Genesise 49:1-33

49  Moragonyana Jakobe a bitsa bomorwawe mme a re: “Phuthegang mmogo gore ke tle ke lo bolelele se se tla lo diragalelang go ela kwa bofelong jwa metlha.  Phuthegang mme lo reetse, lona bomorwa Jakobe, ee, reetsang Iseraele rraalona.+  “Rubene, o leitibolo+ la me, matlhagatlhaga a me le tshimologo ya me ya maatla a go tshola,+ tlotlomalo ya seriti le tlotlomalo ya nonofo.  O se ka wa tlotlomala+ ka go gololesega botlhaswa jaaka metsi, ka gonne o ne wa ya kwa bolaong jwa ga rrago.+ Ka nako eo o ne wa itshepolola bolao jwa me.+ O ne a ya kwa go jone!  “Simeone le Lefi ke bana ba motho.+ Dibetsa tsa bone tse di bolayang setlhogo ke didirisiwa tsa thubakanyo.+  Wena moya wa me, o se ka wa tsena mo teng ga setlhopha sa bone se se atamalaneng thata.+ O se ka wa kopana le phuthego ya bone,+ wena maikutlo a me, ka gonne ba ne ba bolaya batho+ mo bogaleng jwa bone, e bile ba ne ba kgaola dipoo mesifa ya maoto mo bokgokgontshing jwa bone.  A bogale jwa bone bo hutsege,+ ka gonne bo setlhogo,+ le tšhakgalo ya bone, ka gonne e dira ka bogale.+ Mma ke ba kgaoganye mo go Jakobe ke bo ke ba gasamise mo Iseraele.+  “Fa e le wena, Juda,+ bomorwarrago ba tla go baka.+ Seatla sa gago se tla nna kafa morago ga molala wa baba ba gago.+ Bomorwarrago ba tla obama fa pele ga gago.+  Juda ke ngwana wa tau.+ Ruri o tla tlhatloga o tswa mo go se o se tsomang morwaaka. O ne a obega, a namalala jaaka tau, mme jaaka tau, ke mang yo o pelokgale go mo tsosa?+ 10  Lore lwa segosi ga lo kitla lo fapoga mo Juda,+ le fa e le lore lwa molaodi mo gare ga dinao tsa gagwe, go fitlha Shilo a tla;+ mme ditšhaba di tla utlwa ene.+ 11  E tla re fa a bofelela esele ya gagwe e e godileng sentle mo mofineng le ngwana wa esele ya gagwe e e namagadi mo mofineng wa maemo a a kwa godimo, o tla tlhatswa diaparo tsa gagwe mo beineng le kobo ya gagwe mo mading a morara.+ 12  Matlho a gagwe a bohibidu jo bo tseneletseng ka ntlha ya beine, mme bosweu jwa meno a gagwe bo bakilwe ke mashi. 13  “Sebulone o tla aga fa losing lwa lewatle,+ mme o tla bo a le fa losing fa dikepe di emeng gone di tshegeditswe ka tshetledi;+ mme letlhakore la gagwe le le kgakala le tla bo le lebile kwa Sidona.+ 14  “Isakare+ ke esele e e nang le marapo a a thata, e e rapameng fa gare ga dikgetsi tse pedi tsa sale. 15  Mme o tla bona fa lefelo la boikhutso le le molemo le gore lefatshe le monate; mme o tla oba legetla la gagwe gore a sikare mekgweleo mme o tla patelediwa go dira tiro e e boima ya botlhanka. 16  “Dana o tla atlhola batho ba gagwe jaaka longwe lwa ditso tsa Iseraele.+ 17  A Dana a itshupe a le noga e e fa thoko ga tsela, noga e e nang le dinaka fa tseleng, e e lomang direthe tsa pitse gore mopalami wa yone a wele kwa morago.+ 18  Ruri ke tla letela poloko e e tswang kwa go wena, wena Jehofa.+ 19  “Fa e le Gada ene, o tla tlhaselwa ke setlhopha sa dirukhutlhi, mme o tla tlhasela karolo+ e e kwa morago thata. 20  “Senkgwe sa gagwe se se tswang mo go Ashera se tla bo se le mafura,+ mme o tla aba dijo tse di monate tsa kgosi.+ 21  “Nafetali+ ke kgama e tonanyana e tshesane. O ntsha mafoko a mantle.+ 22  “Letlhogela la setlhare se se ungwang maungo,+ Josefa ke letlhogela la setlhare se se ungwang maungo fa motsweding,+ se se tsharololelang dikala tsa sone ka kwa godimo ga lobota.+ 23  Mme bahudi ka metswi ba ne ba nna ba mo tshwenya ba mo hula ba bo ba nna ba mo tlhoile.+ 24  Mme le fa go ntse jalo bora jwa gagwe bo ne bo nna mo lefelong le le nnetseng ruri,+ le nonofo ya diatla tsa gagwe e ne e le boleta.+ Mo diatleng tsa Yo o Nonofileng wa ga Jakobe,+ mo go tsone go tswa modisa, leje la Iseraele.+ 25  O tswa kwa Modimong wa ga rrago,+ mme o tla go thusa;+ mme o na le Mothatayotlhe,+ e bile o tla go segofatsa ka ditshegofatso tsa magodimo a a kwa godimo,+ ka ditshegofatso tsa bodiba jo bo boteng jwa metsi jo bo letseng kwa tlase,+ ka ditshegofatso tsa mabele le sebopelo.+ 26  Ditshegofatso tsa ga rrago ruri di tla nna dikgolo go feta ditshegofatso tsa dithaba+ tse di sa feleng, go feta mokgabisa wa dithota+ tse di nnang ka bosakhutleng. Di tla nna mo tlhogong ya ga Josefa, le mo phogong ya tlhogo ya yo o tlhaotsweng mo go bomorwarraagwe.+ 27  “Benjamine o tla nna a gagola jaaka phiri.+ Mo mosong o tla ja phologolo e e tshwerweng mme mo maitseboeng o tla kgaoganya thopo.”+ 28  Tseno tsotlhe ke ditso di le lesome le bobedi tsa Iseraele, mme seno ke se rraabone a neng a se bua le bone fa a ne a ba segofatsa. O ne a ba segofatsa mongwe le mongwe kafa tshegofatsong ya gagwe.+ 29  Morago ga moo a ba laola a ba raya a re: “Ke phuthelwa kwa bathong bagaetsho.+ Mphitlhang le borre mo logageng lo lo mo tshimong ya ga Eferone wa Mohite,+ 30  mo logageng lo lo mo tshimong ya Makapela e e fa pele ga Mamere kwa lefatsheng la Kanana, tshimo e Aborahame a neng a e reka mo go Eferone wa Mohite gore e nne lefelo le a le ruileng la go fitlhela.+ 31  Ba ne ba fitlha Aborahame gone le Sara mosadi wa gagwe.+ Ba ne ba fitlha Isake gone le Rebeka mosadi wa gagwe,+ mme ke ne ka fitlha Lea gone. 32  Tshimo e e rekilweng le logaga lo lo mo go yone di ne di tswa mo go bomorwa Hethe.”+ 33  Ka gone Jakobe a fetsa go naya bomorwawe ditaolo. Foo a phuthela dinao tsa gagwe mo sekanamelong mme a swa mme a phuthelwa kwa bathong ba gagabo.+

Dintlha Tse di Kwa Tlase