Baatlhodi 4:1-24

4  Foo bomorwa Iseraele ba simolola gape ba dira se se bosula mo matlhong a ga Jehofa ka gonne jaanong Ehude o ne a sule.+  Jalo Jehofa a ba rekisetsa+ mo seatleng sa ga Jabine kgosi ya Kanana, yo o neng a busa kwa Hasore;+ molaodi wa masole a gagwe ya bo e le Sisera,+ mme o ne a nna kwa Haroshethe+ wa ditšhaba.  Mme bomorwa Iseraele ba simolola go goela kwa go Jehofa,+ ka gonne o ne a na le dikara tsa ntwa di le makgolo a le robongwe tse di tlhometsweng disekele tsa tshipi,+ mme ene ka esi o ne a gatelela bomorwa Iseraele+ ka go ba tshwara makgwakgwa dingwaga di le masome a mabedi.  Jaanong Debora, moporofeti wa mosadi,+ mosadi wa ga Lapidothe, o ne a atlhola Iseraele ka yone nako eo.  Mme o ne a nna kafa tlase ga setlhare sa ga Debora sa mokolane fa gare ga Rama+ le Bethele+ mo kgaolong e e dithaba ya Eferaime; mme bomorwa Iseraele ba ne ba tle ba tlhatlogele kwa go ene go bona katlholo.  Mme a roma gore go bidiwe Barake+ morwa Abinoame go tswa kwa Kedeshe-nafetali+ a mo raya a re: “A Jehofa Modimo wa Iseraele ga a ntsha taelo? ‘Tsamaya mme o ikale mo Thabeng ya Tabore,+ mme o tsamaye le banna ba le dikete di le lesome ba ba tswang mo go bomorwa Nafetali+ le mo go bomorwa Sebulone.+  Mme ruri ke tla gogela kwa go wena+ Sisera+ molaodi wa masole a ga Jabine+ fa mokgatšheng o o phothoselang wa Kishone+ le dikara tsa gagwe tsa ntwa le boidiidi jwa gagwe, mme ruri ke tla mo tsenya mo seatleng sa gago.’”+  Mme Barake a mo raya a re: “Fa e le gore o tla tsamaya le nna, ruri ke tla ya; mme fa e le gore ga o kitla o tsamaya le nna, ga nkitla ke tsamaya.”  Foo a re: “Ruri ke tla tsamaya le wena. Le fa go ntse jalo, bontle ga e kitla e nna jwa gago mo tseleng e o e tsamayang, gonne Jehofa o tla rekisetsa Sisera mo seatleng sa mosadi.”+ Foo Debora a nanoga a tsamaya le Barake go ya Kedeshe.+ 10  Mme Barake a simolola go phuthela Sebulone+ le Nafetali mmogo kwa Kedeshe, mme banna ba le dikete di le lesome ba tlhatloga ba latela dikgato tsa gagwe;+ mme Debora a tlhatloga le ene. 11  Mme ga diragala gore Hebere+ wa Mokene a bo a kgaogane le Bakene,+ bomorwa Hobabe, yo Moshe e neng e le mogwe wa gagwe,+ mme o ne a tlhomile mogope wa gagwe gaufi le setlhare se segolo kwa Saananime, e e kwa Kedeshe. 12  Foo ba begela Sisera gore Barake morwa Abinoame+ o ne a tlhatlogetse kwa Thabeng ya Tabore.+ 13  Sisera a akofa a phutha dikara tsotlhe tsa gagwe tsa ntwa, dikara di le makgolo a le robongwe tsa ntwa tse di tlhometsweng disekele tsa tshipi,+ le batho botlhe ba ba neng ba na le ene, ba tswa mo Haroshethe wa ditšhaba ba ya kwa mokgatšheng o o phothoselang wa Kishone.+ 14  Jaanong Debora a raya Barake a re: “Nanoga, gonne leno ke letsatsi le ka lone Jehofa ruri a tla tsenyang Sisera mo seatleng sa gago. A Jehofa ga se ene a duleng a le kwa pele ga gago?”+ Mme Barake a fologa mo Thabeng ya Tabore a na le banna ba le dikete di le lesome ba mo setse morago. 15  Mme Jehofa a tsenya tlhakatlhakano+ mo go Sisera le mo dikareng tsotlhe tsa gagwe tsa ntwa le mo bothibelelong jotlhe ka bogale jwa tšhaka fa pele ga ga Barake. La bofelo Sisera a fologa mo kareng mme a tshaba ka dinao. 16  Mme Barake a lelekisa+ dikara tsa ntwa+ le bothibelelo go ya go fitlha kwa Haroshethe wa ditšhaba, mo bothibelelo jotlhe jwa ga Sisera bo neng jwa wa ka bogale jwa tšhaka. Ga se ka ga sala le fa e le a le mongwe fela.+ 17  Mme Sisera+ ene, a tshabela ka dinao kwa mogopeng wa ga Jaele+ mosadi wa ga Hebere wa Mokene,+ gonne go ne go na le kagiso fa gare ga ga Jabine kgosi ya Hasore+ le ba ntlo ya ga Hebere wa Mokene. 18  Foo Jaele a tswa a tla go kgatlhantsha Sisera mme a mo raya a re: “Fapogela ka kwano morena wa me, fapogela ka kwano go nna. O se ka wa boifa.” Jalo a fapogela kwa go ene mo mogopeng. Moragonyana a mmipa ka kobo. 19  Fa nako e ntse e ya a mo raya a re: “Tsweetswee, mphe metsinyana ke nwe, gonne ke nyorilwe.” Ka jalo a bula modutwana+ wa mashi mme a mo nosa,+ morago ga moo a mmipa. 20  Mme gape a mo raya a re: “Ema fa botsenong jwa mogope, mme go diragale gore fa motho ope a tla a ba a go botsa a re, ‘A go na le monna fano?’ o re, ‘Nnyaa!’” 21  Mme Jaele mosadi wa ga Hebere a tsaya lomapo lwa mogope a bo a tsaya noto ka seatla sa gagwe. A ya kwa go ene a nanabela mme a kokotela lomapo mo ditlhakoreng tsa tlhogo ya gagwe+ mme a lo phunyeletsa fa fatshe, a santse a thulametse e bile a lapile. A swa fela jalo.+ 22  Mme bona! Barake a bo a lateletse Sisera. Jaanong Jaele a tswa a ya go mo kgatlhantsha mme a mo raya a re: “Tla mme ke tla go bontsha monna yo o mmatlang.” Ka jalo a tsena mo teng kwa go ene, mme bona! Sisera a bo a ole a sule, lomapo lo tsene mo ditlhakoreng tsa tlhogo ya gagwe. 23  Modimo a fenya+ Jabine kgosi ya Kanana jalo fa pele ga bomorwa Iseraele ka letsatsi leo. 24  Mme seatla sa bomorwa Iseraele sa tswelela se thatafalela pele kgatlhanong le Jabine kgosi ya Kanana,+ go fitlha ba fedisa Jabine kgosi+ ya Kanana.

Dintlha Tse di Kwa Tlase