Fetela kwa tshedimosetsong

Fetela go diteng

Basupi ba ga Jehofa

Tlhopha puo Setswana

Ditiro 3:1-26

3  Jaanong Petere le Johane ba tlhatloga ba tsena mo tempeleng go ya ureng ya thapelo, ura ya borobongwe,+  mme ga bo go kukilwe monna mongwe yo o neng a tlhotsa fa e sa le a tswa sebopelong sa ga mmaagwe,+ mme letsatsi le letsatsi ba ne ba tle ba mmeye gaufi le setswalo sa tempele se se neng se bidiwa Bontle,+ gore a kope dimpho tsa kutlwelobotlhoko mo go ba ba tsenang mo tempeleng.+  E rile a tshogana ka a bona Petere le Johane ba tloga ba tsena mo tempeleng a simolola go ba kopa dimpho tsa kutlwelobotlhoko.+  Mme Petere, mmogo le Johane, ba mo leba+ ba re: “Re lebe.”  Jalo a tlhoma tlhokomelo ya gagwe mo go bone, a lebeletse go bona sengwe mo go bone.  Le fa go ntse jalo, Petere a re: “Selefera le gouta ga ke a di tshola, mme se ruri ke nang le sone ke se ke se go nayang:+ Mo leineng la ga Jesu Keresete Monasaretha,+ tsamaya!”+  Foo a mo tshwara ka seatla sa moja+ a mo emisa. Ka ponyo ya leitlho dipato tsa dinao tsa gagwe le marapo a magwejana a gagwe tsa nitama;+  mme, ya re a tlolela kwa godimo,+ a ema ka dinao a ba a simolola go tsamaya, mme a tsena le bone mo tempeleng,+ a tsamaya a tlolaka e bile a baka Modimo.  Mme batho botlhe+ ba mmona a tsamaya e bile a baka Modimo. 10  Mo godimo ga moo, ba simolola go mo lemoga, gore monna yono ke yo o neng a tle a nnele dimpho tsa kutlwelobotlhoko fa Kgorong ya Bontle+ ya tempele, mme ba akabala thata le go tlhapelwa ke boitumelo+ ka ntlha ya se se neng se mo diragaletse. 11  Ebu, gonne monna yono a ngaparetse Petere le Johane, batho botlhe ba itlhaganelela mmogo kwa go bone kwa go se se neng se bidiwa leobo la ga Solomone,+ ba tshwerwe ke kgakge. 12  E rile Petere a bona seno, a raya batho a re: “Banna ba Iseraele, ke ka ntlha yang fa lo gakgamaditswe ke seno, kgotsa ke ka ntlha yang fa lo re tlhomile matlho jaaka e kete ke ka maatla a rona kgotsa boineelo jwa bomodimo re mo dirileng gore a tsamaye?+ 13  Modimo wa ga Aborahame le wa ga Isake le wa ga Jakobe,+ Modimo wa borraaronamogologolwane, o galaleditse+ Motlhanka wa gagwe,+ e bong Jesu, yo lo neng lwa mo tshwarisa+ lwa ba lwa mo itatola fa pele ga sefatlhego sa ga Pilato, fa ene a ne a dirile tshwetso ya go mo golola.+ 14  Ee, lo ne lwa itatola moitshepi le mosiami yoo, mme lwa kopa monna, e bong mmolai,+ gore lo mo neelwe ka kgololesego, 15  mme lo ne lwa bolaya Moemedi yo Mogolo wa botshelo.+ Mme Modimo o ne a mo tsosa mo baswing, tiragalo e re leng basupi ba yone.+ 16  Ka gone leina la gagwe, ka tumelo ya rona mo leineng la gagwe, le nonotshitse monna yono yo lo mmonang e bile lo mo itse, mme tumelo e e leng ka ene e dirile gore monna yono a itekanele ka botlalo mo ponong ya lona lotlhe. 17  Mme jaanong, bakaulengwe, ke a itse gore lo ne lo dira ka go tlhoka kitso,+ fela jaaka babusi ba lona+ le bone ba ne ba dira. 18  Mme ka tsela eno Modimo o diragaditse dilo tse a neng a di itsise go sa le pele ka molomo wa baporofeti botlhe, gore Keresete wa gagwe o ne a tlaa boga.+ 19  “Jalo, ikwatlhayeng,+ lo bo lo sokologe+ gore maleo a lona a phimolwe,+ gore dipaka tse di lapolosang+ di tle di tswa mo go Jehofa 20  le gore a tle a romele Keresete yo lo mo tlhometsweng, e bong Jesu, 21  yo legodimo, eleruri, le tshwanetseng go mo tshola mo teng ga lone+ go fitlha mo metlheng ya go tsosolosiwa+ ga dilo tsotlhe tse Modimo a neng a bua ka tsone ka molomo wa baporofeti+ ba gagwe ba ba boitshepo ba nako ya bogologolo. 22  Tota e bile, Moshe o ne a re, ‘Jehofa Modimo o tla lo tsosetsa moporofeti yo o tshwanang le nna+ a tswa gareng ga bomorwarraalona. Lo mo reetse kafa dilong tsotlhe tse a di buang le lona.+ 23  Eleruri, moya le fa e le ofe o o sa reetseng Moporofeti yoo o tla senngwa mo go feletseng mo bathong.’+ 24  Le baporofeti botlhe, tota e bile, go tloga ka Samuele go ya pele le ba ba mo tlhatlhamang, fela jaaka botlhe fela ba buile, le bone ba boletse ka tlhamalalo ka malatsi ano.+ 25  Lo bomorwa+ baporofeti le ba kgolagano e Modimo a neng a golagana le borraalonamogologolwane ka yone, ka go raya Aborahame a re, ‘ Malapa otlhe a lefatshe a tla segofala mo losikeng lwa gago.’+ 26  Morago ga gore Modimo a tsose Motlhanka wa gagwe, o ne a mo romela kwa go lona pele+ gore a lo segofatse ka go faposa mongwe le mongwe mo ditirong tsa lona tse di boikepo.”

Dintlha Tse di Kwa Tlase