Duteronome 9:1-29

9  “Utlwa wena Iseraele, gompieno o kgabaganya Joredane+ gore o tsene o ye go gapela ditšhaba tse dikgolo le tse di thata go go feta+ thuo, metse e megolo le e e sireletsegileng go fitlha kwa magodimong,+  setšhaba sa batho ba bagolo ba baleele, bomorwa Baanake,+ ba o itsileng ka bone e bile o utlwile go twe, ‘Ke mang yo o ka emang a nitame fa pele ga bomorwa Anake?’  Mme o itse sentle gompieno gore Jehofa Modimo wa gago o kgabaganya fa pele ga gago.+ Ke molelo o o lailang.+ O tla ba nyeletsa,+ e bile ene ka boene o tla ba fenya fa pele ga gago; mme o ba gapele thuo o bo o ba senye ka bonako, fela jaaka Jehofa a buile le wena.+  “O se ka wa bua seno mo pelong ya gago fa Jehofa Modimo wa gago a ba kgorometsa a ba ntsha fa pele ga gago o re, ‘E ne e le ka ntlha ya tshiamo ya me go bo Jehofa a ntlisitse go tla go rua lefatshe+ leno,’ fa tota e le ka ntlha ya boikepo jwa ditšhaba tseno go bo Jehofa a di leleka fa pele ga gago.+  Ga se ka ntlha ya tshiamo+ ya gago kgotsa ka ntlha ya go thokgama ga pelo ya gago+ go bo o tsena o ya go rua lefatshe la bone; mme tota, ke ka ntlha ya boikepo jwa ditšhaba tseno go bo Jehofa Modimo wa gago a di leleka fa pele ga gago,+ le gore go diragadiwe lefoko le Jehofa a neng a le ikanela borragomogologolwane, e bong Aborahame,+ Isake+ le Jakobe.+  Mme o itse gore ga se ka ntlha ya tshiamo ya gago go bo Jehofa Modimo wa gago a go naya lefatshe le le molemo leno gore o le rue; gonne o setšhaba se se thamoethata.+  “Gakologelwa: O se ka wa lebala kafa o galefisitseng Jehofa Modimo wa gago ka gone kwa nageng.+ Go simolola ka letsatsi le o duleng kwa lefatsheng la Egepeto ka lone go fitlha lo tla mo lefelong leno lo ntse lo itshwara ka go tsuologela Jehofa.+  Le eleng kwa Horeba lo ne lwa galefisa Jehofa mo Jehofa a neng a lo tukela bogale mme a batla a lo nyeletsa.+  Fa ke ne ke tlhatloga thaba ke ya go amogela dikwalelo tsa leje,+ dikwalelo tsa kgolagano e Jehofa a neng a e dirile le lona,+ mme ka nna mo thabeng malatsi a le masome a manè le masigo a le masome a manè,+ (ke ne ka se ka ka ja senkgwe le fa e le go nwa metsi,) 10  foo Jehofa a nnaya dikwalelo tse pedi tsa leje tse di kwadilweng ka monwana wa Modimo;+ mme mo go tsone go ne go na le mafoko otlhe a Jehofa a neng a a buile le lona mo thabeng go tswa mo gare ga molelo mo letsatsing la phuthego.+ 11  Mme ga diragala gore kwa bokhutlong jwa malatsi a le masome a manè le masigo a le masome a manè Jehofa a nnaya dikwalelo tse pedi tsa leje, dikwalelo tsa kgolagano;+ 12  mme Jehofa a nthaya a re, ‘Nanoga, fologa fano ka bonako, gonne batho ba gago ba o neng wa ba ntsha kwa Egepeto ba sentse.+ Ba fapogile ka bonako mo tseleng e ke neng ka ba e laolela. Ba itiretse setshwantsho+ se se thetsweng.’ 13  Mme Jehofa a tswelela a nthaya a re, ‘Ke bone setšhaba seno, mme bona! ke setšhaba se se thamoethata.+ 14  Ntlogele ke se nyeletse+ mme ke phimole leina la sone kafa tlase ga magodimo,+ mme mma ke go dire setšhaba se se thata go feta le se se nang le batho ba bantsi go ba feta.’