Genesise 48:1-22

48  Mme go ne ga diragala morago ga dilo tseno gore Josefa a tewe go twe: “Bona, rrago o nna bokoa.” Foo a tsaya bomorwawe ba babedi e leng Manase le Eferaime+ a tsamaya le bone.  Foo Jakobe a begelwa go twe: “Bona, morwao Josefa o tlile kwa go wena.” Ka jalo Iseraele a iteka ka thata a rapamologa a nna mo sekanamelong sa gagwe.  Mme Jakobe a raya Josefa a re: “Modimo Mothatayotlhe o ne a bonala mo go nna kwa Luse+ kwa lefatsheng la Kanana gore a tle a ntshegofatse.+  Mme o ne a tswelela a nthaya a re, ‘Bona, ke a go atisa,+ mme ke tla go ntsifatsa ke bo ke go fetola gore o nne phuthego ya ditšhaba+ mme ke tla naya losika lwa gago lefatshe leno morago ga gago gore lo le rue ka bosakhutleng.’+  Mme jaanong bomorwao ba babedi ba o neng wa ba tsholelwa mo lefatsheng la Egepeto pele ke tla fano kwa go wena mo Egepeto, ke ba me.+ Eferaime le Manase e tla nna ba me jaaka Rubene le Simeone.+  Mme lotsalo lwa gago lo o tla nnang rraalone morago ga lone e tla nna lwa gago. Lo tla bidiwa mo bosweng+ jwa lone mmogo le leina la bomorwarraalone.  Mme fa e le nna, fa ke ne ke tla ke tswa kwa Padana,+ Ragele o ne a swela+ fa thoko ga me kwa lefatsheng la Kanana mo tseleng fa go ne go sa ntse go na le sekgala se seleele thata pele re goroga mo Eferatha,+ mo e leng gore ke ne ka mo fitlha moo mo tseleng e e yang Eferatha, ke go re, Bethelehema.”+  Foo Iseraele a bona bomorwa Josefa mme a re: “Ke bomang bano?”+  Ka jalo Josefa a raya rraagwe a re: “Ke bomorwaake ba Modimo o ba nneileng mo lefelong leno.”+ Foo a re: “Tsweetswee, ba tlise mo go nna gore ke tle ke ba segofatse.”+ 10  Jaanong matlho a ga Iseraele a ne a le letobo ka ntlha ya botsofe.+ O ne a sa kgone go bona. Ka jalo a ba atametsa fa go ene, mme a ba atla a bo a ba tlamparela.+ 11  Mme Iseraele a raya Josefa a re: “Ke ne ke sa akanye gore ke tla bona sefatlhego sa gago,+ mme bona, Modimo o ntetlile gore ke bone le bana ba gago.” 12  Morago ga moo Josefa a ba ntsha mo mangoleng a gagwe, mme a ikoba sefatlhego sa gagwe se lebile fa fatshe.+ 13  Jaanong Josefa a ba tsaya boobabedi, Eferaime ka seatla sa gagwe sa moja a mo isa kwa molemeng+ wa ga Iseraele, le Manase ka seatla sa gagwe sa molema a mo isa kwa mojeng+ wa ga Iseraele, mme a ba atametsa fa go ene. 14  Le fa go ntse jalo, Iseraele a ntsha seatla sa gagwe sa moja mme a se baya mo tlhogong ya ga Eferaime,+ le mororo a ne a le yo mmotlana,+ mme seatla sa gagwe sa molema mo tlhogong ya ga Manase.+ O ne a baya diatla tsa gagwe jalo ka boomo, e re ka Manase e ne e le leitibolo.+ 15  Mme a segofatsa Josefa a re:+ “Modimo wa boammaaruri o borre e leng Aborahame le Isake ba neng ba tsamaya fa pele ga gagwe,+Modimo wa boammaaruri yo o ntseng a ntisa nako yotlhe e ke ntseng ke le gone ka yone go fitlha mo letsatsing leno,+ 16  Moengele yo o ntseng a nkgolola mo masetlapelong+ otlhe, segofatsa basimane bano.+Mma leina la me le bidiwe mo go bone le leina la borre, Aborahame le Isake,+Mme a ba oketsege ba nne bantsintsi mo gare ga lefatshe.”+ 17  E rile Josefa a bona gore rraagwe o ne a tlogela seatla sa gagwe sa moja se beilwe mo tlhogong ya ga Eferaime, ga bo go sa mo itumedise,+ mme a leka go tshwara seatla sa ga rraagwe gore a se tlose mo tlhogong ya ga Eferaime a se ise mo tlhogong ya ga Manase.+ 18  Ka gone Josefa a raya rraagwe a re: “E seng jalo, rra, ka gonne yono ke leitibolo.+ Baya seatla sa gago sa moja mo tlhogong ya gagwe.” 19  Mme rraagwe a nna a gana a re: “Ke a itse morwaaka. Ke a itse. Le ene o tla nna setšhaba e bile le ene o tla nna mogolo.+ Mme le fa go ntse jalo, morwarraagwe o tla nna mogolo go feta kafa ene a tla nnang mogolo ka gone,+ le bana ba gagwe ba tla lekana le ditšhaba+ ka botlalo.” 20  A tswelela go ba segofatsa mo letsatsing leo,+ a re: “A Iseraele a bolele tshegofatso ka wena kgapetsakgapetsa, a re,‘A Modimo a go dire jaaka Eferaime le jaaka Manase.’”+ A nna a baya Eferaime jalo fa pele ga ga Manase.+ 21  Morago ga moo Iseraele a raya Josefa a re: “Bona, ke a swa,+ mme ruri Modimo o tla nna le lona a bo a lo busetsa kwa lefatsheng la borraalonamogologolwane.+ 22  Fa e le nna, ke go naya sebata se le sengwe sa lefatshe go feta bomorwarrago,+ se ke neng ka se tsaya mo seatleng sa Baamore ka tšhaka ya me le ka bora jwa me.”

Dintlha Tse di Kwa Tlase