Ekesodo 33:1-23

33  Mme Jehofa a raya Moshe gape a re: “Tsamaya, nanoga o tswe fano, wena le batho ba o ba ntshitseng kwa lefatsheng la Egepeto,+ o ye kwa lefatsheng le ke neng ka le ikanela Aborahame, Isake le Jakobe, ka re, ‘Ke tla le naya losika lwa gago.’+  Mme ke tla romela moengele kwa pele ga gago+ ke bo ke leleka Bakanana, Baamore, le Bahite le Baperise, Bahife le Bajebuse;+  go ya kwa lefatsheng le le elang mashi le tswina ya dinotshe,+ gonne ga nkitla ke tsamaya mo gare ga lona, ka gonne lo batho ba ba thamoethata,+ gore ke se ka ka lo fedisa mo tseleng.”+  E rile batho ba utlwa lefoko le le bosula leno, ba hutsafala;+ mme ga se ka ga nna le ope wa bone yo o rwalang mekgabisa ya gagwe.  Mme Jehofa a tswelela a raya Moshe a re: “Raya bomorwa Iseraele o re, ‘Lo batho ba ba thamoethata.+ Ke ne nka tsena mo gare ga lona ka ponyo ya leitlho+ mme ka lo fedisa. Ka jalo jaanong, rolang mekgabisa e e mo go lona, e re ka ke batla go itse se ke tlileng go se lo dira.’”+  Mme bomorwa Iseraele ba apola mekgabisa ya bone go simolola kwa Thabeng ya Horeba+ go ya pele.  Fa e le Moshe ene, o ne a tlosa mogope wa gagwe a o tlhoma ka kwa ntle ga bothibelelo, kgakala le bothibelelo; mme a o bitsa mogope wa bokopanelo. Mme go ne go diragala gore mongwe le mongwe yo o botsang+ Jehofa a tswe a ye kwa mogopeng wa bokopanelo, o o neng o le ka kwa ntle ga bothibelelo.  Mme go ne go diragala gore fela fa Moshe a tswela kwa mogopeng, batho botlhe ba bo ba nanoga,+ ba ne ba ema mongwe le mongwe wa bone fa kgorong ya mogope wa gagwe, ba leba Moshe go fitlha a tsena mo mogopeng.  Gape go ne go diragala gore fela fa Moshe a tsene mo mogopeng, pilara ya leru+ e bo e fologa, e bo e ema fa kgorong ya mogope mme a bua+ le Moshe. 10  Mme batho botlhe ba ne ba bona pilara ya leru+ e eme fa kgorong ya mogope, batho botlhe ba nanoga mme mongwe le mongwe a ikoba fa kgorong ya mogope wa gagwe.+ 11  Mme Jehofa a bua le Moshe ba lebane difatlhego,+ fela jaaka motho a ka bua le mongwe ka ene. E rile a boela kwa bothibelelong, Joshua modiredi+ wa gagwe, morwa Nune,+ jaaka motlhokomedi, o ne a sa tloge mo teng ga mogope. 12  Jaanong Moshe a raya Jehofa a re: “Bona, o nthaya o re, ‘Etelela batho bano pele,’ mme ga o a nkitsise gore ke mang yo o tla mo romang le nna. Mo godimo ga moo, wena ka bowena o rile, ‘Ke go itse ka leina+ e bile, mo godimo ga moo, o bone kamogelo mo matlhong a me.’ 13  Mme jaanong, tsweetswee, fa ke bone kamogelo mo matlhong a gago,+ tsweetswee, ntira gore ke itse ditsela tsa gago,+ gore ke tle ke go itse, gore ke tle ke bone kamogelo mo matlhong a gago. Mme o gakologelwe gore setšhaba seno ke batho ba gago.”+ 14  Ka jalo a re: “Nna ka bonna ke tla tsamaya+ le wena mme ruri ke tla go naya boikhutso.”+ 15  Foo a mo raya a re: “Fa o sa tsamaye le nna, o se ka wa re etelela pele go tswa fano. 16  Mme jaanong, go tla itsiwe ka eng gore ke bone kamogelo mo matlhong a gago, nna le batho ba gago? A ga se fa o tsamaya le rona,+ ka gonne nna le batho ba gago re dirilwe ba ba farologaneng le batho ba bangwe botlhe ba ba mo godimo ga lefatshe?”+ 17  Mme Jehofa a raya Moshe a re: “Selo seno le sone, se o buileng ka sone, ke tla se dira,+ ka gonne o bone kamogelo mo matlhong a me e bile ke go itse ka leina.” 18  Foo a re: “Tsweetswee, ntira gore ke bone kgalalelo ya gago.”+ 19  Mme ene a re: “Nna ka bonna ke tla dira gore molemo otlhe wa me o fete fa pele ga sefatlhego sa gago,+ mme ke tla bolela leina la ga Jehofa fa pele ga gago;+ mme ke tla amogela yo ke tla mo amogelang, e bile ke tla utlwela botlhoko yo ke tla mo utlwelang botlhoko.”+ 20  Mme a oketsa a re: “Ga o kgone go bona sefatlhego sa me, ka gonne ga go na motho yo o ka mponang a bo a sala a tshela.”+ 21  Mme Jehofa a tswelela a re: “Lefelo ke leno fa go nna, mme o eme mo godimo ga lefika. 22  Mme go tla diragala gore fa kgalalelo ya me e feta ke tla go tsenya mo phatlheng mo lefikeng, mme ke tla baya legofi la me mo godimo ga gago jaaka sesiro go fitlha ke fetile. 23  Morago ga moo ke tla tlosa legofi la me, mme ruri o tla bona mokwatla wa me. Mme sefatlhego sa me ga se ka ke sa bonwa.”+

Dintlha Tse di Kwa Tlase