Ditiro 7:1-60

7  Mme moperesiti yo mogolo a re: “A dilo tseno di ntse jalo?”  A re: “Banna, bakaulengwe le borra, utlwang. Modimo wa kgalalelo+ o ne a bonala kwa go rraaronamogologolwane Aborahame fa a ne a ntse a le kwa Mesopotamia, pele ga a aga kwa Harana,+  mme a mo raya a re, ‘Tswa mo lefatsheng la gaeno le mo go ba losika lwa gago mme o tle mo lefatsheng le ke tla le go bontshang.’+  Foo a tswa mo lefatsheng la Bakaladia mme a aga kwa Harana. Mme go tswa koo, fa rraagwe a sena go swa,+ Modimo a dira gore a fetole boago jwa gagwe a tle mo lefatsheng leno le jaanong lo nnang mo go lone.+  Mme le fa go ntse jalo o ne a se ka a mo naya thuo epe e e ka ruiwang mo go lone, nnyaa, le fa e le bophara jwa lonao;+ o ne a solofetsa go le mo naya e le thuo,+ mme morago ga gagwe go le naya losika lwa gagwe,+ fa a ne a ise a nne le ngwana.+  Mo godimo ga moo, Modimo o ne a bua ka ga seno, gore losika lwa gagwe e ne e tla nna baagi ba baeng+ mo lefatsheng le sele+ le gore batho ba ne ba tla ba dira batlhanka ba bo ba ba bogisa dingwaga di le makgolo a le manè.+  Modimo o ne a re: ‘Mme setšhaba seo, se ba tla nnang batlhanka ba sone, ke tla se atlhola+ mme morago ga dilo tseno ba tla tswa mme ba tla ntirela tirelo e e boitshepo mo lefelong leno.’+  “Gape o ne a mo naya kgolagano ya go rupa;+ mme ka gone o ne a nna rraagwe Isake+ mme a mo rupisa mo letsatsing la borobedi,+ mme Isake a nna rraagwe Jakobe, mme Jakobe a nna rraagwe ditlhogo tsa ditso+ tse di lesome le bobedi.  Mme ditlhogo tsa ditso di ne tsa fufegela+ Josefa tsa ba tsa mo rekisa mo Egepeto.+ Mme Modimo o ne a na le ene,+ 10  mme a mo golola mo dipitlaganong tsotlhe tsa gagwe a ba a mo naya bopelontle le botlhale mo ponong ya ga Faro kgosi ya Egepeto. Mme o ne a mo tlhoma gore a laole Egepeto le ntlo yotlhe ya gagwe.+ 11  Ga nna leuba mo Egepeto yotlhe le mo Kanana, pitlagano e kgolo tota; mme borraaronamogologolwane ba ne ba sa bone dijo dipe.+ 12  Mme Jakobe a utlwa gore go ne go na le dijo kwa Egepeto+ mme a roma borraaronamogologolwane lekgetlo la ntlha.+ 13  Mme mo lekgetlong la bobedi Josefa o ne a itsisiwe bomorwarraagwe;+ mme losika lwa lelapa la ga Josefa lwa bonatshega mo go Faro.+ 14  Jalo Josefa a roma mme a bitsa Jakobe rraagwe le botlhe ba losika lwa gagwe kwa lefelong leo,+ ba nna palo ya meya e le masome a supa le botlhano.+ 15  Jakobe a fologela kwa Egepeto.+ Mme a swa;+ le borraaronamogologolwane ba ne ba swa,+ 16  ba ne ba fudusediwa kwa Shekema+ mme ba ladiwa mo lebitleng+ le Aborahame a neng a le rekile ka tlhwatlhwa ka madi a selefera mo go bomorwa Hamore kwa Shekema.+ 17  “Fela jaaka nako e ne e atamela ya go diragadiwa ga tsholofetso e Modimo a neng a e boleletse Aborahame phatlalatsa, batho ba ne ba gola ba bo ba ntsifala mo Egepeto,+ 18  go fitlha go tsoga kgosi e sele mo Egepeto, e e neng e sa itse ka Josefa.+ 19  E ne ya dirisa bomenemene jwa puso kgatlhanong le lotso lwa rona+ ya ba ya patelela borre ka tsela e e sa siamang gore ba tlogele masea a bone mo pontsheng, gore a tle a se ka a kgona go tshela.+ 20  Mo go yone nako eo Moshe o ne a tsalwa,+ mme o ne a le montle ka tsela ya bomodimo.+ O ne a otliwa dikgwedi di le tharo mo legaeng la ga rraagwe. 