Genesise 39:1-23

39  Mme Josefa ene, o ne a tlisiwa mo Egepeto,+ mme Potifaro,+ modiredi wa ntlo ya kgosi wa ga Faro, molaodi wa bafemedi, wa Moegepeto, a mo reka mo seatleng sa Baishemaele+ ba ba neng ba mo tlisitse koo.  Mme Jehofa a nna le Josefa, mo a neng a nna monna yo o atlegileng+ mme a okamela ntlo ya mong wa gagwe, e leng Moegepeto.  Mme mong wa gagwe a bona gore Jehofa o ne a na le ene le gore sengwe le sengwe se a neng a se dira Jehofa o ne a dira gore se atlege mo seatleng sa gagwe.  Mme Josefa a nna a bona kamogelo mo matlhong a gagwe a ba a nna a mo direla ka metlha, mo a neng a mo tlhoma gore a okamele ntlo ya gagwe,+ mme gotlhe mo e neng e le ga gagwe a go tsenya mo seatleng sa gagwe.  Mme go ne ga diragala gore go simolola ka nako e a neng a mo tlhoma ka yone gore a okamele ntlo ya gagwe le gore a tlhokomele gotlhe mo e neng e le ga gagwe Jehofa a nna a segofatsa ntlo ya Moegepeto ka ntlha ya ga Josefa, mme tshegofatso ya ga Jehofa ya nna mo go tsotlhe tse a neng a na le tsone mo ntlong le kwa tshimong.+  La bofelo a tlogelela sengwe le sengwe se e neng e le sa gagwe mo seatleng sa ga Josefa;+ mme o ne a sa itse gore ke eng se a neng a na le sone kwantle ga senkgwe se a neng a se ja. Mo godimo ga moo, Josefa o ne a bopegile sentle e bile a le montle.  Jaanong morago ga dilo tseno ga diragala gore mosadi wa mong wa gagwe a simolole go tsholeletsa matlho a gagwe+ kwa go Josefa a ba a re: “Lala le nna.”+  Mme o ne a gana+ mme a raya mosadi wa mong wa gagwe a re: “Bona, mong wa me ga a itse gore ke eng se ke nang le sone mo ntlong, e bile sengwe le sengwe se a nang le sone o se tsentse mo seatleng sa me.+  Ga go na ope yo mogolo mo ntlong eno go mpheta, mme ga a a gana ka sepe gotlhelele mo go nna fa e se ka wena fela, ka gonne o mosadi wa gagwe.+ Ka jalo ke ka dira jang bosula jo bogolo jono mme ka leofela Modimo?”+ 10  Ka jalo go ne ga diragala gore fa a ne a ntse a bua le Josefa letsatsi le letsatsi ga a ise a ke a mo reetse gore a lale fa thoko ga gagwe, a tswelele a na le ene.+ 11  Mme ga diragala gore mo letsatsing leno jaaka mo malatsing a mangwe a tsene mo ntlong go ya go dira tiro ya gagwe, mme go ne go se na ope wa banna ba ntlo moo mo ntlong.+ 12  Foo mosadi a mo phamola ka seaparo+ sa gagwe, a re: “Lala le nna!”+ Mme ene a tlogela seaparo sa gagwe mo seatleng sa gagwe mme a tshaba a tswela kwa ntle.+ 13  Ga diragala ya re fela fa mosadi a bona gore o ne a tlogetse seaparo sa gagwe mo seatleng sa gagwe gore a tshabele kwa ntle, 14  a simolola go goela kwa banneng ba ntlo ya gagwe mme a ba raya a re: “Bonang! O tlisitse kwa go rona monna, Mohebera, go dira gore re jewe setshego. O ne a tla kwa go nna a tla go lala le nna, mme ke ne ka goa ka lentswe le le kwa godimo.+ 15  Mme ga diragala gore fela fa a utlwa ke tsholetsa lentswe ke goa, foo a tlogela seaparo sa gagwe fa thoko ga me mme a tshaba a tswela kwa ntle.” 16  Morago ga moo a tlogela seaparo sa gagwe se ntse fa thoko ga gagwe go fitlha mong wa gagwe a tla mo ntlong ya gagwe.+ 17  Foo a bua le ene kafa mafokong ano, a re: “Motlhanka wa Mohebera yo o mo tlisitseng kwa go rona o ne a tla kwa go nna a tla go dira gore ke jewe setshego. 18  Mme go ne ga diragala gore fela fa ke tsholetsa lentswe ke simolola go goa, foo a tlogela seaparo sa gagwe fa thoko ga me mme a tshabela kwa ntle.”+ 19  Ga felela ka gore fela fa mong wa gagwe a utlwa mafoko a mosadi wa gagwe a a neng a a bua le ene, a re: “Motlhanka wa gago o ntirile jaana le jaana,” bogale jwa gagwe jwa tuka.+ 20  Ka jalo mong wa ga Josefa a mo tsaya a mo tsenya mo ntlong ya kgolegelo, lefelo le magolegwa a kgosi a neng a beilwe mo go lone a tshwerwe, mme a nna moo mo ntlong ya kgolegelo.+ 21  Le fa go ntse jalo, Jehofa a nna le Josefa a bo a nna a mmontsha bopelonomi jwa lorato e bile a dira gore a bone kamogelo mo matlhong a modiredi yo mogolo wa ntlo ya kgolegelo.+ 22  Ka jalo modiredi yo mogolo wa ntlo ya kgolegelo a tsenya magolegwa otlhe a a neng a le mo ntlong ya kgolegelo mo seatleng sa ga Josefa; mme sengwe le sengwe se magolegwa a neng a se dira moo e ne e le ene a dirang gore se dirwe.+ 23  Modiredi yo mogolo wa ntlo ya kgolegelo o ne a sa tlhokomele sepe gotlhelele se se neng se le mo seatleng sa gagwe, ka gonne Jehofa o ne a na le Josefa mme Jehofa o ne a dira gore se a neng a se dira se atlege.+

Dintlha Tse di Kwa Tlase