Genesise 9:1-29

9  Mme Modimo a segofatsa Noa le bomorwawe mme a ba raya a re: “Atang lo ntsifale lo tlatse lefatshe.+  Mme sebopiwa sengwe le sengwe se se tshelang sa lefatshe le sebopiwa sengwe le sengwe se se fofang sa magodimo, le sengwe le sengwe se se tsamayang mo lefatsheng, le ditlhapi tsotlhe tsa lewatle di tla lo boifa e bile di tla lo tshoga. Di tsentswe mo seatleng sa lona jaanong.+  Phologolo nngwe le nngwe e e tsamayang e e tshelang e ka nna ya nna dijo tsa lona.+ Jaaka go ntse ka dimela tse di tala, ke di lo naya tsotlhe.+  Fela nama e e nang le moya wa yone+—madi a yone+—lo se ka lwa e ja.+  Mme, mo godimo ga moo, madi a lona, a meya ya lona, ke tla a lopa. Ke tla a lopa mo seatleng sa sebopiwa sengwe le sengwe se se tshelang; ke tla lopa moya wa motho le mo seatleng sa motho,+ mo seatleng sa mongwe le mongwe yo e leng morwarraagwe.  Ope fela yo o tshololang madi a motho, madi a gagwe ka esi a tla tshololwa ke motho,+ gonne Modimo o dirile motho mo setshwanong sa gagwe.  Mme fa e le lona, atang lo ntsifale, lo nyeule mo lefatsheng mme lo nne bantsi mo go lone.”+  Mme Modimo a tswelela a raya Noa le bomorwawe ba na le ene a re:  “Mme fa e le nna, bonang, ke tlhomamisa kgolagano ya me+ le lona le bana ba lona morago ga lona,+ 10  le moya mongwe le mongwe o o tshelang o o nang le lona, mo dinonyaneng, mo diphologolong le mo dibopiweng tsotlhe tse di tshelang tsa lefatshe tse di nang le lona, go simolola ka botlhe ba ba tswang mo arakeng go fitlha ka sebopiwa sengwe le sengwe se se tshelang sa lefatshe.+ 11  Ee, ke tlhomamisa kgolagano ya me le lona: Nama yotlhe ga e kitla e tlhola e fedisiwa ka metsi a morwalela, e bile ga go kitla go tlhola go nna le morwalela gore o senye lefatshe.”+ 12  Mme Modimo a oketsa a re: “Seno ke sesupo+ sa kgolagano e ke e dirang fa gare ga me le lona le moya mongwe le mongwe o o tshelang o o nang le lona, e ke e direlang dikokomana ka bosakhutleng. 13  Ke baya motshe wa me wa godimo+ mo lerung, mme o tla nna sesupo sa kgolagano fa gare ga me le lefatshe. 14  Mme go tla diragala gore fa ke tlisa leru mo godimo ga lefatshe, foo motshe wa godimo ruri o tla bonala mo lerung. 15  Mme eleruri ke tla gakologelwa kgolagano ya me+ e e fa gare ga me le lona le moya mongwe le mongwe o o tshelang mo gare ga nama yotlhe;+ e bile metsi ga a kitla a tlhola a nna morwalela gore a senye nama yotlhe.+ 16  Mme motshe wa godimo o tla bonala mo lerung,+ mme ke tla o bona gore ke gakologelwe kgolagano ka bosakhutleng+ fa gare ga Modimo le moya mongwe le mongwe o o tshelang mo gare ga nama yotlhe e e mo lefatsheng.”+ 17  Mme Modimo a boela a raya Noa gape a re: “Seno ke sesupo sa kgolagano se ke se tlhomamisang fa gare ga me le nama yotlhe e e mo lefatsheng.”+ 18  Mme bomorwa Noa+ ba ba neng ba tswa mo arakeng e ne e le Sheme le Hame le Jafethe. Moragonyana Hame o ne a nna rraagwe Kanana.+ 19  Ba bararo bano e ne e le bomorwa Noa, mme batho botlhe ba lefatshe ba ne ba anamela kgakala ba tswa mo go bano.+ 20  Jaanong Noa a simolola e le molemirui+ mme a jala tshimo ya mofine.+ 21  A simolola go nwa beine a ba a tlhapelwa,+ mme a ikapola a le mo teng ga mogope wa gagwe. 22  Moragonyana Hame+ rraagwe Kanana a bona bosaikategang+ jwa ga rraagwe mme a ya go bolelela bomorwarraagwe ba babedi kwa ntle.+ 23  Foo Sheme le Jafethe ba tsaya seaparo+ ba se baya mo magetleng a bone boobabedi mme ba tsena ba kata ka sa morago. Ka gone ba bipa bosaikategang jwa ga rraabone, difatlhego tsa bone di lebile go sele, mme ba se ka ba bona bosaikategang jwa ga rraabone.+ 24  La bofelo Noa a tsoga mo beineng ya gagwe mme a itse se morwawe yo mmotlana thata a neng a se mo dirile. 25  Foo a re: “A go hutsege Kanana.+A a nne motlhanka wa maemo a a kwa tlasetlase wa bomorwarraagwe.”+ 26  Mme a oketsa jaana:“A go bakwe Jehofa,+ Modimo wa ga Sheme,Mme a Kanana a nne motlhanka wa gagwe.+ 27  A Modimo a neye Jafethe sebaka se segolo,Mme a a age mo megopeng ya ga Sheme.+A Kanana a nne motlhanka wa gagwe le ene.” 28  Mme Noa a tswelela go tshela dingwaga di le makgolo a le mararo le masome a matlhano morago ga morwalela.+ 29  Ka jalo malatsi otlhe a ga Noa a ne a fitlha go dingwaga di le makgolo a le robongwe le masome a matlhano mme a swa.+

Dintlha Tse di Kwa Tlase