Esekiele 29:1-21

29  Mo ngwageng wa bolesome, mo kgweding ya bolesome, mo letsatsing la bolesome le bobedi la kgwedi, lefoko la ga Jehofa le ne la tla mo go nna, le re:  “Morwa motho, lebisa sefatlhego sa gago kgatlhanong le Faro kgosi ya Egepeto+ mme o porofete kgatlhanong le Egepeto yotlhe.+  Bua, mme o re, ‘Morena Molaodimogolo Jehofa o buile jaana: “Bona, ke kgatlhanong le wena, wena Faro, kgosi ya Egepeto,+ setshedi se setonatona sa lewatle+ se se namaletseng mo gare ga mesele ya sone ya Nile,+ se se rileng, ‘Noka ya me ya Nile ke ya me, mme nna—ke e itiretse.’+  Mme ke tla tsenya dikgoge mo ditlhaeng tsa gago+ ke bo ke dira gore ditlhapi tsa mesele ya gago ya Nile di ngaparele makape a gago. Mme ke tla go ntsha mo gare ga mesele ya gago ya Nile le ditlhapi tsotlhe tsa mesele ya gago ya Nile tse di ngaparetseng makape a gago.  Mme ke tla go tlogela mo nageng, wena le ditlhapi tsotlhe tsa mesele ya gago ya Nile.+ O tla wela mo nageng.+ Ga o kitla o phuthiwa le fa e le go kokoanngwa. Ke tla go naya dibatana tsa naga le dibopiwa tse di fofang tsa magodimo go nna dijo tsa tsone.+  Mme banni botlhe ba Egepeto ba tla itse gore ke nna Jehofa,+ ka lebaka la gore ba ne ba ntse jaaka setshegetso, lotlhaka mo go ba ntlo ya Iseraele.+  Fa ba ne ba go tshwara ka seatla, o ne wa thubagana,+ mme wa fatola legetla la bone lotlhe. Mme fa ba ne ba itshegetsa ka wena, o ne wa robega,+ mme wa dira gore dinōka tsotlhe tsa bone di kgwetlhe.”+  “‘Ka jalo Morena Molaodimogolo Jehofa o buile jaana: “Bona, ke go tlisetsa tšhaka,+ mme ke tla fedisa mo go wena motho wa mo lefatsheng le seruiwa.+  Mme lefatshe la Egepeto le tla nna kgakgabalo le lefelo le le swafetseng;+ mme ba tla itse gore ke nna Jehofa, ka lebaka la gore o rile, ‘Noka ya Nile ke ya me, ke nna ke e dirileng.’+ 10  Ka jalo bona, ke kgatlhanong le wena gape ke kgatlhanong le mesele ya gago ya Nile,+ mme ke tla dira lefatshe la Egepeto mafelo a a swafetseng,+ komelelo, kgakgabalo, go tswa Migedole+ go ya Siene+ le go ya molelwaneng wa Ethiopia. 11  Lonao lwa motho wa mo lefatsheng ga lo kitla lo feta mo go lone,+ le fa e le lonao lwa seruiwa ga lo kitla lo feta mo go lone,+ mme ga le kitla le nniwa dingwaga di le masome a manè.+ 12  Mme ke tla dira lefatshe la Egepeto kgakgabalo mo gare ga mafatshe a a kgakgabetseng;+ mme metse ya yone e tla fetoga kgakgabalo mo gare ga metse e e swafetseng dingwaga di le masome a manè;+ mme ke tla gasamisa Baegepeto mo ditšhabeng ke bo ke ba phatlalatsa mo mafatsheng.”+ 13  “‘Gonne Morena Molaodimogolo Jehofa o buile jaana: “Kwa bokhutlong jwa dingwaga tse di masome a manè+ ke tla phutha Baegepeto mmogo go tswa mo ditšhabeng tse ba tla bong ba gasamiseditswe kwa go tsone,+ 14  mme ke tla busa setlhopha se se isitsweng botshwarwa sa Baegepeto; ke tla ba busetsa mo lefatsheng la Patherose,+ kwa lefatsheng le ba simologileng kwa go lone, mme koo ba tla nna bogosi jwa maemo a a kwa tlase. 15  Bo tla nna kwa tlase go gaisa magosi a mangwe, mme ga bo kitla bo tlhola bo itsholeletsa kwa godimo ga ditšhaba tse dingwe,+ mme ke tla ba fokotsa gore ba se ka ba laola ditšhaba tse dingwe.+ 16  Mme ga e kitla e tlhola e nna ntlo ya tshepo ya Iseraele,+ go dira gore go gakologelwe tlolo ka go retologela kwa go yone.+ Mme ba tla itse gore ke nna Morena Molaodimogolo Jehofa.”’” 17  Jaanong ga diragala mo ngwageng wa bomasome a mabedi le bosupa, mo kgweding ya ntlha, mo letsatsing la ntlha la kgwedi, gore lefoko la ga Jehofa le tle mo go nna, le re: 18  “Morwa Motho, Nebukaderesare ka boene,+ kgosi ya Babelona, o ne a dira gore mophato wa gagwe wa sesole o dire tirelo e kgolo kgatlhanong le Ture.+ Tlhogo nngwe le nngwe e ne e dirilwe lefatla, mme legetla lengwe le lengwe le ne le kgobotswe.+ Mme fa e le dituelo,+ go ne go se na dipe go tswa Ture tse di neng tsa newa ene le mophato wa gagwe wa sesole ka ntlha ya tirelo e a neng a e dirile kgatlhanong le ene. 19  “Ka jalo Morena Molaodimogolo Jehofa o buile jaana, ‘Bona, ke naya Nebukaderesare kgosi ya Babelona lefatshe la Egepeto,+ mme o tla tsaya khumo ya lone a bo a e dira thopo e kgolo+ a bo a e gapa ka kgapo e kgolo thata; mme e tla nna tuelo ya mophato wa gagwe wa sesole.’ 20  “‘Ke mo neile lefatshe la Egepeto e le tuelo ya gagwe ya tirelo e a e dirileng kgatlhanong le ene, ka gonne ba ne ba ntirela,’+ go bua Morena Molaodimogolo Jehofa. 21  “Mo letsatsing leo ke tla tlhogisetsa ntlo ya Iseraele lonaka,+ mme wena ke tla go naya sebaka sa go bula molomo mo gare ga bone;+ mme ba tla itse gore ke nna Jehofa.”

Dintlha Tse di Kwa Tlase