+ 15  “Morago ga moo ka retologa ka fologa thaba, fa thaba e ne e tuka molelo;+ mme dikwalelo tse pedi tsa kgolagano tsa bo di le mo diatleng tsa me tsoopedi.+ 16  Foo ka leba, mme bona, lo ne lo leofetse Jehofa Modimo wa lona! Lo ne lo itiretse namane+ e e thetsweng. Lo ne lo fapogile ka bonako mo tseleng e Jehofa a neng a e lo laoletse.+ 17  Foo ka tshwara dikwalelo tse pedi ka di latlhela kwa tlase go tswa mo diatleng tsa me tsoopedi ka di tšhwetlakanya fa pele ga matlho a lona.+ 18  Mme ka obama fa pele ga ga Jehofa, jaaka la ntlha, malatsi a le masome a manè le masigo a le masome a manè. Ke ne ka se ka ka ja senkgwe le fa e le go nwa metsi,+ ka ntlha ya boleo jotlhe jwa lona jo lo neng lo bo dirile ka go dira bosula mo matlhong a ga Jehofa gore lo mo kgopise.+ 19  Gonne ke ne ke boifa ka ntlha ya bogale jo bo tukang jo Jehofa a neng a lo galefetse ka jone mo a neng a batla a lo nyeletsa.+ Le fa go ntse jalo, Jehofa o ne a ntheetsa le ka nako eo.+ 20  “Jehofa o ne a tukela le Arone bogale mo a neng a batla a mo nyeletsa;+ mme ka kokotlelela+ le Arone ka nako eo. 21  Mme boleo jwa lona jo lo neng lo bo dirile, namane,+ ke ne ka e tsaya, ka e fisa mo molelong ka ba ka e thubaganya, ke e sila thata go fitlha e nna boleta jaaka lorole; morago ga moo ka latlhela lorole lwa yone mo molatswaneng o o phothoselang o o neng o fologa mo thabeng.+ 22  “Mo godimo ga moo, lo ne lwa galefisa Jehofa+ kwa Tabera+ le kwa Mase+ le kwa Kiberothe-hataafa.+ 23  Mme fa Jehofa a ne a lo ntsha kwa Kadeshe-barenea,+ a re, ‘Nanogang lo ye go rua lefatshe le ke tla le lo nayang!’ foo lo ne lwa itshwara ka go tsuologela taelo ya ga Jehofa Modimo wa lona,+ lo ne lwa se ka lwa supa tumelo+ mo go ene le fa e le go reetsa lentswe la gagwe.+ 24  Lo itshupile lo na le boitshwaro jwa botsuolodi mo go Jehofa+ go simolola ka letsatsi le ke lo itsileng ka lone. 25  “Ka jalo ka nna ka ikoba fa pele ga ga Jehofa malatsi a le masome a manè le masigo a le masome a manè,+ gonne ke ne ka ikoba jalo ka gonne Jehofa a ne a bua ka go lo nyeletsa.+ 26  Mme ka simolola go kokotlela+ Jehofa ke re, ‘Ao tlhe Morena Molaodimogolo Jehofa, o se ka wa senya batho ba gago, le eleng thuo ya gago ka namana,+ ba o neng wa ba golola ka bogolo jwa gago, ba o neng wa ba ntsha kwa Egepeto+ ka seatla se se nonofileng.+ 27  Gakologelwa batlhanka ba gago Aborahame, Isake le Jakobe.+ O se ka wa lebisa sefatlhego sa gago kwa go kgwaralaleng ga batho bano le boikepo jwa bone le boleo jwa bone,+ 28  e se re kgotsa lefatshe+ le o neng wa re ntsha kwa go lone la re: “Ka gonne Jehofa a ne a sa kgone go ba tsenya kwa lefatsheng le a neng a le ba solofeditse, le ka gonne a ne a ba tlhoile o ne a ba ntsha gore a tle go ba bolaela mo nageng.”+ 29  Le bone ke batho ba gago le thuo ya gago+ ka namana e o neng wa e ntsha ka maatla a gago a magolo le ka lebogo la gago le le otlologileng.’+

Dintlha Tse di Kwa Tlase