Genesise 21:1-34

21  Mme Jehofa a lebisa tlhokomelo ya gagwe kwa go Sara fela jaaka a ne a buile, mme jaanong Jehofa a direla Sara fela jaaka a ne a buile.+  Sara a ima+ mme a tsholela Aborahame ngwana wa mosimane mo botsofeng jwa gagwe ka nako e e tlhomilweng e Modimo a neng a buile le ene+ ka yone.  Ka jalo Aborahame a raya morwawe yo a neng a mo tsholetswe, yo a neng a mo tsholetswe ke Sara, leina a re Isake.+  Mme Aborahame a rupisa Isake morwawe fa a le malatsi a le robedi, fela jaaka Modimo a ne a mo laetse.+  Mme Aborahame o ne a na le dingwaga di le lekgolo fa a ne a tsholelwa ngwana wa gagwe wa mosimane e leng Isake.  Foo Sara a re: “Modimo o mpaakanyeditse setshego: mongwe le mongwe yo o utlwang ka gone o tla ntshega.”+  Mme a oketsa a re: “Ke mang yo o neng a ka bua le Aborahame a re, ‘Ruri Sara o tla amusa bana,’ fa ke belege morwa mo botsofeng jwa gagwe?”  Jaanong ngwana a nna a gola a ba a kgwisiwa;+ mme Aborahame a dira modiro o mogolo mo letsatsing la fa Isake a ne a kgwisiwa.  Sara a nna a bona morwa Hagare wa Moegepeto,+ yo a neng a mo tsholetse Aborahame, a sotla.+ 10  Ka jalo a simolola go raya Aborahame a re: “Koba lelata leno le morwaalone, gonne morwa lelata leno ga a tle go nna moruaboswa le morwaake, e bong Isake!”+ 11  Mme seno sa itshupa se sa itumedise gotlhelele mo go Aborahame ka ga morwawe.+ 12  Foo Modimo a raya Aborahame a re: “O se ka wa letla sepe se Sara a nnang a se go raya gore se se ka sa go itumedisa kaga mosimane le kaga lelata la gago. Reetsa lentswe la gagwe, ka gonne se se tla bidiwang losika lwa gago se tla nna gone+ ka Isake. 13  Mme fa e le morwa lelata+ ene, le ene ke tla mo dira setšhaba, ka gonne ke ngwana wa gago.”+ 14  Ka jalo Aborahame a tsoga go sa le phakela a tsaya senkgwe le modutwana mme a o naya Hagare,+ a o baya mo legetleng la gagwe, le ngwana,+ mme a mo tsamaisa. A tsamaya mme a kgarakgatshega mo nageng ya Beere-sheba.+ 15  La bofelo metsi a fela+ mo modutwaneng mme a latlhela+ ngwana kafa tlase ga sengwe sa ditlhatshana. 16  Morago ga moo a tsamaya mme a nna a le esi, mo e ka nnang sekgala sa go hulwa ga bora, ka gonne o ne a re: “Mma ke se ka ka bona fa ngwana a swa.”+ Ka jalo a nna kgakajana mme a tsholetsa lentswe a lela.+ 17  Foo Modimo a utlwa lentswe la mosimane,+ mme moengele wa Modimo a bitsa Hagare go tswa kwa magodimong a mo raya a re:+ “Mathata ke eng ka wena, Hagare? O se ka wa boifa, ka gonne Modimo o reeditse lentswe la mosimane kwa a leng gone. 18  Nanoga, tsholetsa mosimane mme o mo tshware ka seatla, ka gonne ke tla mo dira setšhaba se segolo.”+ 19  Foo Modimo a bula matlho a gagwe mme a bona sediba sa metsi;+ a ya a simolola go tlatsa modutwana ka metsi a ba a nosa mosimane. 20  Mme Modimo a tswelela a na le mosimane,+ a nna a gola a nna mo nageng; mme a nna mohudi ka motswi.+ 21  Mme a nna mo nageng ya Parana,+ mmaagwe a mo tseela mosadi kwa lefatsheng la Egepeto. 22  Jaanong go ne ga diragala ka nako eo gore Abimeleke mmogo le Fikole molaodi wa masole a gagwe a reye Aborahame a re: “Modimo o na le wena mo go sengwe le sengwe se o se dirang.+ 23  Ka jalo inkanele fano jaanong ka Modimo+ gore ga o na go itshupa o le maaka mo go nna le mo go bongwanake le mo ditlogolwaneng+ tsa me; gore, go ya ka lorato lo lo ikanyegang lo ke dirisaneng le wena ka lone,+ o tla dirisana le nna le lefatshe le o ntseng o nna mo go lone o le moeng.”+ 24  Ka jalo Aborahame a re: “Ke tla ikana.”+ 25  Fa Aborahame a ne a kgala Abimeleke mo go botlhoko malebana le sediba sa metsi se batlhanka ba ga Abimeleke ba neng ba se tsere ka dikgoka,+ 26  foo Abimeleke a re: “Ga ke itse gore ke mang yo o dirileng selo seno, le fa e le wena ga o a ka wa mpolelela, mme le nna ka bonna ga ke a utlwa ka gone fa e se gompieno.”+ 27  Foo Aborahame a tsaya dinku le dikgomo mme a di naya Abimeleke,+ mme boobabedi ba dira kgolagano.+ 28  E rile Aborahame a emisa dikwanyana tse di namagadi tse supa di le tsosi, 29  Abimeleke a tswelela a raya Aborahame a re: “Dikwanyana tse di namagadi tseno tse supa tse o di emisitseng di le tsosi di kayang?” 30  Foo a re: “O tshwanetse go amogela dikwanyana tse di namagadi tseno tse supa mo seatleng sa me, gore e tle e nne bosupi+ mo go nna gore ke epile sediba seno.” 31  Ke gone ka moo a neng a bitsa lefelo leo a re Beere-sheba,+ ka gonne ba ne ba ikana gone boobabedi. 32  Ka jalo ba ne ba dira kgolagano+ kwa Beere-sheba, e morago ga yone Abimeleke a neng a nanoga mmogo le Fikole molaodi wa masole a gagwe mme ba boela kwa lefatsheng la Bafilisitia.+ 33  Morago ga moo a jala setlhare sa motamariseka kwa Beere-sheba mme a bitsa leina la ga Jehofa+ gone e leng Modimo+ yo o nnang ka bosakhutleng. 34  Mme Aborahame a lelefatsa boagi jwa gagwe jwa boeng mo lefatsheng la Bafilisitia ka malatsi a le mantsi.+

Dintlha Tse di Kwa Tlase