Dipalo 6:1-27

6  Mme Jehofa a tswelela a bua le Moshe a re:  “Bua le bomorwa Iseraele o ba reye o re, ‘Fa go direga gore monna kgotsa mosadi a dire maikano a a kgethegileng a go tshela jaaka Monasirite+ wa ga Jehofa,  a a ithibe mo beineng le mo bojalweng jo bo tagang. A se ka a nwa botšarara jwa beine kgotsa botšarara jwa bojalwa+ jo bo tagang, le fa e le go nwa seedi sepe se se dirilweng ka morara, le fa e le go ja morara o le mosha kgotsa o omile.  Malatsi otlhe a a leng Monasirite ka one, a se ka a ja sepe gotlhelele se se dirilweng ka mofine wa beine, go simolola ka morara o o sa butswang go fitlha ka makape.  “‘Malatsi otlhe a maikano a Bonasirite jwa gagwe go se ka ga feta legare lepe mo tlhogong ya gagwe;+ go fitlha malatsi a a lomololetsweng Jehofa ka one a wela, a itshupe a le boitshepo ka go letla gore makaodi+ a moriri wa tlhogo ya gagwe a gole.  Mo malatsing otlhe a a nnang a lomololetswe Jehofa ka one a se ka a tla gaufi le moya ope o o suleng.+  A se ka a iteswafaletsa le eleng rraagwe kgotsa mmaagwe kgotsa morwarraagwe kgotsa kgaitsadie fa ba swa,+ ka gonne sesupo sa Bonasirite jwa gagwe mo Modimong wa gagwe se mo tlhogong ya gagwe.  “‘O boitshepo mo go Jehofa malatsi otlhe a Bonasirite jwa gagwe.  Mme fa go direga gore ope yo o swang a swe ka tshoganyetso fa thoko ga gagwe+ mo e leng gore o itshepolotse tlhogo ya Bonasirite jwa gagwe, foo a a beole+ tlhogo ya gagwe mo letsatsing la go tlhomamisa go itsheka ga gagwe. A e beole mo letsatsing la bosupa. 10  Mme mo letsatsing la borobedi a tlise maeba a mabedi kgotsa maphoi a mannye a mabedi kwa moperesiting kwa kgorong ya mogope wa bokopanelo.+ 11  Mme moperesiti a ise le le lengwe jaaka tshupelo ya boleo+ mme le lengwe jaaka tshupelo e e fisiwang+ a ba a mo direla tetlanyo, e re ka a leofile ka ntlha ya moya o o suleng. Foo a itshepise tlhogo ya gagwe mo letsatsing leo. 12  Mme a tshele jaaka Monasirite+ wa ga Jehofa ka malatsi a Bonasirite jwa gagwe, mme a tlise phelefu e potlana e e mo ngwageng wa yone wa ntlha jaaka tshupelo ya molato;+ mme malatsi a pele ga a kitla a balwa ka gonne a leswafaditse Bonasirite jwa gagwe. 13  “‘Jaanong ono ke molao ka ga Monasirite: Mo letsatsing la fa malatsi a Bonasirite jwa gagwe a wela,+ a tlisiwe kwa kgorong ya mogope wa bokopanelo. 14  Mme a ise jaaka tshupelo ya gagwe e e yang kwa go Jehofa, phelefu e potlana e le nngwe e e itekanetseng sentle e e mo ngwageng wa yone wa ntlha e le tshupelo e e fisiwang+ le kwanyana e namagadi e le nngwe e e itekanetseng sentle e e mo ngwageng wa yone wa ntlha e le tshupelo ya boleo+ le phelefu e le nngwe e e itekanetseng sentle e le setlhabelo sa kabalano,+ 15  le seroto sa dikuku tse di sa bedisiwang tsa bupi jo bo boleta+ tse di bopegileng jaaka maseka, tse di kolobeditsweng ka leokwane,+ le dipapetla tsa senkgwe tse di sa bedisiwang tse di tshasitsweng leokwane,+ le tshupelo ya tsone ya dijo tsa ditlhaka+ le ditshupelo tsa tsone tsa senō.+ 16  Moperesiti a di ise fa pele ga ga Jehofa a bo a isa tshupelo ya gagwe ya boleo le tshupelo ya gagwe e e fisiwang.+ 17  Mme a isetse Jehofa phelefu jaaka setlhabelo sa kabalano+ mmogo le seroto sa dikuku tse di sa bedisiwang; mme moperesiti a ise tshupelo ya yone ya dijo tsa ditlhaka+ le tshupelo ya yone ya senō. 18  “‘Mme Monasirite a beole+ tlhogo ya Bonasirite jwa gagwe kwa kgorong ya mogope wa bokopanelo, a tseye moriri wa tlhogo ya Bonasirite jwa gagwe a o tsenye mo molelong o o kafa tlase ga setlhabelo sa kabalano. 19  Mme moperesiti a tseye legetla le le bedisitsweng+ mo phelefung le kuku e le nngwe e e sa bedisiwang e e bopegileng jaaka leseka mo serotong, le papetlana e le nngwe ya senkgwe+ se se sa bedisiwang, a di tsenye mo legofing la Monasirite fa sesupo sa Bonasirite jwa gagwe se sena go beolwa. 20  Mme moperesiti a di fokisetse kwa le kwa jaaka tshupelo e e fokwang fa pele ga ga Jehofa.+ Ke selo se se boitshepo mo moperesiting, mmogo le sehuba+ sa tshupelo e e fokwang le leoto la moneelo.+ Morago ga moo Monasirite a ka nwa beine.+ 21  “‘Ono ke molao kaga Monasirite+ yo o dirang maikano—kaga tshupelo ya gagwe e e yang kwa go Jehofa kaga Bonasirite jwa gagwe, kwantle ga se a ka se kgonang. A dire go ya ka maikano a gagwe a a ka a dirang ka ntlha ya molao wa Bonasirite jwa gagwe.’” 22  Foo Jehofa a bua le Moshe a re: 23  “Bua le Arone le bomorwawe o re, ‘Eno ke tsela e lo tshwanetseng go segofatsa+ bomorwa Iseraele ka yone, lo ba raya lo re: 24  “E kete Jehofa a ka lo segofatsa+ a bo a lo boloke.+ 25  E kete Jehofa a ka dira gore sefatlhego sa gagwe se lo phatsimele,+ mme e kete a ka lo amogela.+ 26  E kete Jehofa a ka tsholeletsa sefatlhego sa gagwe kwa go lona+ mme a lo abele kagiso.”’+ 27  Mme ba beye leina la me+ mo go bomorwa Iseraele, gore ke tle ke ba segofatse.”+

Dintlha Tse di Kwa Tlase