Ekesodo 14:1-31

14  Jaanong Jehofa a bua le Moshe, a re:  “Bua le bomorwa Iseraele, gore ba boele morago ba ye go thibelela fa pele ga Pihahirothe fa gare ga Migedole le lewatle go lebagana le Baale-sefone.+ Lo thibelele fa pele ga yone fa lewatleng.  Mme ruri Faro o tla bua ka bomorwa Iseraele a re, ‘Ba kgarakgatshega ba tlhakatlhakane mo nageng. Ba dikilwe ke bogare jwa naga fela.’+  Ka jalo ruri ke tla letla pelo ya ga Faro gore e thatafale,+ mme o tla ba lelekisa mme ke tla iponela kgalalelo ka Faro le mephato yotlhe ya gagwe ya sesole;+ mme Baegepeto ba tla itse gore ke nna Jehofa.”+ Ka jalo ba dira fela jalo.  Moragonyana kgosi ya Egepeto e ne ya begelwa gore batho ba ne ba tshabile. Ka yone nako eo pelo ya ga Faro le batlhanka ba gagwe ya fetoga malebana le batho,+ mo ba neng ba re: “Ke eng se re se dirileng, go bo re lesitse Iseraele a tsamaya gore a se ka a nna lekgoba+ la rona?”  Ka jalo a baakanya dikara tsa gagwe tsa ntwa, mme a tsaya batho ba gagwe a tsamaya le bone.+  A tsaya dikara tse di tlhophilweng di le makgolo a le marataro+ le dikara tse dingwe tsotlhe tsa Egepeto le batlhabani mo go nngwe le nngwe ya tsone.  Ka gone Jehofa a letla pelo ya ga Faro kgosi ya Egepeto gore e thatafale,+ mme a lelekisa bomorwa Iseraele, fa bomorwa Iseraele ba ne ba tswa ka seatla se se tsholetsegileng.+  Mme Baegepeto ba ba lelekisa, le dipitse tsotlhe tsa dikara tsa ga Faro le bapalami ba gagwe ba dipitse+ le mephato ya gagwe ya sesole e ne e ba tshwara fa ba ne ba thibeletse fa lewatleng, fa Pihahirothe go lebagana le Baale-sefone.+ 10  E rile Faro a atamela, bomorwa Iseraele ba tsholetsa matlho mme bona, Baegepeto ba ne ba gwanta kafa morago ga bone; mme bomorwa Iseraele ba boifa thata mme ba simolola go goela kwa go Jehofa.+ 11  Mme ba raya Moshe ba re: “A ke ka gonne ga go na mafelo a go fitlhela gotlhelele kwa Egepeto go bo o re tlisitse fano gore re tle go swela mo nageng?+ Ke eng se o se re dirileng ka go re ntsha kwa Egepeto? 12  A leno ga se lefoko le re neng ra le bua le wena kwa Egepeto, re re, ‘Re tlogele, re direle Baegepeto’? Gonne go botoka gore re direle Baegepeto go na le gore re swele mo nageng.” + 13  Foo Moshe a raya batho a re: “Lo se ka lwa boifa.+ Emang lo nitame mme lo bone poloko ya ga Jehofa, e a tla e lo direlang gompieno.+ Gonne Baegepeto ba lo ba bonang gompieno ga lo kitla lo ba bona gape, nnyaa, lo ka se tlhole lo ba bona gape.+ 14  Jehofa ka boene o tla lo tlhabanela,+ mme lona lo tla didimala fela.” 15  Jaanong Jehofa a raya Moshe a re: “Ke ka ntlha yang fa o nna o ntse o goela kwa go nna?+ Bua le bomorwa Iseraele gore ba tlhatlhamolole bothibelelo. 16  Fa e le wena, tsholetsa thobane+ ya gago mme o otlololele lewatle seatla sa gago o le kgaoganye,+ gore bomorwa Iseraele ba tle ba kgabaganye mo gare ga lewatle mo lefatsheng le le omileng. + 17  Fa e le nna, bona, ke letla dipelo tsa Baegepeto gore di thatafale,+ gore ba tle ba tsene morago ga bone le gore ke tle ke iponele kgalalelo ka Faro le mephato yotlhe ya gagwe ya sesole, dikara tsa gagwe tsa ntwa le bapalami ba gagwe ba dipitse.