Genesise 28:1-22

28  Ka gone Isake a bitsa Jakobe a mo segofatsa mme a mo laola a mo raya a re: “O se ka wa tsaya mosadi mo go bomorwadia Kanana.+  Nanoga, ya kwa Padana-arama kwa ntlong ya ga Bethuele rraagwe mmago mme o itseele mosadi gone mo go bomorwadia Labane kgaitsadia mmago.+  Mme Modimo Mothatayotlhe o tla go segofatsa a go atisa a ba a go ntsifatsa, mme ruri o tla nna phuthego ya ditšhaba.+  Mme o tla go naya tshegofatso ya ga Aborahame,+ wena le losika lwa gago lo lo nang le wena,+ gore o tle o rue lefatshe la boagi jwa gago jwa boeng,+ jo Modimo a bo neileng Aborahame.”+  Ka jalo Isake a tsamaisa Jakobe, a bolola a ya Padana-arama, kwa go Labane morwa Bethuele wa Mosiria,+ morwarraagwe Rebeka,+ mmaagwe Jakobe le Esau.+  E rile Esau a bona gore Isake o ne a segofaditse Jakobe e bile a mo tsamaisitse go ya Padana-arama gore a ye go itseela mosadi gone, le gore fa a ne a mo segofatsa o ile a mo laola, a re: “O se ka wa tsaya mosadi mo go bomorwadia Kanana”;+  le gore Jakobe o ne a utlwa rraagwe le mmaagwe e bile a le mo tseleng go ya Padana-arama;+  foo Esau a bona gore bomorwadia Kanana ba ne ba sa itumedise mo matlhong a ga Isake rraagwe.+  Ka gone Esau a ya kwa go Ishemaele mme a tsaya Mahalathe morwadia Ishemaele morwa Aborahame go nna mosadi, kgaitsadia Nebaiothe, kwantle ga basadi ba bangwe ba gagwe.+ 10  Jakobe a tsamaya a tswa mo Beere-sheba mme a ya Harana.+ 11  Fa nako e ntse e tsamaya a kopana le lefelo lengwe mme a lala mo go lone ka gonne letsatsi le ne le phirimile. Ka jalo a tsaya lengwe la maje a lefelo leo a le baya gore e nne sengwe sa go tshegetsa tlhogo mme a lala mo lefelong leo.+ 12  A simolola go lora,+ mme bona! go ne go na le lere e emisitswe mo godimo ga lefatshe mme bogodimo jwa yone bo fitlha kwa magodimong; mme bona! go ne go na le baengele ba Modimo ba tlhatloga ba bo ba fologa mo go yone.+ 13  Mme bona! Jehofa o ne a eme mo godimo ga yone, mme a re:+ “Ke nna Jehofa Modimo wa ga Aborahame rrago le Modimo wa ga Isake.+ Lefatshe le o letseng mo go lone, ke tlile go le naya wena le losika lwa gago.+ 14  Mme losika lwa gago ruri lo tla nna jaaka lorole lwa lefatshe,+ mme o tla anamela kgakala kwa bophirima le kwa botlhaba le kwa bokone le kwa borwa,+ mme malapa otlhe a lefatshe a tla itshegofatsa ka wena le ka losika lwa gago.+ 15  Mme bona, ke na le wena mme ke tla go boloka mo tseleng yotlhe e o e tsamayang e bile ke tla go busetsa mo lefatsheng leno,+ ka gonne ga ke tle go go tlogela go fitlha ke dirile se ke se buileng le wena.”+ 16  Foo Jakobe a tsoga mo borokong mme a re: “Ruri Jehofa o mo lefelong leno mme nna ka bonna ke ne ke sa itse.” 17  A boifa mme a oketsa a re:+ “A bo lefelo leno le boitshega jang ne!+ Seno ga se sepe fa e se ntlo ya Modimo+ mme seno ke kgoro ya magodimo.” 18  Ka jalo Jakobe a tsoga go sa le phakela mme a tsaya leje le le neng le le moo jaaka sengwe sa go tshegetsa tlhogo ya gagwe a le tlhoma jaaka pilara mme a tshela leokwane mo godimo ga lone.+ 19  Mo godimo ga moo, a raya lefelo leo leina a re Bethele;+ mme boammaaruri ke gore, Luse e ne e le leina la motse ono pele.+ 20  Mme Jakobe a dira maikano,+ a re: “Fa e le gore Modimo o tla nna le nna le gore o tla mpoloka mo tseleng eno e ke tsamayang mo go yone a ba a nnaya senkgwe gore ke je le diaparo gore ke apare+ 21  le gore ruri ke tla boela ka kagiso kwa ntlong ya ga rre, he Jehofa o tla bo a itshupile a le Modimo wa me.+ 22  Mme leje leno le ke le tlhomileng jaaka pilara le tla nna ntlo ya Modimo,+ mme fa e le sengwe le sengwe se o tla se nnayang ruri ke tla go ntshetsa sa bosome sa sone.”+

Dintlha Tse di Kwa Tlase