21  Mme e rile a tlogetswe mo pontsheng, morwadia Faro a mo itshelela mme a mo godisa jaaka morwawe.+ 22  Ka gone Moshe o ne a rutiwa ka botlhale+ jotlhe jwa Baegepeto. Tota e bile, o ne a le maatla mo mafokong a gagwe+ le mo ditirong. 23  “Jaanong e rile e nna nako ya ngwaga wa gagwe wa bomasome a manè, ga tla mo pelong ya gagwe gore a lekole bomorwarraagwe, bomorwa Iseraele.+ 24  Mme e rile a tshogana ka a bona mongwe a tshwarwa ka tsela e e sa siamang, a mo femela a ba a busolosetsa yo o kgokgontshiwang ka go bolaya Moegepeto.+ 25  O ne a tsaya gore bomorwarraagwe ba ne ba tla lemoga gore Modimo o ne a ba boloka ka seatla sa gagwe,+ mme ba ne ba se ka ba lemoga seno. 26  Letsatsi le le latelang a bonala kwa go bone fa ba ne ba lwa, mme a leka go ba letlanya gape ka kagiso,+ a re, ‘Banna, lo bana ba motho. Ke ka ntlha yang fa lo tshwarana ka tsela e e sa siamang?’+ 27  Mme yo o neng a tshwara moagelani wa gagwe ka tsela e e sa siamang a mo kgorometsa, a re, ‘Ke mang yo o go tlhomileng mmusi le moatlhodi mo go rona?+ 28  Ga o batle go mpolaya ka mokgwa o o neng wa bolaya Moegepeto ka one maabane, a ga go jalo?’+ 29  Ka ntlha ya puo eno Moshe a tswa a tshaba mme a nna moagi wa moeng mo lefatsheng la Midiana,+ koo a neng a nna rraagwe bana ba babedi ba basimane gone.+ 30  “Mme e rile dingwaga di le masome a manè di sena go wela, ga bonala kwa go ene mo nageng ya Thaba ya Sinai moengele a le mo kgabong e e tukang ya setlhatshana se se mitlwa.+ 31  Jaanong e rile Moshe a se bona a gakgamalela pono eno.+ Mme ya re a atamela go tlhotlhomisa, lentswe la ga Jehofa la tswa la re, 32  ‘Ke nna Modimo wa borraagomogologolwane, Modimo wa ga Aborahame le wa ga Isake le wa ga Jakobe.’+ E re ka Moshe a ne a boifa thata, a se ka a nna pelokgale go tlhotlhomisetsa pele. 33  Jehofa a mo raya a re, ‘Rola bompaatšhane mo dinaong tsa gago, gonne lefelo le o emeng mo go lone ke mmu o o boitshepo.+ 34  Ruri ke bone go tshwarwa ka tsela e e sa siamang ga batho ba me ba ba kwa Egepeto,+ e bile ke utlwile go fegelwa+ ga bone mme ke fologile go tla go ba golola.+ Mme jaanong tla, ke tla go romela kwa Egepeto.’+ 35  Moshe yono, yo ba neng ba mo itatola, ba re, ‘Ke mang yo o go tlhomileng go nna mmusi le moatlhodi?’+ ene monna yono Modimo o ne a mo romela+ e le mmusi e bile e le mogolodi ka seatla sa moengele yo o neng a bonala kwa go ene mo setlhatshaneng se se mitlwa. 36  Monna yono o ne a ba ntshetsa kwa ntle+ fa a sena go dira dikgakgamatso le ditshupo mo Egepeto+ le mo Lewatleng le Lehibidu+ le mo gare ga naga dingwaga di le masome a manè.+ 37  “Yono ke ene Moshe yo o neng a raya bomorwa Iseraele a re, ‘Modimo o tla lo tsosetsa moporofeti yo o tshwanang le nna+ mo gare ga bomorwarraalona.’ 38  Yono ke ene+ yo o neng a le mo gare ga phuthego+ mo nageng a na le moengele+ yo o neng a bua le ene mo Thabeng ya Sinai e bile a na le borraaronamogologolwane, mme o ne a amogela ditaelo+ tse di tshelang tse di boitshepo gore a di lo neye. 39  Borraaronamogologolwane ba ne ba gana go mo utlwa, ba ne ba mo kgaphela kwa thoko+ mme mo dipelong tsa bone ba boela Egepeto,+ 40  ba raya Arone ba re, ‘Re direle medimo gore e re etelele pele. Gonne Moshe yono, yo o neng a re ntsha kwa lefatsheng la Egepeto, ga re itse gore o diragaletswe ke eng.’