Duteronome 17:1-20

17  “O se ka wa ntshetsa Jehofa Modimo wa gago setlhabelo sa poo kgotsa nku e e nang le bogole, sepe fela se se bosula; ka gonne ke selo se se makgapha mo go Jehofa Modimo+ wa gago.  “Fa go direga gore go fitlhelwe mo gare ga gago mo go mongwe wa metse ya gago e Jehofa Modimo wa gago a e go nayang monna kgotsa mosadi yo o dirang se se bosula mo matlhong a ga Jehofa Modimo wa gago mo a tlolang kgolagano+ ya gagwe,  mme a tsamaya a ya go obamela medimo e mengwe a ba a e ikobela kgotsa letsatsi kgotsa ngwedi kgotsa lesomo lotlhe la magodimo,+ selo se ke sa se laolelang,+  e le se o se boleletsweng mme o se utlwile e bile o se batlisisitse thata, mme bona! selo seo se tlhomamisitswe se le boammaaruri,+ selo se se makgapha seno se dirilwe mo Iseraele!  o ntshetse monna yoo kgotsa mosadi yoo yo o dirileng selo se se bosula seno kwa ntle kwa dikgorong tsa gago, ee, monna yoo kgotsa mosadi yoo, mme o mo kgobotletse ka maje, mme a swe.+  Yo o swang o tshwanetse go bolawa ka molomo wa basupi ba le babedi kgotsa wa basupi ba le bararo.+ Ga a kitla a bolawa ka molomo wa mosupi a le mongwe fela.+  Seatla sa basupi e nne sone se tlang pele mo go ene go mmolaya, mme morago ga moo seatla sa batho botlhe;+ mme o tlose se se bosula mo gare ga gago.+  “Fa go direga gore kgang ya tshwetso ya boatlhodi e bo e boitshega thata mo go wena,+ e go tsholotsweng madi+ mo go yone, e mo go yone go dirilweng kopo e e kafa molaong,+ kgotsa go dirilwe tiro nngwe ya thubakanyo, dikgang tse go ganetsanwang ka tsone,+ mo teng ga dikgoro tsa gago, o nanoge o ye kwa lefelong le Jehofa Modimo wa gago a tla le tlhophang,+  mme o ye kwa baperesiting,+ e bong Balefi, le kwa go yo o tla bong a dira jaaka moatlhodi+ mo malatsing ao, mme o botse, mme ba tla go naya lefoko la tshwetso ya boatlhodi.+ 10  Mme o dire tumalanong le lefoko le ba tla le go nayang go tswa mo lefelong leo le Jehofa a tla le tlhophang; mme o nne kelotlhoko go dira kafa go sotlhe se ba se go laelang. 11  O dire tumalanong le molao o ba tla go o bontshang, le tumalanong le tshwetso ya boatlhodi e ba tla go e bolelelang.+ O se ka wa fapoga lefoko le ba tla le go nayang, wa ya kafa mojeng kgotsa kafa molemeng.+ 12  Mme motho yo o tla dirang ka boikgodiso ka go sa reetse moperesiti yo o emeng gore a direle Jehofa Modimo wa gago foo kgotsa moatlhodi,+ motho yoo o tshwanetse go swa;+ mme o tlose se se bosula mo Iseraele.+ 13  Mme batho botlhe ba tla utlwa ba bo ba boifa,+ mme ba ka se tlhole ba dira ka boikgodiso. 14  “Fa kgabagare o tsena mo lefatsheng le Jehofa Modimo wa gago a le go nayang, mme o le ruile e bile o ntse mo go lone,+ mme o rile, ‘Mma ke itlhomele kgosi gore e nkokamele jaaka ditšhaba tsotlhe tse di ntikologileng’;+ 15  ruri o tshwanetse gore o itlhomele kgosi e Jehofa Modimo wa gago a tla e tlhophang+ gore e go okamele. O itlhomele kgosi go tswa mo go bomorwarrago gore e go okamele. Ga o kitla o letlelelwa go itlhomela motswakwa gore a go okamele yo e seng morwarrago. 16  Fela a se ka a ikokeletsa dipitse,+ le fa e le go dira gore batho ba boele Egepeto gore ba oketse dipitse;+ ntswa Jehofa a lo reile a re, ‘Le ka motlha lo se ka lwa boela morago gape ka tsela eno.’ 17  Gape a se ka a ikokeletsa basadi, gore pelo ya gagwe e se ka ya fapoga;+ le fa e le go ikokeletsa selefera le gouta thata.+ 18  Mme go tla diragala gore fa a tsaya manno a gagwe mo setulong sa bogosi jwa gagwe, a ikwalele sekaelo sa molao ono mo bukeng go tswa mo go o o tlhokometsweng ke baperesiti, ebong Balefi.+ 19  “Mme e nne mo go ene, mme a e bale malatsi otlhe a botshelo jwa gagwe,+ gore a ithute go boifa Jehofa Modimo wa gagwe gore a boloke mafoko otlhe a molao ono le melawana eno ka go e dira;+ 20  gore pelo ya gagwe e se ka ya ikgodisetsa bomorwarraagwe+ le gore a se ka a fapoga taelo a ya kafa mojeng kgotsa kafa molemeng,+ gore a lelefatse malatsi a gagwe mo bogosing+ jwa gagwe, ene le bomorwawe mo gare ga Iseraele.

Dintlha Tse di Kwa Tlase