Ekesodo 20:1-26

20  Mme Modimo a bua mafoko ano otlhe, a re:+  “Ke nna Jehofa Modimo wa gago,+ yo o go ntshitseng kwa lefatsheng la Egepeto, mo ntlong ya makgoba.+  O se ka wa nna le medimo epe e sele+ kgatlhanong le sefatlhego sa me.  “O se ka wa itirela setshwantsho se se setilweng kgotsa popego e e tshwanang le epe fela e e kwa magodimong kwa godimo kgotsa e e mo lefatsheng fa tlase kgotsa e e mo metsing kafa tlase ga lefatshe.+  O se ka wa di ikobela le fa e le go tlhotlhelediwa go di direla,+ ka gonne nna Jehofa Modimo wa gago ke Modimo yo o batlang boineelo jo bo feletseng,+ yo o tlisetsang bana ba basimane kotlhao ya tlolo ya borraabone, mo kokomaneng ya boraro le mo kokomaneng ya bonè, mo go ba ba ntlhoileng;+  mme e le yo o supang bopelonomi jwa lorato mo kokomaneng ya bomakgolo a le lesome mo go ba ba nthatang e bile ba boloka ditaolo tsa me.+  “O se ka wa dirisa leina la ga Jehofa Modimo wa gago ka tsela e e se nang mosola,+ gonne Jehofa ga a kitla a tlhoka go otlhaya yo o dirisang leina la gagwe ka tsela e e se nang mosola.+  “O gakologelwe letsatsi la sabata gore o le tshole le le boitshepo,+  o dire tirelo mme o dire tiro yotlhe ya gago malatsi a le marataro.+ 10  Mme letsatsi la bosupa ke sabata mo go Jehofa Modimo wa gago.+ O se ka wa dira tiro epe, wena le fa e le morwao le fa e le morwadio, motlhanka wa gago le fa e le lelata la gago le fa e le seruiwa sa gago le fa e le moagi wa gago wa moeng yo o mo teng ga dikgoro tsa gago.+ 11  Gonne Jehofa o ne a dira magodimo le lefatshe mo malatsing a le marataro, lewatle le sengwe le sengwe se se mo go tsone,+ mme a ikhutsa mo letsatsing la bosupa.+ Ke gone ka moo Jehofa a neng a segofatsa letsatsi la sabata a le dira boitshepo.+ 12  “Tlotla rrago le mmago+ gore malatsi a gago a tle a nne maleele mo lefatsheng le Jehofa Modimo wa gago o le go nayang.+ 13  “O se ka wa bolaya motho.+ 14  “O se ka wa dira boaka.+ 15  “O se ka wa utswa.+ 16  “O se ka wa supa ka go aka o le mosupi kgatlhanong le mongwe ka wena.+ 17  “O se ka wa eletsa ntlo ya mongwe ka wena. O se ka wa eletsa mosadi wa mongwe ka wena,+ le fa e le motlhanka wa gagwe le fa e le lelata la gagwe le fa e le poo ya gagwe le fa e le esele ya gagwe le fa e le sepe fela se e leng sa mongwe ka wena.”+ 18  Jaanong batho botlhe ba ne ba bona ditumo tsa maru le go benya ga dikgadima le modumo wa lonaka le thaba e kua mosi. E rile batho ba bona seno, foo ba roroma mme ba emela kgakajana.+ 19  Mme ba raya Moshe ba re: “Wena bua le rona, mme mma re reetse; mme a Modimo a se ka a bua le rona e se re kgotsa ra swa.”+ 20  Ka jalo Moshe a raya batho a re: “Lo se ka lwa boifa, ka gonne Modimo wa boammaaruri o tletse go lo leka,+ le gore go mmoifa go tle go tswelele fa pele ga difatlhego tsa lona gore lo se ka lwa leofa.”+ 21  Mme batho ba nna ba emetse kgakajana, mme Moshe a atamela leru le lentsho kwa Modimo wa boammaaruri a neng a le gone.+ 22  Mme Jehofa a tswelela a raya Moshe+ a re: “O tla raya bomorwa Iseraele o re, ‘Lona ka bolona lo bone gore ke ne ke bua le lona go tswa kwa magodimong.+ 23  Lo se ka lwa dira medimo ya selefera mme lwa e direla mmogo le nna, gape lo se ka lwa itirela medimo ya gouta.+ 24  O ntirele sebeso sa mmu,+ mme o ise ditshupelo tsa gago tse di fisiwang mo go sone le ditlhabelo tsa gago tsa kabalano, letsomane la gago le motlhape wa gago.+ Mo lefelong lengwe le lengwe le ke tla dirang gore leina la me le gakologelwe mo go lone ke tla tla kwa go wena mme ruri ke tla go segofatsa.+ 25  Mme fa o ka ntirela sebeso sa maje, o se ka wa a aga jaaka maje a a betlilweng. Fa go diragala gore o dirise petlwana mo go sone, foo o tla se itshepolola.+ 26  Mme o se ka wa tlhatlogela kwa sebesong sa me ka mapalamelelo, gore dirwe tsa gago tsa sephiri di se ka tsa bipologela mo go sone.’

Dintlha Tse di Kwa Tlase