Duteronome 3:1-29

3  “Foo ra retologa ra tlhatloga ka tsela ya Bashana. Foo Oge+ kgosi ya Bashana a tswa, ene le batho botlhe ba gagwe, go tla go re kgatlhantsha mo tlhabanong kwa Ederei.+  Ka jalo Jehofa a nthaya a re, ‘O se ka wa mmoifa,+ gonne ruri ke tla mo tsenya le batho botlhe ba gagwe le lefatshe la gagwe mo seatleng sa gago; o mo dire fela jaaka o dirile Sihone+ kgosi ya Baamore, yo o neng a nna kwa Heshebone.’  Ka jalo Jehofa Modimo wa rona a tsenya mo seatleng sa rona le Oge kgosi ya Bashana le batho botlhe ba gagwe, mme ra nna ra mo kgemetha go fitlha a se na mofalodi ope yo o setseng.+  Re ne ra thopa metse yotlhe ya gagwe ka nako eo. Go ne go se na motse ope o re neng ra se ka ra o tsaya mo go bone, metse e le masome a marataro,+ kgaolo yotlhe ya Aregobe,+ bogosi jwa ga Oge kwa Bashana.+  Eno yotlhe e ne e le metse e e sireleditsweng ka lobota lo lo kwa godimo, dikgoro le mophakalego, kwantle ga metse e mentsi ya selegae.  Le fa go ntse jalo, re ne ra e senya,+ fela jaaka re ne re dirile Sihone kgosi ya Heshebone, ka go senya motse mongwe le mongwe, banna, basadi le bana ba bannye.+  Mme ra itseela diruiwa tsotlhe le thopo ya metse jaaka kgapo.+  “Mme ka nako eo ra tsaya lefatshe mo seatleng sa dikgosi tse pedi tsa Baamore+ tse di neng di le mo kgaolong ya Joredane, go tswa kwa mokgatšheng o o phothoselang wa Arenone+ go fitlha kwa Thabeng ya Heremone;+  (Basidona ba ne ba tle ba bitse Heremone ba re Sirione,+ mme Baamore ba ne ba tle ba e bitse Senire,)+ 10  metse yotlhe ya naga e e kwa godimo e e sebatla le Gileade yotlhe le Bashana yotlhe go fitlha kwa Saleka+ le Ederei,+ metse ya bogosi jwa ga Oge kwa Bashana. 11  Gonne ke Oge kgosi ya Bashana fela yo o neng a sala mo go se se neng se setse sa Barefaime.+ Bona! Setsholo sa gagwe e ne e le setsholo sa tshipi. A ga se kwa Raba+ wa bomorwa Amona? Boleele jwa sone ke dikubita di le robongwe, mme boatlhamo jwa sone dikubita di le nnè, ka kubita ya motho. 12  Re ne ra rua lefatshe leno ka nako eo; go tswa Aroere,+ o o fa mokgatšheng o o phothoselang wa Arenone, mme ke neile Barubene le Bagada+ sephatlo sa kgaolo e e dithaba ya Gileade le metse ya yone. 13  Mme ke neile sephatlo sa lotso lwa ga Manase Gileade+ yotlhe le Bashana+ yotlhe ya bogosi jwa ga Oge. Kgaolo yotlhe ya Aregobe+ ya Bashana yotlhe, a ga e bidiwe lefatshe la Barefaime?+ 14  “Jaire+ morwa Manase o ne a tsaya kgaolo yotlhe ya Aregobe+ go fitlha kwa molelwaneng wa Bageshure+ le Bamaakathe,+ mme a bitsa metsana eo ya Bashana ka leina la gagwe, e leng Hafotha-jaire,+ go fitlha mo letsatsing leno. 15  Mme Makire+ ke mo neile Gileade.+ 16  Mme ke neile Barubene+ le Bagada bogare jwa mokgatšha o o phothoselang e le molelwane, go simolola kwa Gileade+ go fitlha kwa mokgatšheng o o phothoselang wa Arenone, le go fitlha kwa Jaboke, mokgatšha o o phothoselang o e leng molelwane wa bomorwa Amona;+ 17  le Areba le Joredane le molelwane, go simolola kwa Kinerethe+ go ya kwa lewatleng la Areba, Lewatle la Letswai,+ kwa mohapheng wa mekgokolosa ya Pisega+ go ya ntlheng ya botlhabatsatsi. 18  “Ka jalo ke ne ka lo laela ka nako eo ka re, ‘Jehofa Modimo wa lona o lo neile lefatshe leno gore lo le rue. Lo tla kgabaganya lo tlhomeletse fa pele ga bomorwarraalona, e bong bomorwa Iseraele, banna botlhe ba ba diganka.+ 19  Ke basadi ba lona fela le bana ba lona ba bannye le diruiwa tsa lona (ke itse sentle gore lo na le diruiwa di le dintsi thata) tse di tla tswelelang di nna mo metseng ya lona e ke lo e neileng,+ 20  go fitlha Jehofa a naya bomorwarraalona boikhutso, mmogo le lona, mme le bone ba ruile lefatshe le Jehofa Modimo wa lona a le ba nayang ka kwa ga Joredane; mme morago ga moo lo tla boela, mongwe le mongwe kwa thuong ya gagwe e ke lo e neileng.’+ 21  “Ke ne ka laela Joshua+ ka nako eo ka re, ‘Matlho a gago a bona sotlhe se Jehofa Modimo wa gago a se dirileng dikgosi tseno tse pedi. Jehofa o tla dira magosi otlhe jalo a o kgabaganyetsang kwa go one.+ 22  Lo se ka lwa ba boifa, gonne Jehofa Modimo wa lona ke Ene yo o lo tlhabanelang.’+ 23  “Mme ka rapelela go amogelwa ke Jehofa ka nako eo ka re, 24  ‘Ao tlhe Morena Molaodimogolo Jehofa, wena ka bowena o simolotse go dira gore motlhanka wa gago a bone bogolo+ jwa gago le lebogo la gago le le nonofileng,+ gonne ke modimo ofe kwa magodimong kgotsa mo lefatsheng o o dirang ditiro tse di tshwanang le tsa gago le ditiro tse di maatla jaaka tsa gago?+ 25  Mma ke kgabaganye tsweetswee, ke bone lefatshe le le molemo+ le le ka kwa ga Joredane, kgaolo e e molemo eno e e dithaba+ le Lebanona.’+ 26  Mme Jehofa a tswelela go ntšhakgalela ka ntlha ya lona+ mme a se ka a ntheetsa; mme Jehofa a nthaya a re, ‘Go lekane ka wena! O se ka wa tlhola o bua le nna gape ka kgang eno. 27  Tlhatlogela kwa godimo ga Pisega+ mme o tsholeletse matlho a gago kwa bophirima le kwa bokone le kwa borwa le kwa botlhaba mme o bone ka matlho a gago, gonne ga o kitla o kgabaganya Joredane+ eno. 28  Mme o tlhome+ Joshua o mo kgothatse o bo o mo nonotshe, ka gonne ke ene yo o tla kgabaganyang+ kwa pele ga setšhaba seno e bile ke ene yo o tla dirang gore se rue lefatshe le o tla le bonang.’+ 29  Mo nakong eno yotlhe re ne re nna mo mokgatšheng fa pele ga Bethe-peore.+

Dintlha Tse di Kwa Tlase