+ 41  Jalo ba dira namane mo malatsing ao+ mme ba tlisetsa modingwana setlhabelo ba bo ba simolola go ijesa monate mo ditirong tsa diatla tsa bone.+ 42  Jalo Modimo a retologa mme a ba tlogelela+ gore ba direle lesomosomo la legodimo tirelo e e boitshepo, fela jaaka go kwadilwe mo bukeng ya baporofeti+ go twe, ‘E ne e se nna yo lo neng lo mo isetsa diphologolo tse di bolailweng le ditlhabelo tshupelo dingwaga di le masome a manè mo nageng, ga ke re, lona ntlo ya Iseraele?+ 43  Mme e ne e le mogope wa ga Moloko+ le naledi+ ya modimo Refane tse lo neng lwa di rwala, ditshwantsho tse lo neng lwa di dira gore lo di obamele. Ka gone ke tla lo kobela+ ka kwa ga Babelona.’ 44  “Borraaronamogologolwane ba ne ba na le mogope wa bosupi mo nageng, fela jaaka a ne a ntsha ditaelo fa a ne a bua le Moshe gore a o dire go ya ka sebopego se a neng a se bone.+ 45  Mme borraaronamogologolwane ba ba neng ba o tlhatlhama le bone ba ne ba o tlisa le Joshua+ mo lefatsheng le le neng le ruilwe ke ditšhaba,+ tseo Modimo a neng a di kgarameletsa kwa ntle go tswa fa pele ga borraaronamogologolwane.+ O ne wa nna fano go fitlha mo metlheng ya ga Dafide. 46  O ne a amogelwa+ mo ponong ya Modimo mme a kopa tshiamelo+ ya go baakanyetsa Modimo wa ga Jakobe bonno. 47  Le fa go ntse jalo, Solomone o ne a mo agela ntlo.+ 48  Le fa go ntse jalo, Mogodimodimo ga a nne mo matlong a a dirilweng ka diatla;+ fela jaaka moporofeti a re, 49  ‘Legodimo ke setulo sa me sa bogosi,+ mme lefatshe ke sebeo sa me sa dinao.+ Lo tla nkagela ntlo ya mofuta ofe? Jehofa a rialo. Kgotsa lefelo la boikhutso jwa me+ ke eng? 50  Seatla sa me se ne sa dira dilo tseno tsotlhe, a ga go jalo?’+ 51  “Batho ba ba thamoethata e bile ba sa rupa mo dipelong+ le mo ditsebeng, ka metlha lo emelelana le moya o o boitshepo; jaaka borraalonamogologolwane ba ne ba dira, lo dira jalo.+ 52  Ke ofe wa baporofeti yo borraalonamogologolwane ba neng ba se ka ba mmogisa?+ Ee, ba ne ba bolaya+ ba ba neng ba itsise go sa le gale kaga go tla ga Mosiami,+ yo jaanong lo leng baoki e bile lo le babolai ba gagwe,+ 53  lona ba lo neng lwa amogela Molao jaaka o fetisiwa ke baengele+ mme lo sa o boloka.” 54  Ebu, e rile ba utlwa dilo tseno ba utlwa ba tlhabega mo dipelong tsa bone+ mme ba simolola go mo huranyetsa+ meno. 55  Mme ene, ka a tletse moya o o boitshepo, a leba kwa legodimong mme a tshogana ka a bona kgalalelo ya Modimo le ya ga Jesu a eme kafa seatleng sa moja sa Modimo,+ 56  mme a re: “Bonang! Ke bona magodimo a butswe+ le Morwa motho+ a eme kafa seatleng sa moja sa Modimo.”+ 57  Foo ba goa ka lentswe le le kwa godimo mme ba ithiba ditsebe+ ka diatla ba bo ba mo kgomogela gongwe. 58  Mme fa ba sena go mo latlhela kwa ntle ga motse,+ ba simolola go mo konopa ka maje.+ Mme basupi+ ba baya diaparo tsa bone tsa kafa ntle fa fatshe fa dinaong tsa lekau le le neng le bidiwa Saulo.+ 59  Mme ba tswelela go konopa Setefane ka maje fa a ne a dira boikuelo a re: “Morena Jesu, amogela moya wa me.”+ 60  Go tswa foo, ya re a oba mangole, a goa ka lentswe le le nonofileng a re: “Jehofa, o se ka wa ba balela boleo jono.”+ Mme fa a sena go bua jalo a robala mo losong.

Dintlha Tse di Kwa Tlase