharong a mafika a magolo.+ 17  Gonne matlho a me a mo ditseleng tsa bone tsotlhe. Ga ba a fitlhega fa pele ga me, le fa e le tlolo ya bone ga e a fitlhega fa pele ga matlho a me.+ 18  Mme, sa ntlha, ke tla duela selekanyo se se tletseng sa tlolo ya bone+ le sa boleo jwa bone, ka ntlha ya gore ba itshepolotse lefatshe la me.+ Ba ne ba tladitse boswa jwa me ka ditopo tsa dilo tsa bone tse di ferosang sebete le dilo tsa bone tse di makgapha.’”+ 19  Wena Jehofa nonofo ya me le kago ya me e e thata, le lefelo la me la botshabelo mo motlheng wa matshwenyego,+ mo go wena ditšhaba di tla tla go tswa mafelelong a lefatshe,+ mme di tla re: “Eleruri borraaronamogologolwane ba ne ba tla go rua maaka fela,+ lefela le dilo tse go neng go se na sepe se se mosola mo go tsone.”+ 20  A motho wa mo lefatsheng o ka itirela medimo mme e se medimo?+ 21  “Ka jalo ke dira gore ba itse; ka nako eno fela ke tla dira gore ba itse seatla sa me le thata ya me,+ mme ba tla tshwanelwa ke go itse gore leina la me ke Jehofa.”+

Dintlha Tse di Kwa Tlase