Genesise 33:1-20

33  Fa nako e ntse e tsamaya Jakobe a tsholetsa matlho a leba, mme bona, Esau a bo a tla a na le banna ba le makgolo a manè.+ Ka gone a kgaoganyetsa bana kwa go Lea le kwa go Ragele le kwa malateng a mabedi,+  mme a baya malata le bana ba one kwa pele+ mme Lea le bana ba gagwe kafa morago ga bone+ mme Ragele le Josefa kwa morago ga bone.+  Mme ene ka boene a fetela kwa pele ga bone mme a ikobela fa fatshe makgetlo a le supa go fitlha a atamela morwarraagwe.+  Mme Esau a siana a ya go mo kgatlhantsha,+ a mo tlamparela+ a wela mo molaleng wa gagwe a mo atla, mme ba thubega ka selelo.  Foo a tsholetsa matlho mme a bona basadi le bana mme a re: “Ke bomang bano ba ba nang le wena?” mme a re: “Bana ba Modimo o segofaditseng motlhanka+ wa gago ka bone.”  Foo malata a tla, one le bana ba one, mme a ikoba;  Lea le ene a tla, le bana ba gagwe, ba ikoba, mme morago ga moo Josefa a tla, le Ragele, mme ba ikoba.+  Jaanong a re: “O kayang ka mophato ono otlhe wa batsamai o ke kopaneng le one?”+ Foo a re: “Gore ke tle ke bone kamogelo mo matlhong a morena+ wa me.”  Foo Esau a re: “Ke na le mo gontsi thata, morwarra.+ A se e leng sa gago se tswelele e le sa gago.” 10  Le fa go ntse jalo, Jakobe a re: “Nnyaa, tsweetswee. Fa jaanong ke bone kamogelo mo matlhong+ a gago, o tshwanetse go tsaya mpho ya me mo seatleng sa me, ka gonne tumalanong le boikaelelo jwa yone ke bone sefatlhego sa gago jaaka e kete ke ne ke bona sefatlhego sa Modimo ka gore o nkamogetse ka boipelo.+ 11  Tsweetswee, tsaya mpho e e lereng tshegofatso ya me e e neng ya tlisiwa kwa go wena,+ ka gonne Modimo o ntshegofaditse le ka gonne ke na le sengwe le sengwe.”+ Mme a tswelela go mo emelela, mo a neng a e tsaya.+ 12  Moragonyana a re: “A re bolole re tsamaye, mme mma ke tsamaye kwa pele ga gago.” 13  Mme a mo raya a re: “Morena wa me o a lemoga gore bana ba bokoa le gore ke tlhokometse dinku le dikgomo tse di amusang,+ mme fa ba ka di kgweetsa ka bonako mo letsatsing le le lengwe, ruri letsomane lotlhe le tla swa.+ 14  Tsweetswee, mma morena wa me a fetele kwa pele ga motlhanka wa gagwe, mme mma nna ka bonna ke tsweletse loeto ke iketlile kafa mosepeleng wa diruiwa+ tse di fa pele ga me le kafa mosepeleng wa bana+ go fitlha ke goroga kwa go morena wa me kwa Seire.”+ 15  Foo Esau a re: “Tsweetswee, mma ke beye bangwe ba batho ba ke nang le bone mo taolong ya gago.” Foo a re: “Ka ntlha yang? Mma ke bone kamogelo mo matlhong a morena wa me.”+ 16  Ka jalo mo letsatsing leo Esau a boela morago mo tseleng ya gagwe a ya Seire. 17  Mme Jakobe a bolola a ya Sukothe,+ mme a ikagela ntlo a ba a direla motlhape wa gagwe diobo.+ Ke gone ka moo a neng a raya lefelo leo leina a re Sukothe. 18  Fa nako e ntse e tsamaya Jakobe a goroga a babalesegile e bile a itekanetse mo motseng wa Shekema,+ o o mo lefatsheng la Kanana,+ fa a ne a tla a tswa Padana-arama;+ mme a tlhoma bothibelelo fa pele ga motse. 19  Mme a bapala sebata sa naga mo seatleng sa bomorwa Hamore rraagwe Shekema, ka dipapetla tsa madi di le lekgolo,+ sebata se a neng a tlhoma mogope wa gagwe mo go sone. 20  Morago ga moo a tlhoma sebeso gone mme a se bitsa Modimo yo e leng Modimo wa Iseraele.+

Dintlha Tse di Kwa Tlase