+ 18  Mme ruri Baegepeto ba tla itse gore ke nna Jehofa fa ke iponela kgalalelo ka Faro, dikara tsa gagwe tsa ntwa le bapalami ba gagwe ba dipitse.”+ 19  Foo moengele+ wa Modimo wa boammaaruri yo o neng a tsamaya kwa pele ga bothibelelo jwa Iseraele a tloga mme a ya ka kwa morago ga bone, mme pilara ya leru ya tloga ka kwa pele ga bone ya ema ka kwa morago ga bone.+ 20  Ka jalo ya tsena fa gare ga bothibelelo jwa Baegepeto le bothibelelo jwa Iseraele.+ Kafa letlhakoreng le lengwe e ne ya itshupa e le leru mmogo le lefifi.+ Kafa letlhakoreng le lengwe e ne ya nna ya bonesa bosigo. Mme setlhopha seno ga se a ka sa atamela setlhopha sele bosigo jotlhe. 21  Jaanong Moshe a otlololela lewatle seatla sa gagwe;+ mme Jehofa a dira gore lewatle le boele morago ka phefo e e maatla ya botlhaba bosigo jotlhe a fetola boalo jwa lewatle go nna lefatshe le le omileng,+ mme metsi a ne a kgaoganngwa.+ 22  Labofelo bomorwa Iseraele ba kgabaganya mo gare ga lewatle mo lefatsheng le le omileng,+ fa metsi e ne e le lobota mo go bone kafa mojeng wa bone le kafa molemeng+ wa bone. 23  Mme Baegepeto ba ba latelela, mme dipitse tsotlhe tsa ga Faro, dikara tsa gagwe tsa ntwa le bapalami ba gagwe ba dipitse ba simolola go tsena morago ga bone,+ ba tsena mo gare ga lewatle. 24  Mme ga diragala ka tebelo ya moso gore Jehofa a lebe bothibelelo jwa Baegepeto go tswa mo gare ga pilara ya molelo le leru,+ mme a tlhakatlhakanya bothibelelo jwa Baegepeto.+ 25  Mme a nna a somola maotwana mo dikareng tsa bone mo ba neng ba di kgweetsa ka bothata;+ mme Baegepeto ba re: “A re tshabeng re se ka ra kopana ka tsela epe le Iseraele, ka gonne ruri Jehofa o ba tlhabanela mo Baegepetong.”+ 26  La bofelo Jehofa a raya Moshe a re: “Otlololela lewatle seatla,+ gore metsi a tle a boele mo Baegepetong, mo dikareng tsa bone tsa ntwa le mo bapalaming ba bone ba dipitse.” 27  Moshe a akofa a otlololela lewatle seatla, mme lewatle la simolola go boela mo boemong jwa lone jwa gale fa go nna moso. Mo nakong eno yotlhe Baegepeto ba ne ba tshaba gore ba se ka ba kopana le lone, mme Jehofa a ribegetsa Baegepto mo gare ga lewatle.+ 28  Mme metsi a nna a boa.+ La bofelo a khurumetsa dikara tsa ntwa le bapalami ba dipitse ba mephato yotlhe ya ga Faro ya sesole e e neng e tsene mo lewatleng morago ga bone.+ Ga go na le fa a le mongwe wa bone yo o neng a sala.+ 29  Fa e le bomorwa Iseraele bone, ba ne ba tsamaya mo lefatsheng le le omileng mo gare ga boalo jwa lewatle,+ mme metsi mo go bone e ne e le lobota kafa mojeng wa bone le kafa molemeng+ wa bone. 30  Mo letsatsing leo Jehofa a boloka Iseraele jalo mo seatleng sa Baegepeto,+ mme Iseraele ya bona Baegepeto ba sule fa losing lwa lewatle.+ 31  Gape Iseraele ya bona seatla se segolo se Jehofa a neng a se dirisa kgatlhanong le Baegepeto; mme batho ba simolola go boifa Jehofa le go dumela mo go Jehofa le Moshe motlhanka wa gagwe.+

Dintlha Tse di Kwa Tlase