Dipalo 23:1-30

23  Foo Balaame a raya Balake a re: “Nkagela dibeso di le supa+ mo lefelong leno o bo o mpaakanyetse dipoo di le supa mo lefelong leno le diphelefu di le supa.”  Balake a akofa a dira fela jaaka Balaame a ne a buile. Morago ga moo Balake le Balaame ba isa poo le phelefu tshupelo mo sebesong sengwe le sengwe.+  Mme Balaame a tswelela go raya Balake a re: “Ema fa tshupelong ya gago e e fisiwang,+ mme mma ke tsamaye. Gongwe Jehofa o tla ikgolaganya le go kopana le nna.+ Fa go le jalo, le fa e le eng se a tla se mpontshang, ke tla se go bolelela.” Ka jalo a ya kwa thoteng e e se nang sepe.  E rile Modimo a ikgolaganya le Balaame,+ foo a Mo raya a re: “Ke tlhomagantse dibeso di le supa ka mela, mme ka isa poo le phelefu tshupelo mo sebesong sengwe le sengwe.”+  Ka gone Jehofa a tsenya lefoko mo molomong wa ga Balaame+ a re: “Boela kwa go Balake, mme seno ke se o tla se buang.”+  Ka jalo a boela kwa go ene, mme bona! ene le dikgosana tsotlhe tsa Moabe ba bo ba eme fa tshupelong ya gagwe e e fisiwang.  Foo a bua puo ya gagwe ya seane+ a re:“Go tswa kwa Arame+ Balake kgosi ya Moabe o ne a leka go ntsamaisa,Go tswa kwa dithabeng tsa botlhaba:‘A ko o tle, a ko o mphutsetse Jakobe.Ee, a ko o tle, a ko o atlhole Iseraele.’+   Ke ka hutsa jang ba Modimo a sa ba hutsang?+E bile ke ka atlhola jang ba Modimo a sa ba atlholang?+   Gonne ke ba bona ke le mo godimo ga mafika,E bile ke ba bona ke le mo dithoteng.Ke bale ba ntse mo metlaaganeng ba le bosi+ jaaka setšhaba,E bile ga ba ipalele mo gare ga ditšhaba.+ 10  Ke mang yo o badileng lorole lwa ga Jakobe,+E bile ke mang yo o badileng karolo ya bonè ya Iseraele?A moya wa me o swe loso lwa ba ba thokgameng,+Mme a bokhutlo jwa me morago ga moo bo nne jaaka jwa bone.”+ 11  Foo Balake a raya Balaame a re: “O ntirileng? Ke ne ke go tseetse go tla go hutsa baba ba me, mme bona, o ba segofaditse ka botlalo.”+ 12  Foo a araba a re: “A ga ke a tshwanela go tlhokomela go bua le fa e le eng se Jehofa a se tsenyang mo molomong wa me?”+ 13  Foo Balake a mo raya a re: “Tsweetswee, a ko o tle le nna re ye kwa lefelong le lengwe le o ka ba bonang o le kwa go lone. O tla bona fela ba ba kwa bofelelong,+ ga o kitla o ba bona botlhe. Mme o ba mphutsetse o le koo.”+ 14  Ka jalo a mo isa kwa nageng ya Sofime, kwa godimo ga Pisega,+ mme a aga dibeso di le supa le go isa poo le phelefu tshupelo mo sebesong sengwe le sengwe.+ 15  Morago ga moo a raya Balake a re: “Ema fano fa tshupelong ya gago e e fisiwang, mme nna, mma ke golagane le ene fale.” 16  Morago ga moo Jehofa a golagana le Balaame mme a tsenya lefoko mo molomong wa gagwe a re:+ “Boela kwa go Balake,+ mme seno ke se o tla se buang.” 17  Ka jalo a tla kwa go ene, mme bona! o ne a eme fa tshupelong ya gagwe e e fisiwang, le dikgosana tsa Moabe di na le ene. Foo Balake a mo raya a re: “Jehofa o buile eng?” 18  Foo a bua puo ya gagwe ya seane a re:+“Nanoga Balake, o reetse.A ko o ntlhwaele tsebe, wena morwa Sipore.+ 19  Modimo ga se motho gore a ka bua maaka,+E bile ga se morwa motho gore a ka ikwatlhaya.+A ene ka boene o go boletse mme a ga a kitla a go diragatsa,A o buile mme a ga a kitla a go diragatsa?+ 20  Bona! Ke tseetswe go tla go segofatsa,Mme O segofaditse,+ mme ga nkitla ke busetsa seno morago.+ 21  Ga a a leba maatla ape a masaitseweng+ kgatlhanong le Jakobe,E bile ga a bona matshwenyego ape kgatlhanong le Iseraele.Jehofa Modimo wa gagwe o na le ene,+E bile go baka kgosi ka lentswe le le kwa godimo go mo gare ga gagwe. 22  Modimo o ba ntsha kwa Egepeto.+Mokgwa wa gagwe+ o bofefo jaaka wa poo ya naga. 23  Gonne ga go na lefoko lepe la maselamose la bomadimabe kgatlhanong le Jakobe,+Le fa e le boitseanape bope kgatlhanong le Iseraele.+Mo nakong eno go ka buiwa ka ga Jakobe le Iseraele ga twe,‘Se Modimo a se dirileng!’+ 24  Bona, setšhaba se tla tsoga jaaka tau,Se tla itsholetsa+ jaaka tau.Ga se kitla se rapama go fitlha se ja seo se se tsomileng,Mme se tla nwa madi a ba ba bolailweng.”+ 25  Foo Balake a raya Balaame a re: “Fa e le gore, kafa letlhakoreng le lengwe ga o kgone go mo hutsa gotlhelele, he kafa letlhakoreng le lengwe, o se ka wa mo segofatsa gotlhelele.” 26  Balaame ene a araba a raya Balake a re: “A ga ke a bua le wena ka re, ‘Sotlhe se Jehofa a tla se buang ke sone se ke tla se dirang’?”+ 27  Foo Balake a raya Balaame a re: “A ko o tle tsweetswee. Mma ke go ise kwa lefelong le lengwe gape. Gongwe go tla siama mo matlhong a Modimo wa boammaaruri gore ruri o mo mphutsetse o le koo.”+ 28  Foo Balake a tlhatlosetsa Balaame kwa godimo ga Peore, e e lebileng kwa Jeshimone.+ 29  Foo Balaame+ a raya Balake a re: “Nkagela dibeso di le supa mo lefelong leno o bo o mpaakanyetse dipoo di le supa le diphelefu di le supa+ mo lefelong leno.” 30  Ka jalo Balake a dira fela jaaka Balaame a ne a buile, mme a isa poo le phelefu tshupelo mo sebesong sengwe le sengwe.+

Dintlha Tse di Kwa Tlase